ന്യൂയോർക്ക്: ഫേസ്‌ബുക്കിന്റെ 18 വർഷ ചരിത്രത്തിൽ ഇതാദ്യമായി ഉപയോക്താക്കളുടെ എണ്ണത്തിൽ ഇടിവ്. ഇതോടെ സോഷ്യൽ മീഡിയ വമ്പന്റെ മാതൃകമ്പനിയായ മെറ്റാ പ്ലാറ്റ്ഫോംസിന്റെ ഓഹരി വില കുത്തനെ കുറഞ്ഞു. മെറ്റാ പ്ലാറ്റ്ഫോംസിന്റെ ഓഹരി വിലയിൽ 20 ശതമാനം ഇടിവാണ് സംഭവിച്ചത്. ഇത് കമ്പനിയുടെ മൂല്യത്തിൽ 200 ബില്യൺ ഡോളറിന്റെ കുറവുണ്ടാക്കി. ഫേസ്‌ബുക്കിന്റെ നായകൻ മാർക് സുക്കർബർഗിന് നഷ്ടമായത് കോടീശ്വരപ്പട്ടികയിലെ മുൻനിര സ്ഥാനമാണ്. തന്റെ ആസ്തിയിൽ നിന്നും 29 ബില്യൺ ഡോളർ ഒറ്റ ദിവസം കൊണ്ട് അപ്രത്യക്ഷമായി. തൊട്ടുമുൻപത്തെ ത്രൈമാസത്തിനേക്കാൾ ഫേസ്‌ബുക്കിന്റെ പ്രതിദിന ആക്ടിവ് ഉപയോക്താക്കളുടെ എണ്ണം കുറഞ്ഞതാണ് ഓഹരി വിലയെ സ്വാധീനിച്ചത്. തൊട്ടുമുൻപത്തെ ത്രൈമാസത്തിൽ ഫേസ്‌ബുക്കിന്റെ ആഗോള പ്രതിദിന ആക്ടീവ് ഉപയോക്താക്കൾ 1.930 ബില്യൺ ആയിരുന്നുവെങ്കിൽ ഇപ്പോൾ ഇത് 1.929 ബില്യൺ ആണ്.

2021ന്റെ അവസാന മൂന്ന് മാസങ്ങളിൽ ദിവസേനയുള്ള ലോഗിനുകളിൽ ഏകദേശം 500,000 കുറവുണ്ടായതായി ഫേസ്‌ബുക്ക് റിപ്പോർട്ട് ചെയ്തു. ഈ ഇടിവിന്റെ കാരണമായി മാർക് സുക്കർബർഗ് ചൂണ്ടിക്കാട്ടുന്നത് ടിക്ടോകുമായിയുള്ള മത്സരമാണ്. ആപ്പിൾ അവരുടെ ഓപ്പറേറ്റിങ് സിസ്റ്റത്തിൽ വരുത്തിയ പ്രൈവസി മാറ്റങ്ങൾ തങ്ങൾക്ക് തിരിച്ചടിയായെന്നും മെറ്റ പറയുന്നു. 18 വയസ്സുള്ള ടെക് ഭീമൻ ഇപ്പോൾ ടിക് ടോക്, ഗൂഗിളിന്റെ യുട്യൂബ് എന്നിവരിൽ നിന്ന് കനത്ത വെല്ലുവിളിയും നേരിടുകയാണ്. ഇത്തരം സോഷ്യൽ മീഡിയകളിലേക്ക് ഉപയോക്താക്കളുടെ സമയവും ശ്രദ്ധയുമെല്ലാം വീതിക്കപ്പെട്ടത് വരും ത്രൈമാസങ്ങളിൽ മെറ്റാ പ്ലാറ്റ്ഫോംസിന്റെ വരുമാനത്തെ പ്രതികൂലമായി ബാധിച്ചേക്കാം. അതേസമയം ഫേസ്‌ബുക്ക്, ഇൻസ്റ്റാഗ്രാം, വാട്ട്‌സ്ആപ്പ് എന്നിവയുടെ മാതൃകമ്പനിയായ മെറ്റ ടിക്ടോക്കുമായി മത്സരിക്കുന്നതിനായി ഹ്രസ്വ വീഡിയോ റീലുകൾ വികസിപ്പിക്കാൻ കഠിനമായി ശ്രമിക്കുന്നുണ്ടെന്ന് സുക്കർബർഗ് ആവർത്തിച്ചു.

