അത് കുട്ടി വേണമെന്ന് തോന്നുമ്പോൾ പോരെ..; എനിക്ക് മറ്റ് ചിന്തകളൊന്നുമില്ല; ഞാൻ എന്റെ അണ്ഡങ്ങൾ ശീതീകരിച്ചു; എല്ലാം തുറന്നുപറഞ്ഞ് നടി ഡെയ്സി
കരിയറും വ്യക്തിജീവിതവും ഒരുപോലെ ബാലൻസ് ചെയ്യാൻ ആഗ്രഹിക്കുന്ന ഇന്നത്തെ കാലത്ത്, പ്രായം കൂടുമ്പോൾ ഉണ്ടായേക്കാവുന്ന ശാരീരിക ബുദ്ധിമുട്ടുകൾ മറികടക്കാൻ അണ്ഡം ശീതീകരിക്കുന്ന രീതി സിനിമ താരങ്ങൾക്കിടയിൽ വർധിച്ചു വരികയാണ്. സൽമാൻ ഖാൻ ചിത്രം 'ജയ് ഹോ'യിലൂടെ ശ്രദ്ധേയയായ ഡെയ്സി ഷായാണ് ഈ പട്ടികയിലെ ഏറ്റവും പുതിയ താരം.
തന്റെ കരിയറിലെ തിരക്കുകൾക്കിടയിൽ മാതൃത്വം ആസ്വദിക്കാൻ സാധിക്കാതെ വരുമോ എന്ന ആശങ്ക ഡെയ്സിക്കുണ്ടായിരുന്നു. നിലവിൽ താൻ വിവാഹിതയല്ലെങ്കിലും, ഭാവിയിൽ അമ്മയാകാൻ ആഗ്രഹിക്കുമ്പോൾ പ്രായം ഒരു തടസ്സമാകരുതെന്ന് ഉറപ്പിക്കാനാണ് 41-ാം വയസ്സിൽ താരം ഈ മെഡിക്കൽ രീതി അവലംബിച്ചത്. "ജീവിതത്തിൽ എപ്പോൾ കുട്ടികൾ വേണമെന്ന് ഞാൻ തീരുമാനിക്കുന്നുവോ, അപ്പോൾ എനിക്ക് അതിനുള്ള അവസരം ഉണ്ടായിരിക്കണം," എന്ന് താരം ഒരു അഭിമുഖത്തിൽ പറഞ്ഞു.
മുൻപ് അണ്ഡം ശീതീകരിക്കുന്നതിനെക്കുറിച്ച് തുറന്നുപറയാൻ പലരും മടിച്ചിരുന്നു. എന്നാൽ ഏക്ത കപൂർ, പ്രിയങ്ക ചോപ്ര, തനിഷ മുഖർജി, റിദ്ധിമ പണ്ഡിറ്റ് തുടങ്ങിയ താരങ്ങൾ ഈ വഴി തിരഞ്ഞെടുത്തതോടെ വലിയൊരു മാറ്റം സമൂഹത്തിൽ ഉണ്ടായിട്ടുണ്ട്. സ്വന്തം ശരീരം സംരക്ഷിക്കുന്നതിനും ജീവിതത്തിലെ പ്രധാന തീരുമാനങ്ങൾ സ്വന്തമായി എടുക്കുന്നതിനും സ്ത്രീകൾക്ക് ഈ സാങ്കേതികവിദ്യ വലിയ ആത്മവിശ്വാസം നൽകുന്നുണ്ടെന്ന് ഡെയ്സി ഷാ ചൂണ്ടിക്കാട്ടി.
സ്ത്രീകളുടെ പ്രായം വർധിക്കുമ്പോൾ അണ്ഡങ്ങളുടെ എണ്ണവും ഗുണനിലവാരവും കുറയുന്നത് സാധാരണമാണ്. താരതമ്യേന പ്രായം കുറഞ്ഞ സമയത്തോ അല്ലെങ്കിൽ ആരോഗ്യകരമായ അണ്ഡങ്ങൾ ഉള്ളപ്പോഴോ അവ വേർതിരിച്ചെടുത്ത് ലാബുകളിൽ സൂക്ഷിച്ചുവെക്കുന്ന രീതിയാണിത്. വർഷങ്ങൾക്ക് ശേഷം ഗർഭധാരണം ആവശ്യമായി വരുമ്പോൾ ഈ അണ്ഡങ്ങൾ ഉപയോഗിച്ച് ഐ.വി.എഫ് (IVF) വഴി കുട്ടിക്ക് ജന്മം നൽകാൻ സാധിക്കും.
കരിയറിന് പ്രാധാന്യം നൽകുന്ന സ്ത്രീകൾക്കും ആരോഗ്യപരമായ കാരണങ്ങളാൽ ഗർഭധാരണം വൈകിപ്പിക്കേണ്ടി വരുന്നവർക്കും ഈ രീതി വലിയൊരു അനുഗ്രഹമായി മാറിയിരിക്കുകയാണ്. ഡെയ്സി ഷായുടെ ഈ തുറന്നുപറച്ചിൽ സമാനമായ ആഗ്രഹങ്ങളുള്ള നിരവധി സ്ത്രീകൾക്ക് പ്രചോദനമാകുമെന്നാണ് ആരാധകരുടെ പക്ഷം.
