ടൊയോട്ട കിർലോസ്‌കർ മോട്ടോർ (ടികെഎം) പുതിയ ഡിസൈൻ മാറ്റങ്ങളോടും മെച്ചപ്പെടുത്തിയ ഫീച്ചറുകളോടും കൂടിയ 2025 ടൊയോട്ട ഫോർച്യൂണർ ലീഡർ എഡിഷൻ അവതരിപ്പിച്ചു. വാഹനം ബുക്ക് ചെയ്യുന്നതിനുള്ള നടപടികൾ ഒക്ടോബർ രണ്ടാം വാരം മുതൽ ആരംഭിക്കും. ഉപഭോക്താക്കൾക്ക് ടൊയോട്ടയുടെ ഔദ്യോഗിക വെബ്സൈറ്റ് വഴിയോ അംഗീകൃത ഡീലർഷിപ്പുകൾ വഴിയോ ഓൺലൈനായി മുൻകൂട്ടി ബുക്ക് ചെയ്യാവുന്നതാണ്.

പേൾ വൈറ്റ്, ആറ്റിറ്റ്യൂഡ് ബ്ലാക്ക്, സിൽവർ, സുപ്പീരിയർ വൈറ്റ് എന്നിങ്ങനെ നാല് ആകർഷകമായ നിറങ്ങളിലാണ് 2025 ഫോർച്യൂണർ ലീഡർ എഡിഷൻ ലഭ്യമാകുന്നത്. പുതുതായി രൂപകൽപ്പന ചെയ്ത ഗ്രില്ല്, ഫ്രണ്ട്, റിയർ ബമ്പർ സ്പോയിലറുകൾ, ക്രോം അലങ്കാരങ്ങൾ എന്നിവ വാഹനത്തിന്റെ മുൻഭാഗത്തിന് സ്പോർട്ടി ഭംഗി നൽകുന്നു. ഡ്യുവൽ-ടോൺ റൂഫ്, തിളങ്ങുന്ന കറുപ്പ് നിറത്തിലുള്ള അലോയ് വീലുകൾ, ഹുഡിലെ പ്രത്യേക എംബ്ലം എന്നിവ വാഹനത്തിന്റെ മൊത്തത്തിലുള്ള ആകർഷണീയത വർദ്ധിപ്പിക്കുന്നു.

ഇന്റീരിയറിൽ കറുപ്പ്, മാറോൺ നിറങ്ങളിലുള്ള ഡ്യുവൽ-ടോൺ സീറ്റുകളും ഡോർ ട്രിമ്മുകളും പുതിയതായി ഉൾപ്പെടുത്തിയിട്ടുണ്ട്. ഓട്ടോ ഫോൾഡിംഗ് മിററുകൾ, ഇലുമിനേറ്റഡ് സ്കഫ് പ്ലേറ്റ്, ടയർ പ്രഷർ മോണിറ്ററിംഗ് സിസ്റ്റം (TPMS) തുടങ്ങിയ സൗകര്യങ്ങളും ലഭ്യമാണ്.

വാഹനത്തിൽ നിലവിലെ ഫോർച്യൂണർ മോഡലുകളിൽ ഉപയോഗിക്കുന്ന 2.8 ലിറ്റർ, നാല് സിലിണ്ടർ ടർബോ-ഡീസൽ എഞ്ചിൻ തന്നെയാണ് ഉപയോഗിക്കുന്നത്. ഈ എഞ്ചിൻ 201 bhp കരുത്തും 500 Nm ടോർക്കും നൽകുന്നു. 6-സ്പീഡ് മാനുവൽ, 6-സ്പീഡ് ഓട്ടോമാറ്റിക് ട്രാൻസ്മിഷൻ ഓപ്ഷനുകൾ ലഭ്യമാണ്. ഓഫ്-റോഡ് ശേഷിയെക്കാൾ ദൈനംദിന ഉപയോഗക്ഷമതയ്ക്കും സുഖസൗകര്യങ്ങൾക്കും പ്രാധാന്യം നൽകുന്ന ഉപഭോക്താക്കളെ ലക്ഷ്യമിട്ട് റിയർ-വീൽ-ഡ്രൈവ് (4x2) കോൺഫിഗറേഷനിലാണ് ഈ പതിപ്പ് എത്തുന്നത്.

ഉടമസ്ഥാവകാശ അനുഭവം കൂടുതൽ മെച്ചപ്പെടുത്തുന്നതിനായി, വിപുലമായ ഉടമസ്ഥാവകാശ ആനുകൂല്യങ്ങളും ടൊയോട്ട വാഗ്ദാനം ചെയ്യുന്നു. എട്ട് വർഷം വരെയുള്ള ഫണ്ടിംഗ് ഓപ്ഷനുകൾ, ടൊയോട്ട സ്മാർട്ട് ബലൂൺ ഫിനാൻസ്, എക്സ്റ്റൻഡഡ് വാറന്റി പാക്കേജുകൾ എന്നിവ തിരഞ്ഞെടുക്കാം.

ഫോർച്യൂണർലീഡർ എഡിഷൻഅവതരിപ്പിച്ചു

സ്വന്തം ലേഖകൻ