റോഡിലൂടെ കത്തിച്ച് പായുന്ന..ഥാറിന്റെ മുഖം അടിമുടി മാറുന്നു; വമ്പൻ മാറ്റങ്ങളുമായി എസ്‌യുവി; പുത്തൻ പതിപ്പ് ഉടൻ പുറത്തിറങ്ങും
ഇന്ത്യൻ വിപണിയിൽ ഓഫ്-റോഡ് വാഹനങ്ങളുടെ രാജാവായി അറിയപ്പെടുന്ന മഹീന്ദ്ര ഥാറിൻ്റെ ഫേസ്‌ലിഫ്റ്റ് പതിപ്പ് ഉടൻ പുറത്തിറങ്ങും. നിലവിലെ തലമുറ ഥാർ 2020-ൽ പുറത്തിറങ്ങിയതിന് ശേഷം ആദ്യമായി മുഖം മിനുക്കിയെത്തുന്ന ഈ വാഹനം പുത്തൻ രൂപകൽപ്പനയിലും കൂടുതൽ നൂതന സംവിധാനങ്ങളോടെയുമാണ് എത്തുന്നത്. യുവതലമുറക്കിടയിൽ വലിയ പ്രചാരമുള്ള ഥാറിൻ്റെ ഈ പുതിയ പതിപ്പ് വിപണിയിൽ വലിയ ചലനങ്ങൾ സൃഷ്ടിക്കുമെന്നാണ് പ്രതീക്ഷിക്കുന്നത്.
പുതിയ ഥാറിൻ്റെ പ്രധാന ആകർഷണം ഇതിൻ്റെ പുറംമോടിയിൽ വരുത്തുന്ന മാറ്റങ്ങളാണ്. സ്പൈ ചിത്രങ്ങളിൽ നിന്ന് ലഭിക്കുന്ന വിവരങ്ങൾ അനുസരിച്ച്, വാഹനത്തിൻ്റെ മുൻ ബമ്പർ പൂർണ്ണമായും പുനർരൂപകൽപ്പന ചെയ്തിട്ടുണ്ട്. ഇത് കൂടുതൽ മസ്കുലാർ ലുക്ക് നൽകുന്നു. ഫോഗ് ലാമ്പ് ഹൗസിംഗുകളിൽ ഷാർപ്പായ ഡിസൈൻ വിശദാംശങ്ങളും ഗ്രില്ലിൽ ചെറിയ മാറ്റങ്ങളും പ്രതീക്ഷിക്കാം.
അകവശത്തും കാര്യമായ നവീകരണങ്ങളുണ്ട്. ഡാഷ്‌ബോർഡിൻ്റെ മധ്യഭാഗത്തായി 10.25 ഇഞ്ച് ടച്ച്‌സ്‌ക്രീൻ ഇൻഫോടെയ്ൻമെന്റ് സിസ്റ്റം സ്ഥാപിക്കും. ഗിയർ ലിവറിന് ചുറ്റുമുള്ള ഭാഗവും പുനർരൂപകൽപ്പന ചെയ്യുന്നുണ്ട്. ഈ ഭാഗത്ത് വയർലെസ് ചാർജിംഗ് പാഡ് ഉൾപ്പെടുത്താനും സാധ്യതയുണ്ട്.
ഇന്ത്യയിലെ ഏറ്റവും വിജയകരമായ ലൈഫ്‌സ്റ്റൈൽ വാഹനങ്ങളിൽ ഒന്നായി മാറിയ ഥാറിൻ്റെ വിൽപ്പന നിലനിർത്തുന്നതിൻ്റെ ഭാഗമായി മുമ്പ് ടൂ വീൽ ഡ്രൈവ് വേരിയൻ്റും അഞ്ച് ഡോർ ഥാർ റോക്‌സും അവതരിപ്പിച്ചിരുന്നു. ഈ വാഹനങ്ങളും വലിയ വിജയം നേടിയിരുന്നു. നിലവിൽ ശക്തമായ ഡിമാൻഡ് നിലനിർത്തുന്ന മൂന്ന് ഡോർ മോഡലിന് ഒരു മിഡ്-സൈക്കിൾ അപ്‌ഡേറ്റ് നൽകാനാണ് മഹീന്ദ്ര ഇപ്പോൾ ലക്ഷ്യമിടുന്നത്.
