പ്രമുഖ മോട്ടോർസൈക്കിൾ നിർമ്മാതാക്കളായ കെടിഎം ഇന്ത്യ, തങ്ങളുടെ ഏറ്റവും പുതിയതും ഏറ്റവും ചെറിയതുമായ സ്പോർട്സ് ബൈക്കായ ആർസി 160 ഇന്ത്യയിൽ പുറത്തിറക്കി. 1.85 ലക്ഷം രൂപയാണ് ഈ മോഡലിന്റെ എക്‌സ്-ഷോറൂം വില. 160 ഡ്യൂക്കിന്റെ ടോപ്പ്-എൻഡ് ടിഎഫ്ടി വേരിയന്റിനേക്കാൾ 6,000 രൂപ കൂടുതലാണ് ആർസി 160-ന് എന്നതും ശ്രദ്ധേയമാണ്.

ആർസി 200, ആർസി 390 എന്നിവയുടെ അതേ രൂപകൽപ്പനയും മിക്ക ഹാർഡ്‌വെയറുകളും ആർസി 160-ലും ഉപയോഗിച്ചിട്ടുണ്ട്. ഇത് ഒരു ചെറിയ എഞ്ചിൻ ബൈക്കാണെങ്കിലും, വലിയ ബൈക്കിന്റെ യാത്രാനുഭവമാണ് വാഗ്ദാനം ചെയ്യുന്നത്. 37 എംഎം ഇൻവേർഡഡ് ഫ്രണ്ട് ഫോർക്കുകളും റിയർ മോണോഷോക്കും ഇതിൽ സജ്ജീകരിച്ചിരിക്കുന്നു. 17 ഇഞ്ച് അലോയ് വീലുകളിലാണ് ബൈക്ക് ഓടുന്നത്.

സുരക്ഷയ്ക്കായി, 320 എംഎം ഫ്രണ്ട് ഡിസ്‌കും 230 എംഎം റിയർ ഡിസ്‌കും ഡ്യുവൽ-ചാനൽ എബിഎസുമായി (ആന്റി-ലോക്ക് ബ്രേക്കിങ് സിസ്റ്റം) ചേർന്നാണ് പ്രവർത്തിക്കുന്നത്. സൂപ്പർമോട്ടോ മോഡുള്ള ഡ്യുവൽ-ചാനൽ എബിഎസ് ആണ് ഇതിന്റെ സാങ്കേതിക സവിശേഷതകളിൽ ഒന്ന്. 13.75 ലിറ്റർ മെറ്റൽ ഫ്യുവൽ ടാങ്ക്, ക്ലിപ്പ്-ഓൺ ഹാൻഡിൽബാർ, എൽസിഡി ഇൻസ്ട്രുമെന്റ് ക്ലസ്റ്റർ, പൂർണ്ണ എൽഇഡി ലൈറ്റിംഗ് എന്നിവയാണ് മറ്റ് പ്രധാന സവിശേഷതകൾ. അസിസ്റ്റ്, സ്ലിപ്പർ ക്ലച്ച് എന്നിവയും ഇതിലുണ്ട്. ടിഎ വേരിയന്റിൽ നാവിഗേഷൻ സപ്പോർട്ടും ലഭ്യമാണ്.

164.2 സിസി, ലിക്വിഡ്-കൂൾഡ്, എസ്ഒഎച്ച്സി എഞ്ചിനാണ് ആർസി 160-ന് കരുത്തുപകരുന്നത്. ഈ എഞ്ചിൻ 9,500rpm-ൽ 18.73bhp ശക്തിയും 7,500rpm-ൽ 15.5Nm ടോർക്കും ഉത്പാദിപ്പിക്കുന്നു. 6-സ്പീഡ് ഗിയർബോക്‌സുമായി ജോടിയാക്കിയിട്ടുള്ള ഈ എഞ്ചിൻ, മണിക്കൂറിൽ 118 കിലോമീറ്റർ വേഗതയിൽ സഞ്ചരിക്കാൻ ബൈക്കിനെ സഹായിക്കുന്നു. ചെറിയ സ്പോർട്സ് ബൈക്ക് വിഭാഗത്തിൽ കെടിഎമ്മിന്റെ ഈ പുതിയ മോഡൽ ശ്രദ്ധേയമായ മത്സരം കാഴ്ചവെക്കുമെന്നാണ് പ്രതീക്ഷിക്കുന്നത്.

കെടിഎംസ്പോർട്സ് ബൈക്ക്വിപണിയിൽ

സ്വന്തം ലേഖകൻ