'ആ വർഷത്തെ മികച്ച നടനുള്ള അവാർഡ് കിട്ടേണ്ടത് ദുൽഖറിനായിരുന്നു'; ഞാൻ കണ്ടതിൽ വെച്ച് ഏറ്റവും മികച്ച പെർഫോമൻസ് ആണ് കമ്മട്ടിപ്പാടത്തിലേത്; തുറന്ന് പറഞ്ഞ് വിനായകൻ

കൊച്ചി: രാജീവ് രവി സംവിധാനം ചെയ്ത സൂപ്പർ ഹിറ്റ് ചിത്രം 'കമ്മട്ടിപ്പാട'ത്തിലേത് ദുൽഖർ സൽമാന്റെ ഏറ്റവും മികച്ച പ്രകടനമായിരുന്നുവെന്നും, ആ വർഷത്തെ മികച്ച നടനുള്ള അവാർഡ് ദുൽഖറിന് ലഭിക്കേണ്ടതായിരുന്നു എന്നും നടൻ വിനായകൻ. ക്ലബ് എഫ്എമ്മിന് നൽകിയ അഭിമുഖത്തിലാണ് വിനായകൻ ഈ അഭിപ്രായം പ്രകടിപ്പിച്ചത്. 2016-ൽ പുറത്തിറങ്ങിയ ചിത്രം വലിയ നിരൂപക പ്രശംസ നേടിയിരുന്നു.

"ഞാൻ കണ്ടതിൽ ദുൽഖറിന്റെ ഏറ്റവും മികച്ച പെർഫോമൻസ് ആണ് കമ്മട്ടിപ്പാടത്തിലേത്. കഥാപാത്രത്തിന്റെ ജീവിതരീതിയിൽ നിന്ന് നേരെ ഓപ്പോസിറ്റ് ആണ് ദുൽഖർ. എന്നാൽ നമ്മൾ (താനും മണികണ്ഠനും) ഇതിൽ ജീവിക്കുന്നവരാണ്. ശരിക്കും അന്ന് ദുൽഖറിനായിരുന്നു അവാർഡ് കിട്ടേണ്ടിയിരുന്നത്. ദുൽഖർ ആണ് ഏറ്റവും കൂടുതൽ ആ സിനിമയ്ക്കായി കഷ്ടപ്പെട്ടത്," വിനായകൻ പറഞ്ഞു. തനിക്കും മണികണ്ഠൻ ആചാരിക്കും കഥയുടെ പശ്ചാത്തലവുമായി നല്ല ബന്ധമുണ്ടായിരുന്നെന്നും, എന്നാൽ ദുൽഖർ പുറത്തുനിന്നു ഈ ലോകത്തേക്ക് വന്നതാണെന്നും അദ്ദേഹം കൂട്ടിച്ചേർത്തു.

രാജീവ് രവി സംവിധാനം ചെയ്ത് 2016-ൽ റിലീസ് ചെയ്ത 'കമ്മട്ടിപ്പാടം' ബോക്സ് ഓഫീസിലും നിരൂപകർക്കിടയിലും വലിയ വിജയമായിരുന്നു. ദുൽഖർ സൽമാൻ, വിനായകൻ എന്നിവരെ കൂടാതെ മണികണ്ഠൻ ആചാരി, വിനയ് ഫോർട്ട്, അനിൽ നെടുമങ്ങാട്, ഷൈൻ ടോം ചാക്കോ എന്നിവരും ചിത്രത്തിൽ പ്രധാന വേഷങ്ങളിൽ എത്തിയിരുന്നു. പി. ബാലചന്ദ്രൻ തിരക്കഥയെഴുതിയ ഈ ചിത്രത്തിന്റെ ഛായാഗ്രഹണം നിർവഹിച്ചത് മധു നീലകണ്ഠനായിരുന്നു.

47-ാമത് കേരള സംസ്ഥാന ചലച്ചിത്ര പുരസ്കാരങ്ങളിൽ 'കമ്മട്ടിപ്പാടം' നാല് വിഭാഗങ്ങളിൽ പുരസ്കാരങ്ങൾ നേടിയിരുന്നു. മികച്ച നടൻ (വിനായകൻ), മികച്ച സഹനടൻ (മണികണ്ഠൻ ആചാരി), മികച്ച കലാസംവിധായകൻ, മികച്ച എഡിറ്റിങ് എന്നിവയായിരുന്നു ഈ പുരസ്കാരങ്ങൾ. തനിക്ക് മികച്ച നടനുള്ള പുരസ്കാരം ലഭിച്ച അതേ വർഷം തന്നെയാണ് ദുൽഖറിന് പുരസ്കാരം ലഭിക്കേണ്ടിയിരുന്നു എന്ന് വിനായകൻ അഭിപ്രായപ്പെട്ടത് ചർച്ചാവിഷയമായിരിക്കുകയാണ്.