പുതിയ മുഖം...ഇനിയൊരു പുതിയ മുഖം; അടിമുടി മാറി ഫോക്സ്വാഗൺ ടൈഗൺ; ഏപ്രിലിൽ ഇന്ത്യയിൽ എത്തും; ആകാംക്ഷയിൽ വാഹനപ്രേമികൾ
മിഡ്-സൈസ് എസ്യുവി വിപണിയിലെ കരുത്തനായ ഫോക്സ്വാഗൺ ടൈഗൂൺ കൂടുതൽ ആധുനികമായ മാറ്റങ്ങളോടെ എത്തുന്നു. നിലവിലെ മോഡലിനേക്കാൾ ഫീച്ചറുകളിലും ഡിസൈനിലും പുതുമകൾ ഉൾക്കൊള്ളിച്ചുകൊണ്ടുള്ള ടൈഗൂൺ ഫേസ്ലിഫ്റ്റ് ഏപ്രിൽ 9-ന് ഇന്ത്യയിൽ അവതരിപ്പിക്കും. കൊറിയൻ എസ്യുവികളായ ക്രെറ്റയോടും സെൽറ്റോസിനോടും മത്സരിക്കാൻ കൂടുതൽ ആയുധങ്ങളുമായാണ് ഇത്തവണ ഫോക്സ്വാഗന്റെ വരവ്.
പുതിയ ടൈഗൂണിൽ ഏറ്റവും കൂടുതൽ ശ്രദ്ധിക്കപ്പെടുന്നത് അതിന്റെ ഇന്റീരിയറിലെ മാറ്റങ്ങളായിരിക്കും. ഡ്രൈവർക്കും യാത്രക്കാർക്കും കൂടുതൽ സൗകര്യപ്രദമായ രീതിയിൽ ക്യാബിൻ പരിഷ്കരിച്ചിട്ടുണ്ട്. അഡ്വാൻസ്ഡ് ഡ്രൈവർ അസിസ്റ്റൻസ് സിസ്റ്റം (ADAS) ഈ പതിപ്പിൽ ഇടംപിടിച്ചേക്കും എന്നതാണ് വാഹന പ്രേമികൾ കാത്തിരിക്കുന്ന പ്രധാന കാര്യം. സുരക്ഷയ്ക്ക് വലിയ പ്രാധാന്യം നൽകുന്ന ഫോക്സ്വാഗൺ ഇതിലൂടെ ടൈഗൂണിനെ കൂടുതൽ സുരക്ഷിതമായ വാഹനാമാക്കി മാറ്റും.
പുതുക്കിയ എൽഇഡി ഹെഡ്ലാമ്പുകൾ, പുതിയ ഡിസൈനിലുള്ള അലോയ് വീലുകൾ, ചെറിയ മാറ്റങ്ങൾ വരുത്തിയ ബമ്പറുകൾ എന്നിവ പുറംഭാഗത്തെ പുതുമ നിലനിർത്തും. ഇൻഫോടെയ്ൻമെന്റ് സിസ്റ്റത്തിലും ഡിജിറ്റൽ ഇൻസ്ട്രുമെന്റ് ക്ലസ്റ്ററിലും പുതിയ സോഫ്റ്റ്വെയർ അപ്ഡേറ്റുകൾ പ്രതീക്ഷിക്കാം.
എഞ്ചിനിൽ വലിയ മാറ്റങ്ങൾ ഉണ്ടാകാൻ സാധ്യതയില്ല. നിലവിലെ 1.0 ലിറ്റർ ടിഎസ്ഐ (TSI) പെട്രോൾ എഞ്ചിനും, കൂടുതൽ കരുത്തുറ്റ 1.5 ലിറ്റർ ടിഎസ്ഐ എഞ്ചിനും തന്നെയായിരിക്കും പുത്തൻ മോഡലിനും കരുത്ത് പകരുക. മാനുവൽ, ഓട്ടോമാറ്റിക് ട്രാൻസ്മിഷൻ ഓപ്ഷനുകൾ ലഭ്യമാകും. 1.5 ലിറ്റർ എഞ്ചിനിൽ ആക്ടീവ് സിലിണ്ടർ ടെക്നോളജി (ACT) ഉള്ളതിനാൽ മികച്ച ഇന്ധനക്ഷമതയും വാഹനം വാഗ്ദാനം ചെയ്യുന്നു.
ഹ്യുണ്ടായ് ക്രെറ്റ, കിയ സെൽറ്റോസ്, മാരുതി സുസുക്കി ഗ്രാൻഡ് വിറ്റാര തുടങ്ങിയ വമ്പൻമാരുമായാണ് ടൈഗൂൺ പ്രധാനമായും മത്സരിക്കുന്നത്. പുതിയ ഫീച്ചറുകൾ കൂടി എത്തുന്നതോടെ പ്രീമിയം എസ്യുവി സെഗ്മെന്റിൽ ടൈഗൂണിന്റെ സ്ഥാനം കൂടുതൽ ഉറപ്പിക്കാൻ കമ്പനിക്ക് സാധിക്കും.
ഫേസ്ലിഫ്റ്റ് പതിപ്പായതിനാൽ വാഹനത്തിന്റെ വിലയിൽ നേരിയ വർദ്ധനവ് പ്രതീക്ഷിക്കാം. ഏപ്രിൽ 9-ന് നടക്കുന്ന ഔദ്യോഗിക ലോഞ്ചിന് ശേഷമേ വിലയും വേരിയന്റുകളെക്കുറിച്ചുള്ള കൂടുതൽ വിവരങ്ങളും ലഭ്യമാകൂ.
