മുൻ അറ്റോർണി ജനറൽ സോളി സൊറാബ്ജി അന്തരിച്ചു; അന്ത്യം കോവിഡ് ബാധിച്ച് ഡൽഹി സ്വകാര്യ ആശുപത്രിയിൽ ചികിത്സയിൽ കഴിയവേ; വിട പറഞ്ഞത് ഇന്ത്യയിലെ ഏറ്റവും മികച്ച നിയമജ്ഞരിൽ ഒരാൾ; അഭിപ്രായ സ്വാതന്ത്ര്യത്തിനു വേണ്ടി നിരവധി കേസുകൾ നടത്തിയ സൊറാബ്ജിയുടെ വിയോഗം ഭാരതത്തിന് തീരാനഷ്ടം
ന്യൂഡൽഹി: ഇന്ത്യയിലെ ഏറ്റവും മികച്ച നിയമജ്ഞരിൽ ഒരാളും മുൻ അറ്റോർണി ജനറലുമായ സോളി സൊറാബ്ജി കോവിഡ് ബാധിച്ച് മരിച്ചു. 91 വയസായിരുന്നു. കോവിഡ് ബാധിച്ച് ഡൽഹിയിലെ സ്വകാര്യ ആശുപത്രിയിൽ ചികിത്സയിലായിരുന്നു. വെള്ളിയാഴ്ച പുലർച്ചെയാണ് അന്ത്യം. 1989-1990, 1998-2004 കാലഘട്ടത്തിൽ അറ്റോർണി ജനറലായിരുന്നു. 1953ൽ ബോംബെ ഹൈക്കോടതിയിലാണ് അദ്ദേഹം അഭിഭാഷകനായി പ്രാക്ടീസ് ആരംഭിച്ചത്. 2002ൽ രാജ്യം പത്മവിഭൂഷൻ നൽകി ആദരിച്ചിരുന്നു.
സാളി ജഹാംഗീർ സൊറാബ്ജി 1930 ൽ മുംബൈയിലാണ് ജനിച്ചത്. 1953ൽ ബോംബെ ഹൈക്കോടതിയിൽ നിയമ പരിശീലനം ആരംഭിച്ചു. 1971 ൽ അദ്ദേഹത്തെ സുപ്രിം കോടതി സീനിയർ കോൺസലായി നിയമിച്ചു. ആദ്യം 1989 മുതൽ 90 വരെയും 1998 മുതൽ 2004 വരെയും അദ്ദേഹം അറ്റോർണി ജനറലായി.
പ്രശസ്ത മനുഷ്യാവകാശ അഭിഭാഷകനാണ് സൊറാബ്ജി. 1997 ൽ നൈജീരിയയിലെ പ്രത്യേക ദൂതനായി യുഎൻ അദ്ദേഹത്തെ നിയമിച്ചു. ഇതേത്തുടർന്ന്, 1998 മുതൽ 2004 വരെ മനുഷ്യാവകാശങ്ങളുടെ ഉന്നമനത്തിനും സംരക്ഷണത്തിനുമായുള്ള യുഎൻ-സബ് കമ്മീഷൻ അംഗവും പിന്നീട് ചെയർമാനുമായി. വിവേചനം തടയുന്നതിനും ന്യൂനപക്ഷങ്ങളുടെ സംരക്ഷണത്തിനുമുള്ള ഐക്യരാഷ്ട്രസഭയുടെ ഉപ കമ്മീഷനിലെ അംഗമാണ് അദ്ദേഹം. 1998. 2000 മുതൽ 2006 വരെ ഹേഗിലെ സ്ഥിരം കോടതി വ്യവഹാരത്തിൽ അംഗമായും പ്രവർത്തിച്ചിട്ടുണ്ട്.
അഭിപ്രായ സ്വാതന്ത്ര്യത്തിനു വേണ്ടി നിരവധി കേസുകളിൽ സൊറാബ്ജി ഉൾപ്പെട്ടിരുന്നു. ഇന്ത്യയിലെ പ്രസ് സെൻസർഷിപ്പ് നിയമങ്ങൾ(1976), ദി എമർജൻസി, സെൻസർഷിപ്പ് ആൻഡ് പ്രസ് ഇൻ ഇന്ത്യ 1975-77 (1977) എന്നിവ ഇദ്ദേഹത്തിന്റെ പുസ്തകങ്ങളാണ്. അഭിപ്രായ സ്വാതന്ത്ര്യത്തിനും മനുഷ്യാവകാശ സംരക്ഷണത്തിനും വേണ്ടിയുള്ള പ്രവർത്തനങ്ങൾ മാനിച്ച് 2002 മാർച്ചിൽ പത്മവിഭൂഷൺ അവാർഡ് ലഭിച്ചു.
