'ഓട്സ്' പതിവായി കഴിച്ചാൽ ഗുണങ്ങൾ ഏറെ..; രക്തയോട്ടം മെച്ചപ്പെടുത്തുന്നതിന് സഹായിക്കുന്ന ഭക്ഷണങ്ങൾ; അറിയാം..
ശരീരത്തിൻ്റെ ശരിയായ പ്രവർത്തനങ്ങൾക്ക് അവയവങ്ങളിലേക്കുള്ള രക്തയോട്ടം അത്യന്താപേക്ഷിതമാണ്. രക്തയോട്ടത്തിലെ തടസ്സങ്ങൾ പേശി വേദന, മരവിപ്പ്, കൈകാലുകളിൽ തണുപ്പ് തുടങ്ങിയ ആരോഗ്യ പ്രശ്നങ്ങൾക്ക് കാരണമാകും. രക്തയോട്ടം വർദ്ധിപ്പിക്കാൻ ഭക്ഷണത്തിൽ ഉൾപ്പെടുത്തേണ്ട ചില പ്രധാനപ്പെട്ട ഭക്ഷണങ്ങളെക്കുറിച്ച് താഴെ വിശദീകരിക്കുന്നു.
ഓട്സ്: ലയിക്കുന്ന നാരുകൾ അടങ്ങിയ ഓട്സ് ശരീരത്തിലെ കൊളസ്ട്രോളിൻ്റെ അളവ് ഗണ്യമായി കുറയ്ക്കാൻ സഹായിക്കുന്നു. ഇത് ധമനികളിലെ പ്ലാക്ക് നീക്കം ചെയ്യാനും സഹായിക്കും.
മുരിങ്ങയില: ആന്റിഓക്‌സിഡന്റുകൾ, വിറ്റാമിനുകൾ, ബയോ ആക്റ്റീവ് സംയുക്തങ്ങൾ എന്നിവയാൽ സമ്പന്നമായ മുരിങ്ങയിലയിൽ അടങ്ങിയ ക്വെർസെറ്റിൻ എന്ന ആന്റിഓക്‌സിഡന്റ് കൊളസ്ട്രോൾ കുറയ്ക്കാനും ധമനികൾ ശുദ്ധീകരിക്കാനും സഹായിക്കുന്നു.
വാൾനട്ട്: ആരോഗ്യകരമായ ഒമേഗ-3 ഫാറ്റി ആസിഡ് ആയ ആൽഫ-ലിനോലെനിക് ആസിഡിൻ്റെ പ്രധാന ഉറവിടമാണ് വാൾനട്ട്. ഇത് ധമനികളെ ശുദ്ധീകരിക്കുന്നതിനും ചീത്ത കൊളസ്ട്രോൾ (എൽഡിഎൽ) കുറയ്ക്കുന്നതിനും ഫലപ്രദമാണ്.
ബീറ്റ്‌റൂട്ട്: ബീറ്റ്‌റൂട്ടിൽ അടങ്ങിയ നൈട്രേറ്റുകൾ രക്തക്കുഴലുകളെ വികസിപ്പിച്ച് രക്തയോട്ടം സുഗമമാക്കുന്നു. ഇത് ആരോഗ്യകരമായ രക്തചംക്രമണത്തെ പ്രോത്സാഹിപ്പിക്കുന്നു.
ഡാർക്ക് ചോക്ലേറ്റ്: ഫ്ലേവനോളുകൾ ധാരാളമായി അടങ്ങിയ ഡാർക്ക് ചോക്ലേറ്റ് നൈട്രിക് ഓക്സൈഡിൻ്റെ ഉത്പാദനത്തെ ഉത്തേജിപ്പിച്ച് രക്തയോട്ടം മെച്ചപ്പെടുത്തുന്നു.
