ടോക്കിയോ: ജാപ്പനീസ് ഇരുചക്ര വാഹന നിർമ്മാതാക്കളായ കാവസാക്കി, 2026 മോഡൽ വർഷത്തിലേക്ക് എൻട്രി-ലെവൽ സ്പോർട്സ് ബൈക്കുകളായ നിൻജ 250, Z250 എന്നിവയെ വിപണിയിലെത്തിച്ചു. സാങ്കേതികപരമായി കാര്യമായ മാറ്റങ്ങളൊന്നും വരുത്തിയിട്ടില്ലെങ്കിലും, ആകർഷകമായ പുതിയ ഡ്യുവൽ-ടോൺ കളർ ഓപ്ഷനുകളും ഗ്രാഫിക്സുകളുമാണ് ഈ മോഡലുകളുടെ പ്രധാന ആകർഷണം. 2025 നവംബർ മുതൽ ജാപ്പനീസ് വിപണിയിൽ ഈ ബൈക്കുകൾ ലഭ്യമായിത്തുടങ്ങും.

പുതിയ നിൻജ 250 മോഡലിന് ജപ്പാനിൽ 726,000 യെൻ (ഏകദേശം 4.37 ലക്ഷം ഇന്ത്യൻ രൂപ) ആണ് വില. മെറ്റാലിക് കാർബൺ ഗ്രേയും കാൻഡി പെർസിമോൺ റെഡും ചേർന്ന ഗാലക്സി സിൽവർ എന്നീ ഡ്യുവൽ-ടോൺ നിറങ്ങളിലാണ് ഇത് ലഭ്യമാകുന്നത്. അതേസമയം, Z250 മോഡലിന് 704,000 യെൻ (ഏകദേശം 4.24 ലക്ഷം ഇന്ത്യൻ രൂപ) ആണ് വില. എബോണി വിത്ത് മെറ്റാലിക് കാർബൺ ഗ്രേ എന്ന ഒരൊറ്റ കളർ ഓപ്ഷനിലാണ് Z250 വിപണിയിലെത്തുന്നത്. മുമ്പത്തെ മോഡലുകളിൽ നിന്ന് വ്യത്യസ്തമായി ഹെഡ്‌ലാമ്പ് കൗൾ, ഫ്യുവൽ ടാങ്ക്, ഷ്രൗഡ്, മെയിൻ ഫ്രെയിം, ടെയിൽ കൗൾ എന്നിവിടങ്ങളിൽ സൂക്ഷ്മമായ കളർ മാറ്റങ്ങളും പുതിയ ഗ്രാഫിക്സുകളും ഉൾപ്പെടുത്തിയിട്ടുണ്ട്.

248 സിസി, ലിക്വിഡ്-കൂൾഡ്, പാരലൽ-ട്വിൻ എഞ്ചിനാണ് ഇരു ബൈക്കുകൾക്കും കരുത്തേകുന്നത്. ഇത് 34.5 bhp കരുത്തും 22 Nm ടോർക്കും ഉത്പാദിപ്പിക്കുന്നു. 6 സ്പീഡ് ഗിയർബോക്സാണ് എഞ്ചിനുമായി ബന്ധിപ്പിച്ചിരിക്കുന്നത്. 17 ഇഞ്ച് അലോയ് വീലുകൾ, മുൻവശത്ത് ടെലിസ്കോപ്പിക് ഫോർക്കുകൾ, പിൻവശത്ത് മോണോഷോക്ക് സസ്പെൻഷൻ എന്നിവയുണ്ട്. 310 എംഎം ഡിസ്ക് ബ്രേക്ക് മുന്നിലും 220 എംഎം ഡിസ്ക് ബ്രേക്ക് പിന്നിലും നൽകിയിരിക്കുന്നു. 14 ലിറ്റർ ഇന്ധന ടാങ്കും 145 എംഎം ഗ്രൗണ്ട് ക്ലിയറൻസും സവിശേഷതകളിൽ ഉൾപ്പെടുന്നു.

ഇന്ത്യൻ വിപണിയിൽ കാവസാക്കി ഈ പുതിയ മോഡലുകൾ അവതരിപ്പിക്കുമോ എന്ന കാര്യത്തിൽ വ്യക്തത വന്നിട്ടില്ല. നിലവിൽ, കാവസാക്കി ഇന്ത്യയിൽ വിൽക്കുന്ന നിൻജ 300, രാജ്യത്തെ ഏറ്റവും താങ്ങാനാവുന്ന ഇരട്ട സിലിണ്ടർ ബൈക്കുകളിലൊന്നാണ്. കളർ അപ്ഡേറ്റുകളിലൂടെ ബൈക്കുകളുടെ രൂപഭംഗി വർദ്ധിപ്പിച്ചിരിക്കുന്നത് ഉപഭോക്താക്കളെ ആകർഷിക്കാൻ സഹായിച്ചേക്കും.

കാവസാക്കിപുത്തൻ മോഡൽ

സ്വന്തം ലേഖകൻ