ചില സമയത്ത് ശരീരത്തിൽ വിഷം നിറയ്ക്കുകയാണെന്ന് തോന്നിപ്പോകും; യാത്രകൾ നടത്തുമ്പോൾ പക്ഷെ അങ്ങനെയല്ല; ഇതെല്ലാം കഴിച്ചിട്ടും ആള് ജീവനോടെ തന്നെ ഉണ്ട്..!! ലോകത്തെ മുൾമുനയിൽ നിർത്തുന്ന അമേരിക്കൻ പ്രസിഡന്റ്; ഭക്ഷണ കാര്യത്തിൽ വരെ ശാഠ്യ മനോഭാവം; ട്രംപിന്റെ വിചിത്രമായ ആരോഗ്യ ശീലത്തെ കുറിച്ച് വൈറ്റ് ഹൗസ്
വാഷിംഗ്ടൺ: അമേരിക്കൻ പ്രസിഡന്റായി തിരഞ്ഞെടുക്കപ്പെട്ട ഡൊണാൾഡ് ട്രംപിന്റെ ആരോഗ്യത്തെയും ഭക്ഷണശീലങ്ങളെയും കുറിച്ചുള്ള രസകരവും എന്നാൽ ആശങ്കാജനകവുമായ വെളിപ്പെടുത്തലുകൾ പുറത്തുവന്നിരിക്കുകയാണ്. ട്രംപിന്റെ പുതിയ ഭരണകൂടത്തിൽ ആരോഗ്യ സെക്രട്ടറിയായി നാമനിർദ്ദേശം ചെയ്യപ്പെട്ട റോബർട്ട് എഫ്. കെന്നഡി ജൂനിയറാണ് ട്രംപിന്റെ ഭക്ഷണക്രമത്തെക്കുറിച്ച് തുറന്നുപറഞ്ഞത്. ട്രംപിന്റെ വിമാനമായ 'ട്രംപ് ഫോഴ്സ് വണ്ണിൽ' ലഭ്യമാകുന്ന ഭക്ഷണങ്ങൾ അങ്ങേയറ്റം അനാരോഗ്യകരമാണെന്നും അവയെ 'വിഷം' എന്ന് വിശേഷിപ്പിക്കാമെന്നുമാണ് കെന്നഡി ജൂനിയർ അഭിപ്രായപ്പെട്ടത്.
ഒരു പ്രമുഖ പോഡ്കാസ്റ്റ് അഭിമുഖത്തിനിടെയാണ് കെന്നഡി ജൂനിയർ ഈ വെളിപ്പെടുത്തലുകൾ നടത്തിയത്. ട്രംപിനൊപ്പം യാത്ര ചെയ്യുമ്പോൾ വിമാനത്തിൽ ലഭിക്കുന്ന ഭക്ഷണത്തെക്കുറിച്ച് അദ്ദേഹം വിവരിച്ചു. "ട്രംപ് ഫോഴ്സ് വണ്ണിൽ കഴിക്കാൻ കിട്ടുന്ന സാധനങ്ങൾ ഭയാനകമാണ്. ഒന്നുകിൽ കെഎഫ്സി (KFC), അല്ലെങ്കിൽ മക്ഡൊണാൾഡ്സ്. ഇത് കൂടാതെ മറ്റു പല ഫാസ്റ്റ് ഫുഡ് ഇനങ്ങളും അവിടെയുണ്ടാകും. ബാക്കിയുള്ളവ കഴിക്കാൻ യോഗ്യമല്ലാത്തവയാണെന്ന് ഞാൻ കരുതുന്നു," കെന്നഡി പറഞ്ഞു.
ട്രംപിന്റെ ഭക്ഷണക്രമം പണ്ടേ ചർച്ചാവിഷയമാണ്. കൊഴുപ്പേറിയ ഭക്ഷണത്തോടും ഫാസ്റ്റ് ഫുഡിനോടുമുള്ള അദ്ദേഹത്തിന്റെ പ്രിയം പരസ്യമായ കാര്യമാണ്. എന്നാൽ, അമേരിക്കയുടെ ആരോഗ്യവകുപ്പ് കൈകാര്യം ചെയ്യാൻ പോകുന്ന വ്യക്തി തന്നെ രാജ്യത്തിന്റെ തലവന്റെ ഭക്ഷണശീലത്തെ വിമർശിക്കുന്നത് രാഷ്ട്രീയ വൃത്തങ്ങളിൽ വലിയ ചർച്ചയായിട്ടുണ്ട്.