ഉപയോക്തൃ വളർച്ച കുറയുന്നതിന്റെ സൂചനകൾ നിക്ഷേപകർ പ്രതീക്ഷിച്ചിരുന്നുവെങ്കിലും ടിക്ടോക്കിന്റെ വളർച്ചയെത്തുടർന്ന് കമ്പനിക്ക് നഷ്ടപ്പെട്ട പരസ്യ വരുമാനം അമ്പരപ്പിക്കുന്നതാണെന്ന് വിശകലന വിദഗ്ദ്ധർ പറയുന്നു. മെറ്റാ ഇൻസ്റ്റാഗ്രാമിൽ സ്വന്തം റീൽസ് ഉൽപ്പന്നം വാഗ്ദാനം ചെയ്തിട്ടും, ഹ്രസ്വ-രൂപത്തിലുള്ള ഉപയോക്തൃ-നിർമ്മിത വീഡിയോ വിപണിയിൽ ടിക് ടോക്ക് ആധിപത്യം പുലർത്തുന്നു. ബ്ലൂംബെർഗ് പറയുന്നതനുസരിച്ച്, ഫേസ്‌ബുക്കിന് ഉപഭോക്താക്കളെ നഷ്ടപ്പെടുകയും അത് ടിക് ടോക്കിന് കൂടുതൽ ഗുണം ചെയുകയും ചെയ്തു. ഹ്രസ്വ വീഡിയോകൾക്കായി ഉദ്ദേശിച്ചിട്ടുള്ള പരസ്യങ്ങളിൽ നിന്ന് ടിക് ടോക്ക് വൻ വരുമാനം നേടുകയും ചെയ്തതായി കണക്കുകൾ സൂചിപ്പിക്കുന്നു. എന്നിരുന്നാലും, പുതിയ വീഡിയോ ഫോർമാറ്റുമായി മത്സരിക്കാൻ മെറ്റ ശ്രമിക്കുന്നുവെന്നതിന്റെ ആവർത്തിച്ചുള്ള സൂചനകൾ ഉള്ളതിനാൽ, ഫേസ്‌ബുക്കിന്റെ നിക്ഷേപകർ പ്രതീക്ഷയിലാണ്.

ഏതാനും മാസങ്ങൾക്ക് മുമ്പാണ് ഇൻസ്റ്റാഗ്രാം ചീഫ് ആദം മൊസേരി, ടിക് ടോക്കിന്റെ വർദ്ധിച്ചുവരുന്ന ജനപ്രീതിയിൽ നിന്ന് പ്രചോദനം ഉൾക്കൊണ്ട് ഫോട്ടോയ്ക്ക് ഊന്നൽ നൽകുന്നതിന് പകരം വീഡിയോകളിലേക്ക് ശ്രദ്ധ കേന്ദ്രീകരിക്കാൻ തീരുമാനം എടുത്തത്. ബുധനാഴ്ച സുക്കർബർഗും ഇൻസ്റ്റാഗ്രാം റീലുകളിൽ ശ്രദ്ധ കേന്ദ്രീകരിക്കുന്നത് തുടരുമെന്ന് ആവർത്തിച്ചു. മെറ്റയുടെ ദീർഘകാല വിജയം തന്റെ മെറ്റാവേർസ് വീക്ഷണത്തെ ആശ്രയിച്ചിരിക്കുന്നു എന്നതിൽ സിഇഒ ഉറച്ചുനിൽക്കുന്നു. എന്നിരുന്നാലും, കഴിഞ്ഞ മൂന്ന് വർഷത്തിനിടെ മെറ്റാവേർസ് പ്രോജക്ടുകളിൽ കമ്പനിക്ക് 20 ബില്യൺ ഡോളറിലധികം നഷ്ടമുണ്ടായതായി കണക്കുകൾ വെളിപ്പെടുത്തുന്നു.

