കൊച്ചിയിൽ നടി ആക്രമിക്കപ്പെട്ട സംഭവത്തിൽ ജനങ്ങളുടെ എല്ലാ ചോദ്യങ്ങൾക്കും മറുപടി പറഞ്ഞു കൊണ്ടിരിക്കുന്നത് ആക്രമിക്കപ്പെട്ട നടിയുടെ സഹോദരനാണ്്. കഴിഞ്ഞ ദിവസവും നടിയെ ആക്രമിച്ച കേസുമായി ബന്ധപ്പെട്ട് പൊതുസമൂഹത്തിൽ നിന്നും നിരവധി ചോദ്യങ്ങൾ ഉയർന്നിരുന്നു. ഇതിന് മറുപടിയുമായി രംഗത്ത് വന്നിരിക്കുകയാണ് നടിയുടെ സഹോദരൻ രാജേഷ് ബി. മേനോൻ.

രാജേഷിന്റെ ഫേസ്‌ബുക്ക് പോസ്റ്റ് വായിക്കാം

സുഹൃത്തുക്കളേ ...
ഇന്നത്തെ സാഹചര്യത്തിൽ പ്രത്യക്ഷമായും പരോക്ഷമായും നിരവധിപേരുടെ ചോദ്യങ്ങളും കണ്ടെത്തലുകളും ആകുലതകളും ഞങ്ങളിലേക്ക് വന്നുകൊണ്ടിരിക്കുകയാണ് . അതിൽ ആദ്യത്തേത് ഈ കേസിൽ നിന്നും പിന്മാറുമോ എന്നുള്ളതാണ് . ഇതുനുത്തരം ഞാൻ മുൻപേ പറഞ്ഞത് തന്നെയാണ് . പിന്മാറാനായിരുന്നെങ്കിൽ ഒരിക്കലും മുന്നോട്ടു വരുമായിരുന്നില്ല . മറ്റൊന്ന് കേസിന്റെ ഗതിവിഗതികളിൽ ഇപ്പോൾ സംതൃപ്തരാണോ അതോ അന്വേഷണം സിബിഐ ക്ക് വിടുന്നുണ്ടോ എന്നതാണ്.

കേരള മുഖ്യമന്ത്രിയുടെ നീതിയുക്തവും ധീരവുമായ നിലപാടിലും കേരള പൊലീസിന്റെ ഇതുവരെയുള്ള സത്യസന്ധമായ അന്വേഷണത്തിലും ഞങ്ങൾ പരിപൂർണ്ണ സംതൃപതരാണ് . അന്വേഷണം അതിന്റെ കൃത്യമായ വഴികളിലൂടെ തന്നെയാണ് പോയ്‌ക്കൊണ്ടിരിക്കുന്നത് എന്ന് ഞങ്ങൾ ഉറച്ചു വിശ്വസിക്കുന്നു . അതുകൊണ്ട് തന്നെ കേരള പൊലീസിൽ നിന്നും അന്വേഷണം സിബിഐ യിലേക്ക് മാറ്റുന്നതിന് ഞങ്ങൾ ആഗ്രഹിക്കുന്നുമില്ല , അതിന് തയ്യാറുമല്ല . ഞാൻ നേരിൽ അറിയുന്നതും അറിയാത്തതുമായ നിങ്ങൾ സുഹൃത്തുക്കളാണ് എന്റെയും എന്റെ കുടുംബത്തിന്റേയും പിൻബലം . നീതിക്കു വേണ്ടിയുള്ള ഈ പോരാട്ടത്തിൽ ഞങ്ങളുടെ കൂടെ എന്നുമുണ്ടായിരിക്കണം .
സ്‌നേഹപൂർവ്വം
രാജേഷ് ബി മേനോൻ