ട്രംപിന്റെ പാനീയങ്ങളോടുള്ള താൽപ്പര്യത്തെയും കെന്നഡി വിമർശിച്ചു. ട്രംപ് ധാരാളമായി ഡയറ്റ് കോക്ക് കുടിക്കാറുണ്ടെങ്കിലും, തന്റെ വിമാനത്തിൽ കയറുന്ന അതിഥികൾക്ക് നൽകുന്ന പാനീയങ്ങളെക്കുറിച്ച് അദ്ദേഹം അത്ര ശ്രദ്ധാലുവല്ലെന്ന് കെന്നഡി നിരീക്ഷിക്കുന്നു. അടുത്തിടെ നടന്ന ഒരു ചടങ്ങിൽ ട്രംപിന്റെ മകൻ ഡൊണാൾഡ് ട്രംപ് ജൂനിയർ, ഇലോൺ മസ്ക് എന്നിവർക്കൊപ്പം ട്രംപ് മക്ഡൊണാൾഡ്സ് ബർഗറും ഫ്രഞ്ച് ഫ്രൈസും കഴിക്കുന്ന ചിത്രം സമൂഹമാധ്യമങ്ങളിൽ വൈറലായിരുന്നു. 'മേക്ക് അമേരിക്ക ഹെൽത്തി എഗെയ്ൻ' (അമേരിക്കയെ വീണ്ടും ആരോഗ്യപൂർണ്ണമാക്കുക) എന്ന മുദ്രാവാക്യം ഉയർത്തുന്ന കെന്നഡി ജൂനിയറിനെ തൊട്ടടുത്ത് ഇരുത്തിയാണ് ട്രംപ് ഈ ഭക്ഷണം കഴിച്ചത് എന്നത് വൈരുദ്ധ്യമായി ചൂണ്ടിക്കാണിക്കപ്പെടുന്നു.
അമേരിക്കയിലെ ഭക്ഷണസാധനങ്ങളിൽ ഉപയോഗിക്കുന്ന വിത്തുകളിൽ നിന്നുള്ള എണ്ണകളെ (Seed oils) കെന്നഡി ജൂനിയർ ശക്തമായി എതിർക്കുന്നു. പാചകത്തിന് വെണ്ണയോ വെളിച്ചെണ്ണയോ ഉപയോഗിക്കുന്നതിന് പകരം അനാരോഗ്യകരമായ എണ്ണകൾ ഉപയോഗിക്കുന്നത് ജനങ്ങളുടെ ആരോഗ്യം നശിപ്പിക്കുന്നുവെന്നാണ് അദ്ദേഹത്തിന്റെ വാദം. ട്രംപിന്റെ വിമാനത്തിലെ ഭക്ഷണവും ഇത്തരം ചേരുവകൾ നിറഞ്ഞതാണെന്ന് അദ്ദേഹം കുറ്റപ്പെടുത്തി.
"നിങ്ങൾക്കവിടെ വെള്ളം കുടിക്കാൻ കിട്ടും. എന്നാൽ ട്രംപിന് ഇഷ്ടം ഡയറ്റ് കോക്കാണ്. എനിക്ക് തോന്നുന്നത് അദ്ദേഹം ഇത്തരം പ്രോസസ്സ് ചെയ്ത ഭക്ഷണങ്ങൾ കഴിക്കുന്നത് നിർത്തണമെന്നാണ്," കെന്നഡി പറഞ്ഞു. അമേരിക്കയിലെ കുട്ടികൾക്കിടയിലുള്ള അമിതവണ്ണവും മറ്റ് ആരോഗ്യപ്രശ്നങ്ങളും പരിഹരിക്കാൻ ഭക്ഷണക്രമത്തിൽ വിപ്ലവകരമായ മാറ്റങ്ങൾ കൊണ്ടുവരുമെന്ന് അദ്ദേഹം പ്രഖ്യാപിച്ചിട്ടുണ്ട്.
ആരോഗ്യ സെക്രട്ടറി എന്ന നിലയിൽ കെന്നഡി ജൂനിയറുടെ നിയമനം പല ആരോഗ്യ വിദഗ്ധരെയും ആശങ്കയിലാഴ്ത്തിയിട്ടുണ്ട്. വാക്സിനുകളെക്കുറിച്ചുള്ള അദ്ദേഹത്തിന്റെ മുൻകാല നിലപാടുകളും സന്ദേഹവാദവുമാണ് ഇതിന് കാരണം. എന്നാൽ, ഭക്ഷണത്തിലെ മായം കലർത്തുന്നതിനെതിരെയും കീടനാശിനികളുടെ അമിത ഉപയോഗത്തിനെതിരെയും അദ്ദേഹം നടത്തുന്ന പോരാട്ടങ്ങൾക്ക് വലിയ ജനപിന്തുണയും ലഭിക്കുന്നുണ്ട്.
തന്റെ ഭക്ഷണശീലത്തെ വിമർശിച്ച കെന്നഡി ജൂനിയറെക്കുറിച്ച് ട്രംപ് ഇതുവരെ ഔദ്യോഗികമായി പ്രതികരിച്ചിട്ടില്ല. എന്നിരുന്നാലും, കെന്നഡിക്ക് ആരോഗ്യരംഗത്ത് പൂർണ്ണ സ്വാതന്ത്ര്യം നൽകുമെന്ന് ട്രംപ് നേരത്തെ സൂചിപ്പിച്ചിരുന്നു. "ബോബിക്ക് (കെന്നഡി) ഭക്ഷണത്തെക്കുറിച്ചും മരുന്നുകളെക്കുറിച്ചും കാര്യമായ അറിവുണ്ട്. അദ്ദേഹം അമേരിക്കയെ വീണ്ടും ആരോഗ്യപൂർണ്ണമാക്കും," എന്നായിരുന്നു ട്രംപിന്റെ വാക്കുകൾ.
