യുവ നടൻ എഡ്ഡി ഹസൻ ഡാളസിൽ വെടിയേറ്റ് മരിച്ചു
ഡാളസ്: പ്രമുഖ യുവനടനും, ഒസ്‌കാർ നോമിനേഷൻ ചിത്രത്തിലെ അഭിനേതാവുമായ യുവ നടൻ എഡ്ഡി ഹസൻ (30) നവംബർ ഒന്നിന് ഞായറാഴ്ച രാവിലെ ഡാളസ് പ്രാന്തപ്രദേശത്തുള്ള ഗ്രാന്റ് പ്രറേറിയിൽ പുലർച്ചെ രണ്ടിന് വെടിയേറ്റ് മരിച്ചു. പ്രതിയെ കണ്ടെത്തുന്നതിന് പൊലീസ് പൊതുജനങ്ങളുടെ സഹകരണം അഭ്യർത്ഥിച്ചു.
'ത്രീ കിഡ്സ് ആർ ഓൾറൈറ്റ്' എന്ന ചിത്രമായിരുന്നു ഒസ്‌കാർ അവാർഡിനായി 2010-ൽ നോമിനേറ്റ് ചെയ്യപ്പെട്ടിരുന്നത്. നിരവധി ടിവി ഷോകളിലും എഡ്ഡി അഭിനയിച്ചിട്ടുണ്ട്. കാമുകിയുടെ അപ്പാർട്ട്മെന്റ് സ്ഥിതിചെയ്യുന്ന 3000 ബ്ലോക്ക് വെസ്റ്റ് ബാർഡിൻ റോഡിൽ വെടിയേറ്റ നിലയിൽ ഞായറാഴ്ച പുലർച്ചെ ആയിരുന്നു എഡ്ഡിയെ കണ്ടെത്തിയത്.ഉടൻ ആശുപത്രിയിൽ എത്തിച്ചുവെങ്കിലും ജീവൻ രക്ഷിക്കാനായില്ല.
കാർ തട്ടിക്കൊണ്ടുപോകലുമായിട്ടാണോ വെടിവയ്പുണ്ടായതെന്ന് സംശയിക്കുന്നതായി പൊലീസ് അറിയിച്ചു. എഡ്ഡി മരിച്ചുകിടന്നിരുന്ന സ്ഥലത്തുനിന്നും മറ്റൊരു കാറും പൊലീസ് കസ്റ്റഡയിലെടുത്തിട്ടുണ്ട്. ടെക്സസ് കോർസിക്കാനയിൽ നിന്നുള്ള എഡ്ഡി പതിനൊന്നാം വയസിൽ ലോസ്ആഞ്ചലസിലേക്ക് അഭിനയവുമായി ബന്ധപ്പെട്ട് താമസം മാറിയിരുന്നു.
എഡ്ഡി കൊല്ലപ്പെട്ട സംഭവത്തെക്കുറിച്ച് വിവരം നൽകുന്നവർക്ക് 2,500 ഡോളർ പ്രതിഫലം പ്രഖ്യാപിച്ചിട്ടുണ്ട്. ഇതിനെക്കുറിച്ച് വിവരം ലഭിക്കുന്നവർ ക്രൈം സ്റ്റോപ്പേഴ്സിനേയോ, 972 988 8477 നമ്പരിലോ വിളിച്ചറിയിക്കണമെന്ന് പൊലീസ് അറിയിച്ചിട്ടുണ്ട്.
