'പുലി പോലെ വന്നവനാ..'; നേരിടാനെത്തിയത് സാക്ഷാൽ ഫോർച്യൂണറുമായി; ആശാന്റെ മോഹം പക്ഷെ നടന്നില്ല; ഒരാളുപോലും ശ്രദ്ധിക്കുന്നില്ല; നിസാന്‍റെ പുത്തൻ മോഡലിന്റെ വിൽപ്പന ദയനീയം
ജാപ്പനീസ് വാഹന നിർമ്മാതാക്കളായ നിസ്സാൻ്റെ എക്സ്-ട്രെയിൽ എസ്‌യുവിക്ക് ഇന്ത്യയിൽ വിൽപ്പന ഗണ്യമായി കുറഞ്ഞു. കഴിഞ്ഞ മൂന്ന് മാസമായി ഒരു യൂണിറ്റ് പോലും വിറ്റഴിക്കാൻ കമ്പനിക്ക് സാധിച്ചിട്ടില്ല. 2025 ജൂൺ, ജൂലൈ, ഓഗസ്റ്റ് മാസങ്ങളിൽ എക്സ്-ട്രെയിൽ വിൽപ്പന പൂജ്യമായിരുന്നു.
എട്ട് വർഷത്തെ ഇടവേളയ്ക്ക് ശേഷം 2024 സെപ്റ്റംബറിലാണ് എക്സ്-ട്രെയിൽ ഇന്ത്യൻ വിപണിയിൽ വീണ്ടും അവതരിപ്പിച്ചത്. പൂർണ്ണമായും നിർമ്മിച്ച് ഇറക്കുമതി ചെയ്യുന്ന (Completely Built-up Unit - CBU) വിഭാഗത്തിൽപ്പെട്ട ഈ വാഹനം, ഉയർന്ന വില കാരണം ഉപഭോക്താക്കൾക്കിടയിൽ വേണ്ടത്ര സ്വീകാര്യത നേടിയിട്ടില്ലെന്നാണ് വിലയിരുത്തൽ. ഈ സാഹചര്യത്തിലാണ് വിൽപ്പനയിൽ ഇത്രയും വലിയ ഇടിവുണ്ടായിരിക്കുന്നത്.
ഇന്ത്യൻ വിപണിയിൽ ടൊയോട്ട ഫോർച്യൂണർ പോലുള്ള മോഡലുകളുമായി മത്സരിക്കുന്ന എക്സ്-ട്രെയിൽ, അതിൻ്റെ പ്രീമിയം രൂപകൽപ്പനയ്ക്കും അന്താരാഷ്ട്ര നിലവാരത്തിലുള്ള ഫീച്ചറുകൾക്കും പേരുകേട്ടതാണ്. എന്നിരുന്നാലും, വിൽപ്പന കണക്കുകൾ പുറത്തുവന്നതോടെ ഈ വിഭാഗത്തിലെ വാഹനത്തിൻ്റെ വിപണി സാധ്യതയെക്കുറിച്ചുള്ള ചോദ്യങ്ങൾ ഉയർന്നു തുടങ്ങിയിട്ടുണ്ട്.
കഴിഞ്ഞ ആറ് മാസത്തെ വിൽപ്പന കണക്കുകൾ പരിശോധിച്ചാൽ, 2025 മാർച്ചിൽ 15 യൂണിറ്റും ഏപ്രിലിൽ 76 യൂണിറ്റും മെയ് മാസത്തിൽ 20 യൂണിറ്റും വിറ്റഴിക്കാൻ സാധിച്ചിരുന്നു. എന്നാൽ, ഇതിനുശേഷം വിൽപ്പന തീർത്തും നിലയ്ക്കുകയായിരുന്നു. ജപ്പാനിൽ നിർമ്മിക്കുന്ന എക്സ്-ട്രെയിൽ, വേരിയബിൾ കംപ്രഷൻ ടർബോ എഞ്ചിൻ, മൂന്നാം തലമുറ എക്‌സ്‌ട്രോണിക് സിവിടി എന്നിവയുൾപ്പെടെ നൂതന സാങ്കേതികവിദ്യകളോടെയാണ് വരുന്നത്. ഡയമണ്ട് ബ്ലാക്ക്, പേൾ വൈറ്റ്, ഷാംപെയ്ൻ സിൽവർ എന്നീ മൂന്ന് നിറങ്ങളിൽ വാഹനം ലഭ്യമാണ്.