ദിവസേനയുള്ള ഉപയോക്താക്കളുടെ നഷ്ടം ഏറ്റവും കൂടുതലുള്ള ആഫ്രിക്കയിലും ലാറ്റിൻ അമേരിക്കയിലും ഉപഭോക്താക്കൾക്ക് ഫേസ്‌ബുക്ക് പ്ലാറ്റ്‌ഫോമിൽ താൽപ്പര്യം കുറവാണെന്നും ഡാറ്റ വെളിപ്പെടുത്തി. ഉൽപ്പന്നം ആഗോളതലത്തിൽ പൂരിതമാകാമെന്ന് ഇത് കാണിക്കുന്നുവെന്ന് ചില വിശകലന വിദഗ്ദ്ധർ ആരോപിക്കുന്നു. മെറ്റയുടെ നാലാം പാദ വരുമാന റിപ്പോർട്ടുകൾ യുഎസിലും യൂറോപ്പിലും പ്ലാറ്റ്‌ഫോമിന്റെ ഉപയോക്തൃ വളർച്ച സ്തംഭിച്ചതായി സൂചിപ്പിക്കുന്നു. ഇത് കഴിഞ്ഞ കുറച്ച് വർഷങ്ങളായി തുടരുന്ന പ്രവണതയാണ്.

മെറ്റയുടെ 2021ലെ നഷ്ടങ്ങൾക്ക് സുക്കർബർഗ് റിയാലിറ്റി ലാബിലെ നിക്ഷേപവും കാരണമാണെന്ന് വിദഗ്ദ്ധർ ചൂണ്ടിക്കാട്ടുന്നു. നിലവിലെ പ്രവണതകൾ തുടരുകയാണെങ്കിൽ ഈ വർഷം ചെലവ് വർദ്ധിക്കും. റിയാലിറ്റി ലാബിലെ നിക്ഷേപം ഇല്ലായിരുന്നുവെങ്കിൽ 2021-ലെ മെറ്റയുടെ മൊത്തത്തിലുള്ള ലാഭം 56 ബില്യൺ ഡോളറിൽ കൂടുതലാകുമായിരുന്നുവെന്നും വിശകലന വിദഗ്ദ്ധർ ആരോപിക്കുന്നു.

അതേസമയം, ആപ്പിളിന്റെ ഐഒഎസിലെ സ്വകാര്യത മാറ്റങ്ങളും സാമ്പത്തിക വെല്ലുവിളികളും ഉൾപ്പെടെയുള്ള മറ്റ് ഘടകങ്ങളും മെറ്റയുടെ തിരിച്ചടിക്ക് കാരണമായതായി കമ്പനി പറയുന്നു. പണപ്പെരുപ്പവും പരസ്യദാതാക്കളുടെ ബജറ്റിനെ ബാധിക്കുന്ന വിതരണ ശൃംഖല പ്രശ്നങ്ങളും പ്രതീക്ഷിച്ചതിലും നിരാശയുണ്ടാക്കി. പ്രധാന ന്യൂസ് ഫീഡുകൾ ചെയ്യുന്നതുപോലെ വരുമാനം ഉണ്ടാക്കാത്ത ഉൽപ്പന്നങ്ങളായ റീൽസ് വീഡിയോകൾ പോലുള്ളവയിലേക്ക് ഉപയോക്തൃ താൽപ്പര്യം വർധിച്ചിട്ടുണ്ടെന്നും മെറ്റ പറഞ്ഞു.

