'ഇന്ദുചൂടൻ വന്നിരിക്കുന്നു..പുതിയ കളികൾ കാണാനും ചിലത് പഠിപ്പിക്കാനും..'; വീണ്ടും അടിമുടി മാറി മഹീന്ദ്ര 'ഥാർ'; പുതിയ രൂപം കണ്ട് അമ്പരന്ന് വാഹനപ്രേമികൾ; സവിശേഷതകൾ അറിയാം
കൊച്ചി: ജനപ്രിയ ഓഫ്-റോഡ് എസ്‌യുവി ആയ മഹീന്ദ്ര ഥാറിന്റെ പുതിയ പതിപ്പ് വൻ സജ്ജീകരണങ്ങളോടെ സെപ്റ്റംബർ അവസാനത്തോടെ വിപണിയിലെത്തും. നിലവിലെ മോഡലിനെ അപേക്ഷിച്ച് ഡിസൈനിലും ഫീച്ചറുകളിലും കാര്യമായ മാറ്റങ്ങളോടെയാണ് 2025 മോഡൽ ഥാർ എത്തുന്നത്. പരീക്ഷണയോട്ടത്തിനിടെ പുറത്തുവന്ന വിവരങ്ങൾ അനുസരിച്ച്, ഥാർ റോക്‌സിൽ നിന്ന് പ്രചോദനം ഉൾക്കൊണ്ടുള്ള മാറ്റങ്ങളാണ് വാഹനത്തിനുണ്ടാവുക.
പുതിയ ഥാറിന്റെ പ്രധാന ആകർഷണം വലിയ ടച്ച്‌സ്‌ക്രീൻ ഇൻഫോടെയ്ൻമെന്റ് സിസ്റ്റമായിരിക്കും. ADAS (Advanced Driver Assistance Systems) സാങ്കേതികവിദ്യയും വാഹനത്തിലുണ്ടാകും. 360-ഡിഗ്രി ക്യാമറ, വെന്റിലേറ്റഡ് ഫ്രണ്ട് സീറ്റുകൾ, ആംബിയന്റ് ലൈറ്റിംഗ്, വയർലെസ് ഫോൺ ചാർജർ, റിയർ ഡിസ്‌ക് ബ്രേക്കുകൾ എന്നിവയും പുതിയ മോഡലിൽ ഉൾപ്പെടുത്തിയിട്ടുണ്ട്. രൂപകൽപ്പനയിൽ ഗ്രിൽ, ബമ്പർ, ഹെഡ്‌ലാമ്പുകൾ എന്നിവയിൽ മാറ്റങ്ങൾ വരുത്തിയിട്ടുണ്ട്. പുതിയ ഡിസൈനിലുള്ള അലോയ് വീലുകളും റീഡിസൈൻ ചെയ്ത ടെയിൽ ലാമ്പുകളും വാഹനത്തിന്റെ എക്സ്റ്റീരിയറിന് പുതുമ നൽകും. പുതിയ കളർ ഓപ്ഷനുകളും പ്രതീക്ഷിക്കാം.
മെക്കാനിക്കൽ കാര്യങ്ങളിൽ നിലവിലെ മോഡലിൽ നിന്ന് കാര്യമായ മാറ്റങ്ങളുണ്ടാവില്ല. 152 bhp കരുത്ത് നൽകുന്ന 2.0 ലിറ്റർ ടർബോ പെട്രോൾ എഞ്ചിൻ, 119 bhp കരുത്ത് നൽകുന്ന 1.5 ലിറ്റർ ടർബോ ഡീസൽ എഞ്ചിൻ, 130 bhp കരുത്ത് നൽകുന്ന 2.2 ലിറ്റർ ടർബോ ഡീസൽ എഞ്ചിൻ എന്നിവ ലഭ്യമാകും. മാനുവൽ, ഓട്ടോമാറ്റിക് ട്രാൻസ്മിഷൻ ഓപ്ഷനുകളും ഉണ്ടാകും. നൂതന ഫീച്ചറുകളോടെയുള്ള ഈ പുതിയ പതിപ്പ് വിപണിയിൽ ശക്തമായ മത്സരം കാഴ്ചവെക്കുമെന്നാണ് പ്രതീക്ഷിക്കുന്നത്.
