കേന്ദ്ര സർക്കാരിന്റെ പുതിയ ജിഎസ്ടി പരിഷ്കരണങ്ങളെ തുടർന്ന് ഹോണ്ട മോട്ടോർസൈക്കിൾസ് ആൻഡ് സ്കൂട്ടേഴ്സ് ഇന്ത്യ തങ്ങളുടെ ഉൽപ്പന്നങ്ങൾക്ക് ഗണ്യമായ വിലക്കുറവ് പ്രഖ്യാപിച്ചു. 2025 സെപ്റ്റംബർ 22 മുതൽ പ്രാബല്യത്തിൽ വരുന്ന ഈ മാറ്റങ്ങൾ പ്രകാരം, 350 സിസിയിൽ താഴെയുള്ള എല്ലാ ഹോണ്ട സ്കൂട്ടറുകൾക്കും ബൈക്കുകൾക്കും 18,887 രൂപ വരെ വിലക്കുറവ് ലഭിക്കും.

പുതിയ നികുതി ഘടന അനുസരിച്ച്, 350 സിസിയിൽ താഴെയുള്ള ഇരുചക്ര വാഹനങ്ങൾക്ക് നിലവിൽ 18 ശതമാനം ജിഎസ്ടി നിരക്ക് ഏർപ്പെടുത്തിയിട്ടുണ്ട്, ഇത് മുൻപ് 28 ശതമാനമായിരുന്നു. ഈ ഇളവ് ഹോണ്ടയുടെ ജനപ്രിയ മോഡലുകളായ ആക്ടിവ, ഷൈൻ 125, യൂണികോൺ, സിഡി 350 എന്നിവയെ നേരിട്ട് ബാധിക്കും. എന്നാൽ, 350 സിസിക്ക് മുകളിലുള്ള ഇരുചക്ര വാഹനങ്ങൾക്ക് നികുതി മുൻപുണ്ടായിരുന്ന 31 ശതമാനത്തിൽ നിന്ന് 40 ശതമാനമായി വർദ്ധിപ്പിച്ചിട്ടുണ്ട്.

വിലക്കുറവിൽ ഏറ്റവും കൂടുതൽ പ്രയോജനം ലഭിക്കുന്നത് ഹോണ്ടയുടെ ഏറ്റവും കൂടുതൽ വിറ്റഴിക്കപ്പെടുന്ന മോഡലുകൾക്കാണ്. ആക്ടിവ 110-ന് 7,874 രൂപ വരെയും, ആക്ടിവ 125-ന് 8,359 രൂപ വരെയും വിലക്കുറവ് പ്രതീക്ഷിക്കാം. ഹോണ്ട ഡിയോ 110, 125 എന്നിവയുടെ വില യഥാക്രമം 7,157 രൂപയും 8,042 രൂപയും കുറയും. ഷൈൻ 100, ഷൈൻ 125 എന്നിവയ്ക്ക് യഥാക്രമം 5,672 രൂപയും 7,443 രൂപയും വിലക്കുറവുണ്ട്. പുതുതായി പുറത്തിറക്കിയ ഷൈൻ 100 DX 6,256 രൂപയുടെ വിലക്കുറവോടെ ലഭിക്കും.

ഇവ കൂടാതെ, ഹോണ്ട ലിവോ 110 (7,165 രൂപ വരെ), ഹോണ്ട യൂണികോൺ (9,948 രൂപ വരെ), ഹോണ്ട SP125 (10,635 രൂപ വരെ), ഹോണ്ട SP160 (8,447 രൂപ വരെ), ഹോണ്ട CB125 ഹോർണറ്റ് (9,229 രൂപ), ഹോണറ്റ് 2.0 (13,036 രൂപ വരെ), ഹോണ്ട NX200 (13,978 രൂപ വരെ) എന്നിവക്കും വിലക്കുറവുണ്ട്. പ്രീമിയം മോഡലുകളായ CB350 H'ness, CB350RS, CB350 എന്നിവയ്ക്ക് യഥാക്രമം 18,598 രൂപ, 18,857 രൂപ, 18,887 രൂപ എന്നിങ്ങനെയാണ് വിലക്കുറവ്.

ഹോണ്ടവിലക്കുറവ്

സ്വന്തം ലേഖകൻ