ഇനി രാജാവിന്റെ വരവാണ്..; പുതിയ മഹീന്ദ്ര 'ഥാർ' ഇറങ്ങാൻ മാസങ്ങൾ മാത്രം; സവിശേഷതകൾ അറിയാം..
മഹീന്ദ്ര ആൻഡ് മഹീന്ദ്രയുടെ ജനപ്രിയ ഓഫ്-റോഡ് എസ്‌യുവി ആയ ഥാറിന്റെ പരിഷ്കരിച്ച പതിപ്പ് വിപണിയിലെത്തിക്കാൻ ഒരുങ്ങുന്നു. പുതിയ 2025 മഹീന്ദ്ര ഥാർ ഫെയ്‌സ്‌ലിഫ്റ്റ് അടുത്തിടെ പരീക്ഷണയോട്ടത്തിനിടെ ക്യാമറകളിൽ പതിഞ്ഞിരുന്നു. വരും മാസങ്ങളിൽ പുറത്തിറങ്ങുമെന്ന് പ്രതീക്ഷിക്കുന്ന പുതിയ ഥാറിൽ നിരവധി പ്രധാന മാറ്റങ്ങൾ ഉൾപ്പെടുത്തിയിട്ടുണ്ട്.
പുതിയ ഥാറിന്റെ പുറംഭാഗത്ത് ഇരട്ട-സ്റ്റാക്ക്ഡ് സ്ലോട്ടുകളുള്ള ഗ്രില്ലും, ഹെഡ്‌ലാമ്പുകളിലും ടെയിൽ ലാമ്പുകളിലും സി-ആകൃതിയിലുള്ള എൽഇഡി സിഗ്നേച്ചറുകളും പ്രതീക്ഷിക്കുന്നു. പുതുതായി രൂപകൽപ്പന ചെയ്ത അലോയ് വീലുകൾ ഉയർന്ന ട്രിമ്മുകളിൽ ലഭ്യമായേക്കാം. നിലവിലുള്ള ഹൈഡ്രോളിക് പവർ സ്റ്റിയറിംഗിന് പകരം പുതിയ ത്രീ-സ്പോക്ക് ഇലക്ട്രിക് പവർ സ്റ്റിയറിംഗ് സംവിധാനം ഉൾക്കൊള്ളുമെന്നാണ് സൂചന.
ഇന്റീരിയറിൽ വലിയ മാറ്റങ്ങൾ പ്രതീക്ഷിക്കാം. ഥാർ റോക്‌സിൽ നിന്ന് പ്രചോദനം ഉൾക്കൊണ്ട്, 10.25 ഇഞ്ച് വലിപ്പമുള്ള പുതിയ ഇൻഫോടെയ്ൻമെന്റ് ടച്ച്‌സ്‌ക്രീൻ, വയർലെസ് ഫോൺ ചാർജർ, റിവേഴ്‌സ് പാർക്കിംഗ് ക്യാമറ, ഫ്രണ്ട് ആംറെസ്റ്റ്, ഡോർ-ഇൻലേഡ് പവർ വിൻഡോ സ്വിച്ചുകൾ, എ-പില്ലറുകളിലെ ഗ്രാബ് ഹാൻഡിലുകൾ എന്നിവയാണ് പ്രധാനമായും ഉൾപ്പെടുത്തിയിരിക്കുന്നത്.
നിലവിലുള്ള 152 bhp, 2.0 ടർബോ പെട്രോൾ, 119 bhp, 1.5L ടർബോ ഡീസൽ, 132 bhp, 2.2L ടർബോ ഡീസൽ എഞ്ചിൻ ഓപ്ഷനുകളിൽ തന്നെയായിരിക്കും പുതിയ ഥാറും വിപണിയിലെത്തുക. 6-സ്പീഡ് മാനുവൽ, 6-സ്പീഡ് ടോർക്ക് കൺവെർട്ടർ ഓട്ടോമാറ്റിക് ട്രാൻസ്മിഷൻ ഓപ്ഷനുകളും ലഭ്യമാകും.
