ചെറുപ്പക്കാരിൽ പോലും വർധിച്ചു വരുന്ന വൻകുടൽ കാൻസറിനെ (കൊളോറെക്ടൽ കാൻസർ) പ്രതിരോധിക്കുന്നതിൽ ഭക്ഷണക്രമത്തിന് നിർണായക പങ്കുണ്ടെന്ന് വിദഗ്ദ്ധർ ചൂണ്ടിക്കാണിക്കുന്നു. ലോകാരോഗ്യ സംഘടനയുടെ കണക്കുകൾ പ്രകാരം, 2020-ൽ ലോകമെമ്പാടും 1.9 ദശലക്ഷത്തിലധികം പുതിയ വൻകുടൽ കാൻസർ കേസുകളും ഏകദേശം 930,000 മരണങ്ങളും റിപ്പോർട്ട് ചെയ്യപ്പെട്ടിട്ടുണ്ട്.

ഗ്യാസ്‌ട്രോഎൻട്രോളജിസ്റ്റ് ഡോ. സൗരഭ് സേഥി പങ്കുവെച്ച പുതിയ കണ്ടെത്തലുകൾ പ്രകാരം, ഫൈബർ, ആന്റിഓക്‌സിഡന്റുകൾ, പ്രോബയോട്ടിക്സ് എന്നിവ ധാരാളമായി അടങ്ങിയ ഭക്ഷണങ്ങൾ കഴിക്കുന്നത് കുടലിലെ വീക്കം കുറയ്ക്കാനും പൊതുവായ കുടലിന്റെ ആരോഗ്യം മെച്ചപ്പെടുത്താനും വൻകുടൽ കാൻസറിനുള്ള സാധ്യത ഗണ്യമായി കുറയ്ക്കാനും സഹായിക്കും.

വൻകുടലിന് സംരക്ഷണം നൽകുന്ന ചില പ്രധാന ഭക്ഷണങ്ങളെക്കുറിച്ച് അദ്ദേഹം വിശദീകരിക്കുന്നു. ബീൻസ്, പരിപ്പ് വർഗ്ഗങ്ങൾ എന്നിവ ഡയറ്ററി ഫൈബർ നിറഞ്ഞവയാണ്. ഇവയിൽ അടങ്ങിയ റെസിസ്റ്റന്റ് സ്റ്റാർച്ച് കുടലിലെ ആരോഗ്യകരമായ ബാക്ടീരിയകളെ പരിപോഷിപ്പിക്കുകയും വീക്കം കുറയ്ക്കാനും കാൻസറിനെ പ്രതിരോധിക്കാനും സഹായിക്കുന്ന ഷോർട്ട്-ചെയിൻ ഫാറ്റി ആസിഡുകൾ ഉത്പാദിപ്പിക്കുകയും ചെയ്യുന്നു.

ബ്രോക്കോളി, കാബേജ്, കോളിഫ്ലവർ തുടങ്ങിയ പച്ചക്കറികളിൽ അടങ്ങിയ സൾഫോറാഫെയ്ൻ, ഇൻഡോൾ-3-കാർബിനോൾ എന്നീ സംയുക്തങ്ങൾ ശരീരത്തിലെ വിഷാംശങ്ങളെ നിർവീര്യമാക്കാനും കാർസിനോജനുകളെ പ്രതിരോധിക്കാനും കഴിവുള്ളവയാണ്. ബെറികളിൽ (ബ്ലൂബെറി, സ്ട്രോബെറി) അടങ്ങിയ ആന്തോസയാനിനുകൾ, എലാജിക് ആസിഡ്, വിറ്റാമിൻ സി തുടങ്ങിയ ആന്റിഓക്‌സിഡന്റുകൾ ശരീരത്തിലെ ഓക്സിഡേറ്റീവ് സമ്മർദ്ദം കുറയ്ക്കുകയും കുടലിലെ വീക്കം നിയന്ത്രിക്കുകയും ചെയ്യുന്നു.

ഓട്‌സ്, ബാർലി, ക്വിനോവ പോലുള്ള ധാന്യങ്ങൾ കുടലിന്റെ ആരോഗ്യം വർദ്ധിപ്പിക്കാനും മലബന്ധം നിയന്ത്രിക്കാനും സഹായിക്കുന്നു. ചീര, കടുക് ഇല, ലെറ്റസ് തുടങ്ങിയ ഇലക്കറികളിൽ അടങ്ങിയ ക്ലോറോഫിൽ, ഫോളേറ്റ്, കരോട്ടിനോയിഡുകൾ എന്നിവ ശരീരത്തിന് ഗുണകരമാണ്. വെളുത്തുള്ളിയിലെ അല്ലിസിൻ പോലുള്ള സംയുക്തങ്ങളും കാൻസർ പ്രതിരോധത്തിന് സഹായകമാണ്.

സ്വന്തം ലേഖകൻ