'ദേ..അങ്ങോട്ട് നോക്ക് മോനെ..'; പത്താം ക്ലാസ് പരീക്ഷ കഴിഞ്ഞെത്തിയ മകന് ഭയങ്കര സന്തോഷം; വീട്ടിലെത്തിയതും അമ്മ വക സർപ്രൈസ് ഗിഫ്റ്റ്; ഇത് പ്രതീക്ഷിച്ചില്ലെന്ന് സോഷ്യൽ മീഡിയ

ഡൽഹി: പത്താം ക്ലാസ് ബോർഡ് പരീക്ഷ പൂർത്തിയാക്കിയ മകന് മാതാപിതാക്കൾ സമ്മാനമായി മഹീന്ദ്ര ഥാർ റോക്സ് എസ്‌യുവി നൽകിയത് സമൂഹമാധ്യമങ്ങളിൽ വലിയ ചർച്ചകൾക്കും വിവാദങ്ങൾക്കും വഴിവെച്ചിരിക്കുകയാണ്. പ്രായപൂർത്തിയാകാത്ത ഒരു കുട്ടിക്ക് ആഡംബരവാഹനം സമ്മാനിച്ചത് നിയമവിരുദ്ധവും അതീവ അപകടകരവുമായ പ്രവണതയാണെന്ന് ചൂണ്ടിക്കാട്ടി വ്യാപക വിമർശനങ്ങളാണ് ഉയരുന്നത്.

പരീക്ഷാ സമ്മർദ്ദങ്ങളിൽ നിന്ന് മുക്തനായ അർണവ് എന്ന വിദ്യാർത്ഥിക്കാണ് മാതാപിതാക്കൾ ഈ 'സർപ്രൈസ്' ഒരുക്കിയത്. പരീക്ഷ കഴിഞ്ഞ് സ്കൂളിൽ നിന്ന് പുറത്തിറങ്ങിയ അർണവിനെ കൂട്ടിക്കൊണ്ടുപോകുന്നതിനിടെയാണ് മാതാപിതാക്കൾ ഈ സന്തോഷവാർത്ത അറിയിച്ചത്. നടപ്പാതയിൽ വെച്ച് അമ്മ റോഡിലേക്ക് വിരൽചൂണ്ടി 'അതാണ് നമ്മുടെ പുതിയ കാർ' എന്ന് പറഞ്ഞപ്പോൾ അമ്പരപ്പോടെ കാറിന്റെ അടുത്തേക്ക് നടന്നു നീങ്ങുന്ന അർണവിന്റെ വീഡിയോ പുറത്തുവന്നതിന് പിന്നാലെയാണ് സംഭവം വിവാദമായത്. ഈ വീഡിയോ അതിവേഗം വൈറലാവുകയും സമൂഹത്തിന്റെ വിവിധ കോണുകളിൽ നിന്ന് ചോദ്യങ്ങൾ ഉയർത്തുകയും ചെയ്തു.

പത്താം ക്ലാസ് വിദ്യാർത്ഥികൾക്ക് ഇന്ത്യൻ നിയമമനുസരിച്ച് ഡ്രൈവിംഗ് ലൈസൻസ് ലഭിക്കില്ലെന്നിരിക്കെ, ഇത്തരമൊരു വാഹനം സമ്മാനിക്കുന്നത് അപകടകരമായ പ്രവണതയാണെന്നാണ് സാമൂഹിക മാധ്യമങ്ങളിലെ വലിയൊരു വിഭാഗം ആളുകളും ചൂണ്ടിക്കാട്ടുന്നത്. ഇത്തരം പ്രവൃത്തികൾ പ്രായപൂർത്തിയാകാത്ത കുട്ടികൾ വാഹനം ഓടിക്കാൻ പ്രേരിപ്പിക്കുകയും അതുവഴി വലിയ അപകടങ്ങൾക്ക് കാരണമാവുകയും ചെയ്യുമെന്ന ആശങ്കയും പലരും പങ്കുവെക്കുന്നുണ്ട്. പൊതുജനങ്ങളോടുള്ള ഉത്തരവാദിത്തമില്ലായ്മയാണ് മാതാപിതാക്കളുടെ ഭാഗത്തുനിന്നുണ്ടായതെന്ന രൂക്ഷമായ വിമർശനങ്ങളും ഉയർന്നിട്ടുണ്ട്.

ചില നെറ്റിസൺസ് കേന്ദ്രമന്ത്രി നിതിൻ ഗഡ്കരിയെ പോസ്റ്റിൽ ടാഗ് ചെയ്തുകൊണ്ട് വിഷയത്തിൽ നടപടി ആവശ്യപ്പെട്ടിട്ടുണ്ട്. 25 വയസ്സിൽ താഴെയുള്ളവർക്ക് താർ പോലുള്ള കരുത്തുറ്റ വാഹനങ്ങൾ ഓടിക്കുന്നതിന് നിരോധനം ഏർപ്പെടുത്തണമെന്നും ഇവർ ആവശ്യപ്പെടുന്നു. ഇത്തരം ആഡംബരവും വേഗതയേറിയതുമായ വാഹനങ്ങൾ അശ്രദ്ധമായി ഓടിച്ച് അപകടങ്ങൾ വരുത്തിവെക്കുന്നത് പതിവാകുന്ന സാഹചര്യത്തിൽ, ഡ്രൈവിംഗ് ലൈസൻസ് പോലും ഇല്ലാത്തവർക്ക് വാഹനം നൽകുന്നത് സമൂഹത്തിന് തെറ്റായ സന്ദേശം നൽകുമെന്നും നിരവധിയാളുകൾ അഭിപ്രായപ്പെടുന്നു.

കുട്ടികളുടെ മാനസികാവസ്ഥയെയും സുരക്ഷയെയും കണക്കിലെടുക്കാതെ കേവലം ആഗ്രഹങ്ങൾക്കൊത്ത് ആഡംബരങ്ങൾ വാങ്ങിനൽകുന്നത് ഭാവിയിൽ വലിയ പ്രത്യാഘാതങ്ങൾ ഉണ്ടാക്കുമെന്ന മുന്നറിയിപ്പും സോഷ്യൽ മീഡിയ ചർച്ചകളിൽ സജീവമാണ്. നിയമലംഘനങ്ങളെ പ്രോത്സാഹിപ്പിക്കുന്ന ഇത്തരം പ്രവണതകൾക്കെതിരെ ശക്തമായ നിയമനടപടികൾ സ്വീകരിക്കണമെന്നും പൊതുസമൂഹത്തിൽ നിന്ന് ആവശ്യമുയരുന്നുണ്ട്. വിവാദം ശക്തമായതിന് പിന്നാലെ, ഈ വീഡിയോ സാമൂഹിക മാധ്യമങ്ങളിൽ നിന്ന് നീക്കം ചെയ്തിട്ടുണ്ട്. പ്രായപൂർത്തിയാകാത്തവരുടെ ഡ്രൈവിംഗുമായി ബന്ധപ്പെട്ട നിയമലംഘനങ്ങളെക്കുറിച്ചും മാതാപിതാക്കളുടെ ഉത്തരവാദിത്തത്തെക്കുറിച്ചുമുള്ള ഗൗരവമേറിയ സംവാദങ്ങൾക്കാണ് ഈ സംഭവം വഴിയൊരുക്കിയിരിക്കുന്നത്.