എല്ലാത്തിനും പുറമെ, മെറ്റയ്ക്കെതിരെ അടുത്തിടെ ഉണ്ടായ ആരോപണങ്ങളും നിയമക്കുരുക്കുകളും കമ്പനിയെ പ്രതികൂലമായി ബാധിച്ചിട്ടുണ്ട്.തന്റെ മകളെ അക്രമാസക്തയായ ഒരു സെൽഫോൺ അഡിക്റ്റാക്കി മാറ്റിയതിനും ഗുരുതരമായ ആരോഗ്യപ്രശ്നങ്ങൾ സൃഷ്ടിച്ചതിനും രണ്ടാഴ്ച മുമ്പ് മെറ്റയ്‌ക്കെതിരെ ഒരു സ്ത്രീ കേസ് ഫയൽ ചെയ്തിരുന്നു. 2020 മാർച്ചിൽ മകളുടെ 14-ാം ജന്മദിനത്തിന് ഒരു സ്മാർട്ട്‌ഫോൺ വാങ്ങുന്നതുവരെ എല്ലാം ശാന്തമായിരുന്നു. അതിനുശേഷം എല്ലാം തകിടംമറിഞ്ഞു. സോഷ്യൽ മീഡിയ വിക്ടിംസ് ലോ സെന്ററിന്റെ സഹായത്തോടെ സ്‌നാപ്ചാറ്റിന്റെയും ഇൻസ്റ്റാഗ്രാമിന്റെയും മാതൃ കമ്പനികൾക്കെതിരെ ഡോഫിങ് കേസെടുക്കുന്നു. ജനുവരി 20ന് ഒറിഗോണിലെ യുഎസ് ഡിസ്ട്രിക്റ്റ് കോടതിയിലാണ് കേസ് ഫയൽ ചെയ്തത്.

വാൾസ്ട്രീറ്റ് ജേർണലിലെ ഗവേഷണം വെളിപ്പെടുത്തിയതിനനുസരിച്ച് ഇൻസ്റ്റാഗ്രാം ചെറുപ്പക്കാരായ പെൺകുട്ടികളുടെ ശരീരത്തെ ദോഷകരമായി ബാധിക്കുമെന്ന് ഫേസ്‌ബുക്കിന് മുന്നറിയിപ്പ് നൽകിയിട്ടുണ്ട്. ആത്മഹത്യാ പ്രവണതയുള്ള കൗമാരക്കാരിൽ 13 ശതമാനം ബ്രിട്ടീഷ് ഉപയോക്താക്കളും 6 ശതമാനം അമേരിക്കൻ ഉപയോക്താക്കളും അവരുടെ ആത്മഹത്യാ വികാരങ്ങൾ ഇൻസ്റ്റാഗ്രാമിൽ കണ്ടെത്തിയതായി റിപ്പോർട്ട് പറയുന്നു.

ഡോഫിംഗിന്റെ ഉൽപ്പന്ന ബാധ്യതാ വ്യവഹാരം പ്രകാരമാണ് കേസ് നൽകിയിരിക്കുന്നത്. അവരുടെ ഉൽപ്പന്നങ്ങൾ ഉദ്ദേശിച്ച രീതിയിൽ ഉപയോഗിക്കുമ്പോൾ അപകടകരമാണെന്ന് അറിയുകയും അതിന്റെ അനന്തരഫലങ്ങളെക്കുറിച്ച് ഉപയോക്താക്കൾക്ക് മുന്നറിയിപ്പ് നൽകുന്നതിൽ പരാജയപ്പെടുകയും ചെയ്യ്തു. അജ്ഞാതരും പ്രായമായവരുമായ ഉപയോക്താക്കൾ കുട്ടികളെ ആപ്പുകളിൽ ബന്ധപ്പെടുന്നതിൽ നിന്ന് തടയുന്നതിൽ പരാജയപ്പെട്ടതായും മകളെ ലൈംഗിക ചൂഷണത്തിന് വിധേയമാകാൻ സോഷ്യൽ മീഡിയ കമ്പനികൾ സൗകര്യമൊരുക്കിയതായും ഡോഫിങ് ആരോപിക്കുന്നു. ഇതും മെറ്റയുടെ തകർച്ചക്ക് ആക്കം കൂട്ടിയ പ്രധാന ഘടകമാണ്.

മറുനാടന്‍ ഡെസ്‌ക്‌

    മറുനാടന്‍ ഡെസ്‌ക്‌