രാത്രി ഉറങ്ങുമ്പോൾ നിങ്ങൾ കൂര്‍ക്കംവലിക്കാറുണ്ടോ?; എങ്കിൽ സൂക്ഷിക്കണം..; നിങ്ങളെ കാത്തിരിക്കുന്നത് ഗുരുതര ആരോഗ്യപ്രശ്‌നങ്ങൾ; വിദഗ്ധർ പറയുന്നത്
കൊച്ചി: കൂർക്കംവലി ഗുരുതരമായ ആരോഗ്യപ്രശ്നങ്ങളുടെ സൂചനയാണെന്ന് ആരോഗ്യവിദഗ്ദ്ധർ മുന്നറിയിപ്പ് നൽകുന്നു. ഉറക്കത്തിനിടെ ശ്വസനനാളിയിൽ ഉണ്ടാകുന്ന തടസ്സങ്ങൾ ഹൃദ്രോഗം, പ്രമേഹം, സ്ട്രോക്ക്, പകൽ സമയത്തെ അമിതമായ ക്ഷീണം തുടങ്ങിയ ഗുരുതരമായ ആരോഗ്യ പ്രശ്നങ്ങൾക്ക് കാരണമാകാം. ശ്വാസകോശ, ഇഎൻടി, ന്യൂറോളജി, ഓറൽ ആൻഡ് മാക്സിലോഫേഷ്യൽ, ഡെന്റൽ തുടങ്ങിയ വിവിധ ചികിത്സാമേഖലകളിലെ വിദഗ്ധർ പങ്കെടുത്ത ഒരു ശില്പശാലയിലാണ് ഈ നിഗമനങ്ങൾ അവതരിപ്പിച്ചത്.
ഉറക്കത്തിൽ ശ്വാസമെടുക്കുന്നതിലുണ്ടാകുന്ന ഇടയ്ക്കിടെയുള്ള തടസ്സമാണ് ഒബ്സ്ട്രക്ടീവ് സ്ലീപ് അപ്നിയ (ഒഎസ്എ). അമിതവണ്ണമാണ് ഇതിന്റെ പ്രധാന കാരണം. ജനനപരമായ താടിയെല്ലിന്റെ വൈകല്യങ്ങൾ (ചെറിയ താടിയെല്ല്, പുറകോട്ടുള്ള താടിയെല്ല്), മൂക്കിനുള്ളിലെ തടസ്സങ്ങൾ (ചൊറിഞ്ഞ സെപ്റ്റം, നാസൽ പോളിപ്സ്), ചെറിയ കഴുത്ത്, തൈറോയ്ഡ് പ്രവർത്തനക്ഷമത കുറയുന്നത്, ഉയർന്ന രക്തസമ്മർദ്ദം, പ്രമേഹം, പാരമ്പര്യ ഘടകങ്ങൾ, കുട്ടികളിലെ അഡിനോയിഡ് ഗ്രന്ഥിയുടെ അമിതമായ വളർച്ച എന്നിവയെല്ലാം സ്ലീപ് അപ്നിയ ഉണ്ടാകാനുള്ള സാധ്യത വർദ്ധിപ്പിക്കുന്നു. കൂർക്കംവലി കാരണം ശ്വാസമെടുക്കുന്നതിൽ ഉണ്ടാകുന്ന തടസ്സങ്ങൾ രക്തത്തിലെ ഓക്സിജന്റെ അളവിനെയും ആരോഗ്യത്തെയും പ്രതികൂലമായി ബാധിക്കുന്നു.
സാധാരണയായി 40 വയസ്സിനു ശേഷം പുരുഷന്മാരിലാണ് ഈ പ്രശ്നങ്ങൾ കൂടുതലായി കാണപ്പെടുന്നത്. കൂർക്കംവലി, പകൽ സമയത്ത് അനുഭവപ്പെടുന്ന അമിതമായ ക്ഷീണം, ശ്രദ്ധ കേന്ദ്രീകരിക്കാനുള്ള ബുദ്ധിമുട്ട് എന്നിവ ഹൃദയത്തിനും തലച്ചോറിനും ഗുരുതരമായ തകരാറുകൾക്ക് കാരണമാകുമെന്നതിനാൽ ഈ ലക്ഷണങ്ങളെ അവഗണിക്കരുതെന്ന് ആരോഗ്യവിദഗ്ദ്ധർ നിർദ്ദേശിച്ചു.
ഒഎസ്എ സംശയിക്കുന്നവർ പോളിസോമ്നോഗ്രഫി (ഉറക്ക പഠനം) നടത്തുന്നത് ഉചിതമാണെന്നും ഡോക്ടർമാർ കൂട്ടിച്ചേർത്തു. ശരീരത്തിൽ, പ്രത്യേകിച്ച് കഴുത്തിൽ കൊഴുപ്പ് കുറയ്ക്കുന്നത്, വശത്തേക്ക് ചരിഞ്ഞുറങ്ങുന്നത്, ലഹരി പദാർത്ഥങ്ങൾ ഉപേക്ഷിക്കുന്നത് എന്നിവയും ആരോഗ്യത്തിന് ഗുണകരമാണ്.
