ചെങ്കുത്തായ പാറപ്പുറത്തിരുന്ന് മദ്യപിച്ച് ഫിറ്റായി; യുവാവിനെ സാഹസികമായി താഴെയെത്തിച്ച് അ​ഗ്നിരക്ഷാസേന

പാലക്കാട്: ഉയർന്ന പാറപ്പുറത്തിരുന്ന് മദ്യപിച്ച് അവശനായ യുവാവിനെ താഴെയെത്തിക്കാൻ എത്തിയത് അ​ഗ്നിരക്ഷാസേന. പുതുക്കോട് മണപ്പാടം മലങ്കാട് പാറപ്പുറത്താണ് സംഭവം. ചൊവ്വാഴ്ച വൈകീട്ട് 5.30-ഓടെയാണ് പാറപ്പുറത്ത് 32-കാരനായ യുവാവിനെ അവശനിലയിൽ കണ്ടത്. 70 അടിയോളം ഉയരമുള്ളതും ചെങ്കുത്തായതുമായ പാറയുടെ മുകളിൽ നിന്നും സ്വയം താഴെയിറങ്ങാനാകാത്ത അവസ്ഥയിലായിരുന്നു യുവാവ്.

അവശനിലയിലായ സുഹൃത്തിനെ ചെങ്കുത്തായ പാറപ്പുറത്തുനിന്ന് ഇറക്കാൻ കഴിയാതായതോടെ കൂട്ടുകാർ അഗ്നിരക്ഷാസേനയെ വിളിക്കുകയായിരുന്നു. അഗ്നിരക്ഷാസേനാംഗങ്ങളെത്തി സ്ട്രെച്ചറിൽ കിടത്തി സാഹസികമായാണ് യുവാവിനെ താഴെയെത്തിച്ചത്. ആലത്തൂർ താലൂക്കാശുപത്രിയിലും തുടർന്ന് തൃശ്ശൂരിലെ ആശുപത്രിയിലും പ്രവേശിപ്പിച്ചു. സീനിയർ ഫയർ ആൻഡ് റെസ്ക്യൂ ഓഫീസർ ഗോപകുമാർ നേതൃത്വം നൽകി.