നിങ്ങൾക്ക് സഹിക്കാൻ പറ്റാത്ത നടുവേദന ആണോ?; എങ്കിൽ ഈ തെറ്റുകൾ ഉറപ്പായും തിരുത്തണം; ഡോക്ടർമാർ പറയുന്നത്

ദീർഘനേരം ഇരുന്നുള്ള ജോലികൾ ചെയ്യുന്നവരിൽ നടുവേദനയുടെ പരാതി വർധിച്ചുവരുന്നു. നടുവേദനയെ അവഗണിച്ച് പലരും ചെയ്യുന്ന ചില തെറ്റായ ശീലങ്ങൾ അവസ്ഥ കൂടുതൽ വഷളാക്കുമെന്ന് വിദഗ്ദ്ധർ മുന്നറിയിപ്പ് നൽകുന്നു. ഓർത്തോപീഡിക്, സ്പോർട്സ് സർജൻ ഡോ. ഉബൈദുർ റഹ്മാൻ പങ്കുവെച്ച ഈ വിഷയത്തിലെ നിർദ്ദേശങ്ങൾ സാമൂഹിക മാധ്യമങ്ങളിൽ വലിയ ശ്രദ്ധ നേടുകയാണ്.

നടുവേദനയിൽ നിന്ന് മോചനം നേടാൻ പലരും വിട്ടുപോകുന്ന മൂന്ന് പ്രധാന തെറ്റുകളാണ് ഡോക്ടർ ചൂണ്ടിക്കാണിക്കുന്നത്. ഒന്നാമതായി, കാൽ പിണച്ച് അല്ലെങ്കിൽ കൂനിക്കൊണ്ട് ഇരിക്കുന്ന ശീലം നടുവേദനയ്ക്ക് കാരണമാകും. ഇത് നട്ടെല്ലിന് അമിത സമ്മർദ്ദം നൽകുകയും സ്ലിപ്പ്ഡ് ഡിസ്ക് പോലുള്ള പ്രശ്നങ്ങളിലേക്ക് നയിക്കുകയും ചെയ്യും. രണ്ടാമതായി, ഇരുചക്രവാഹനം ഓടിക്കുമ്പോൾ നട്ടെല്ലിന് ഉണ്ടാകുന്ന ശക്തമായ ഞെരുക്കം ഡിസ്കുകളെ പിന്നിലേക്ക് തള്ളാനും ഹെർണിയേഷന് ഇടയാക്കാനും സാധ്യതയുണ്ട്. മൂന്നാമതായി, ഭാരം ഉയർത്തുകയോ തുടർച്ചയായി മുന്നോട്ട് കുനിയുകയോ ചെയ്യുമ്പോൾ നടുവിനെ ബാധിക്കുന്ന ഫ്ലെക്ഷൻ ലോഡിംഗ് ഉണ്ടാകുന്നു.

നടുവേദനയുടെ പ്രധാന കാരണങ്ങളിൽ ഒന്നായ ഡിസ്ക് തേയ്മാനം തടയാൻ വ്യായാമങ്ങൾ സഹായിക്കും. അസ്ഥി തേയ്മാനം, ഡിസ്ക് പ്രശ്നങ്ങൾ, നട്ടെല്ലിന് ക്ഷതമേൽക്കുക, അർബുദം, നീർക്കെട്ട് എന്നിവയും നടുവേദനയിലേക്ക് നയിക്കാം. കാലങ്ങളായി നടുവേദന തുടരുക, ശരീരഭാരം കുറയുക, വേദന കാലുകളിലേക്ക് പടരുക, ചെറിയ പ്രായത്തിൽ വേദന അനുഭവപ്പെടുക, മല-മൂത്ര വിസർജനത്തിൽ പ്രശ്നങ്ങൾ ഉണ്ടാകുക തുടങ്ങിയ ലക്ഷണങ്ങൾ കണ്ടാൽ അടിയന്തര വൈദ്യ സഹായം തേടണം. ശരിയായ രീതിയിൽ ഇരിക്കുക, നിൽക്കുക തുടങ്ങിയ നല്ല പോസ്ചറുകൾ ശീലമാക്കുന്നത് പുറം പേശികൾക്കും ഡിസ്ക്കുകൾക്കും സംരക്ഷണം നൽകും.