പ്രമുഖ മോട്ടോർസൈക്കിൾ നിർമ്മാതാക്കളായ ബ്രിക്സ്റ്റണിന്റെ പുതിയ അഡ്വഞ്ചർ ടൂറർ ബൈക്ക്, ക്രോസ്ഫയർ 500 സ്റ്റോർ, 2025ൽ ഇന്ത്യയിൽ അവതരിപ്പിക്കാനൊരുങ്ങുന്നു. അടുത്തിടെ ഈ ബൈക്ക് രാജ്യത്ത് പരീക്ഷണയോട്ടം നടത്തുന്നതായി കണ്ടിരുന്നു. കഴിഞ്ഞ വർഷം ഇറ്റലിയിലെ മിലാനിൽ നടന്ന EICMA മോട്ടോർ ഷോയിലാണ് ഈ മോഡൽ ആദ്യമായി ലോകത്തിന് മുന്നിൽ അവതരിപ്പിച്ചത്. ഓഫ്-റോഡ് യാത്രകളെയും ദീർഘദൂര സഞ്ചാരങ്ങളെയും സ്നേഹിക്കുന്നവരെ ലക്ഷ്യമിട്ടാണ് ബൈക്ക് രൂപകൽപ്പന ചെയ്തിരിക്കുന്നത്.

ശക്തമായ ട്യൂബുലാർ സ്റ്റീൽ ഫ്രെയിമിൽ നിർമ്മിച്ചിരിക്കുന്ന ക്രോസ്ഫയർ 500 സ്റ്റോറിന് 19 ഇഞ്ച് മുൻ ടയറും 17 ഇഞ്ച് പിൻ ടയറും ഉണ്ട്. വിവിധ റോഡ് സാഹചര്യങ്ങളിലും ഓഫ്-റോഡുകളിലും മികച്ച പ്രകടനം വാഗ്ദാനം ചെയ്യുന്ന പിറെല്ലി സ്കോർപിയോൺ റാലി STR ടയറുകളാണ് ഇതിൽ ഉപയോഗിച്ചിരിക്കുന്നത്. അപ്‌സൈഡ്-ഡൗൺ ഫ്രണ്ട് ഫോർക്കുകളും ലിങ്ക്ഡ് റിയർ മോണോഷോക്കുമാണ് സസ്പെൻഷൻ സംവിധാനം. ഈ സജ്ജീകരണം ബൈക്കിന് മികച്ച ബാലൻസും ദുർഘടമായ പാതകളിൽ സ്ഥിരതയും നൽകുമെന്ന് പ്രതീക്ഷിക്കുന്നു. ഇതിന്റെ കരുത്തുറ്റ ഫ്രെയിം, വിശാലമായ ടയറുകൾ, ഉയർന്ന നിലവാരമുള്ള സസ്പെൻഷൻ എന്നിവ ദീർഘദൂര യാത്രകൾക്ക് ഏറെ അനുയോജ്യമാക്കുന്നു.

ഇന്ത്യൻ വിപണിയിൽ ബെനെല്ലി TRK 502, BMW F450GS തുടങ്ങിയ പ്രീമിയം അഡ്വഞ്ചർ ബൈക്കുകളുമായി ക്രോസ്ഫയർ 500 സ്റ്റോറിന് ശക്തമായ മത്സരം നേരിടേണ്ടി വരും. രാജ്യത്ത് അഡ്വഞ്ചർ ബൈക്കുകൾക്കുള്ള ആവശ്യകത വർദ്ധിച്ചു വരുന്ന സാഹചര്യത്തിൽ, ബ്രിക്സ്റ്റണിന്റെ പുതിയ മോഡലിന് വിപണിയിൽ മികച്ച സ്വീകാര്യത ലഭിക്കുമെന്നാണ് വിലയിരുത്തൽ.

അഡ്വഞ്ചർ ടൂറർ ബൈക്ക്

സ്വന്തം ലേഖകൻ