കഞ്ചാവ് കേസിൽ ഒറ്റിയതിന് സുഹൃത്തിന്റെ തല ഇടിച്ചു പൊളിച്ചു; അറസ്റ്റിലായ ഗൂണ്ടയ്ക്കെതിരെ കാപ്പ ചുമത്തും
കണ്ണൂർ: കഞ്ചാവ് കേസിൽ ഒറ്റിയെന്ന സംശയത്താൽ സുഹൃത്തിന്റെ തലതല്ലിപൊളിച്ച കേസിൽ പ്രതിയായ ഗുണ്ടാതലവനായ യുവാവിനെതിരെ കാപ്പ ചുമത്താൻ കണ്ണൂർ സിറ്റി പൊലിസ് തീരുമാനിച്ചു. പതിനഞ്ചോളം മയക്കുമരുന്ന് കേസിലെ പ്രതിയായ യുവാവിനെ അക്രമക്കേസിൽ പൊലിസ് അറസ്റ്റു ചെയ്തിട്ടുണ്ട്.
എളയാവൂർ സ്വദേശിയും ശ്രീപുരത്ത് താമസക്കാരനുമായ കെ.കെ രഞ്ജിത്തിനെയാ(33)ണ് കണ്ണൂർ ടൗൺ ഇൻസ്പെക്ടർ ശ്രീജിത്തുകൊടേരിയും സംഘവും അറസ്റ്റു ചെയ്തത്. താണധനലക്ഷ്മി ആശുപത്രിക്ക് സമീപം വെച്ചു കഞ്ചാവ് കേസിൽ പൊലീസിന് ഒറ്റിയെന്ന സംശയത്താലുണ്ടായ വാക്കുതർക്കത്തെ തുടർന്നാണ് ഇയാൾ വിപിൻ കളമ്പേത്തിനെ അടിച്ചു പരുക്കേൽപ്പിച്ചത്.
കഴിഞ്ഞ വ്യാഴാഴ്ച്ച രാത്രിയാണ് സംഭവം. ഇരുവരും തമ്മിലുള്ള വാക്കുതർക്കത്തെ തുടർന്ന് കല്ലുകൊണ്ടു തലയ്ക്ക് അടിച്ചു അടിച്ചു പരുക്കേൽപ്പിക്കുകയായിരുന്നു. കഞ്ചാവ് ഇടപാടുമായി ബന്ധപ്പെട്ട് രഞ്ജിത്തിനെതിരെ പൊലീസിന് വിവരം നൽകിയെന്നതായിരുന്നു വൈരാഗ്യത്തിന് കാരണം.
വിപിൻ സ്വകാര്യ ആശുപത്രിയിൽ ചികിത്സയിലാണ്. ഇയാളുടെ തലയിൽ പതിനെട്ടു തുന്നലുകളുണ്ട്. വിപിൻ അപകടനില തരണം ചെയ്തതായി പൊലീസ് അറിയിച്ചു. ഇയാളും നേരത്തെ മയക്കുമരുന്ന് കേസുകളിൽ പ്രതിയാണെന്ന് പൊലീസ് സംശയിക്കുന്നുണ്ട്. വധശ്രമക്കേസെടുത്ത് കണ്ണൂർ കോടതിയിൽ ഹാജരാക്കിയ രഞ്ജിത്തിനെ റിമാൻഡ് ചെയ്തു.
