'സിമ്പിൾ ലുക്ക്..'; വീണ്ടുമൊരു ഐക്കണിക് മോഡലുമായി ആ ഇറ്റാലിയൻ കമ്പനി; ഡ്യുക്കാട്ടി സ്‌ക്രാംബ്ലർ റിസോമ എഡിഷൻ ലോഞ്ച് ചെയ്തു; സവിശേഷതകൾ അറിയാം..
പ്രമുഖ ഇരുചക്ര വാഹന നിർമ്മാതാക്കളായ ഡ്യുക്കാട്ടി, തങ്ങളുടെ ഐക്കണിക് സ്‌ക്രാംബ്ലർ ശ്രേണിയുടെ പത്താം വാർഷികം ആഘോഷിക്കുന്നതിനായി പുതിയ 'സ്‌ക്രാംബ്ലർ 10-ാം വാർഷിക റിസോമ എഡിഷൻ' മോട്ടോർസൈക്കിൾ പുറത്തിറക്കി. 17.10 ലക്ഷം രൂപയാണ് ഇതിന്റെ എക്സ്-ഷോറൂം വില. ലോകമെമ്പാടും വെറും 500 യൂണിറ്റുകൾ മാത്രമാണ് ഈ ലിമിറ്റഡ് എഡിഷൻ ലഭ്യമാകൂ.
ഇറ്റലിയിലെ പ്രമുഖ കസ്റ്റം ബ്രാൻഡായ റിസോമയുമായി സഹകരിച്ചാണ് ഈ മോഡൽ വികസിപ്പിച്ചിരിക്കുന്നത്. ഫാക്ടറിയിൽ നിന്നുതന്നെ ഒരുക്കുന്ന പ്രത്യേക ഡിസൈൻ ഘടകങ്ങൾ ഇതിൽ ഉൾക്കൊള്ളിച്ചിട്ടുണ്ട്. സ്റ്റോൺ വൈറ്റ് നിറത്തിലുള്ള ടാങ്ക്, കറുപ്പ് നിറത്തിലുള്ള ഫ്രെയിം, മെറ്റൽ റോസ് നിറത്തിലുള്ള വിശദാംശങ്ങൾ എന്നിവ ഈ ബൈക്കിനെ ആകർഷകമാക്കുന്നു. ബാർ-എൻഡ് മിററുകൾ, കോംപാക്റ്റ് എക്‌സ്‌ഹോസ്റ്റ് ഡിസൈൻ, റിസോമ ബ്രാൻഡഡ് ഫുട്‌പെഗ്, കവറുകൾ എന്നിവ ക്ലാസിക്-ആധുനിക ലുക്ക് നൽകുന്നു.
ഈ പുതിയ പതിപ്പിൽ 803 സിസി ഡെസ്‌മോഡ്യൂ എയർ-കൂൾഡ് ട്വിൻ എഞ്ചിനാണ് ഉപയോഗിച്ചിരിക്കുന്നത്. റൈഡ്-ബൈ-വയർ സാങ്കേതികവിദ്യ ഉപയോഗിച്ച് മെച്ചപ്പെടുത്തിയ ഈ എഞ്ചിൻ 72 bhp കരുത്ത് ഉത്പാദിപ്പിക്കുന്നു. അപ്/ഡൗൺ ക്വിക്ക്ഷിഫ്റ്റർ, റൈഡ് മോഡുകൾ, 4.3 ഇഞ്ച് ടിഎഫ്‍ടി ഡിസ്‌പ്ലേ എന്നിവയും ഇതിലുണ്ട്. നഗര യാത്രകളിലും ഹൈവേകളിലും സുഗമവും നിയന്ത്രിതവുമായ റൈഡിംഗ് അനുഭവം ഇത് വാഗ്ദാനം ചെയ്യുന്നു. E20 ഇന്ധനത്തിന് അനുയോജ്യമായതിനാൽ, ഇന്ത്യയിലെ വരാനിരിക്കുന്ന ഇന്ധന മാനദണ്ഡങ്ങൾക്കും ഈ ബൈക്ക് തയ്യാറാണ്.
ലോക വിപണിയിൽ 500 യൂണിറ്റുകൾ മാത്രമായി പരിമിതപ്പെടുത്തിയ ഈ പുതിയ ഡ്യുക്കാട്ടി സ്‌ക്രാംബ്ലർ, കളക്ടർമാർക്കിടയിൽ ഏറെ ശ്രദ്ധ നേടും.
