നിങ്ങൾ അമിതമായി 'സ്ട്രെസ്' അടിക്കുന്നവരാണോ?; എങ്കിൽ സൂക്ഷിക്കണം; തലച്ചോറിന്റെ പ്രവർത്തനത്തെ ബാധിക്കും; വിദഗ്ധർ പറയുന്നത്

വർധിച്ചു വരുന്ന മാനസിക സമ്മർദ്ദവും ഉത്കണ്ഠയും തലച്ചോറിൻ്റെ ആരോഗ്യത്തെ ഗുരുതരമായി ബാധിക്കുമെന്ന് പുതിയ പഠനങ്ങൾ വെളിപ്പെടുത്തുന്നു. ശരീരത്തിലെ സ്ട്രെസ് ഹോർമോണായ കോർട്ടിസോളിൻ്റെ ഉയർന്ന അളവ് ഓർമ്മശക്തിയെയും ചിന്താശേഷിയെയും പ്രതികൂലമായി ബാധിക്കുമെന്നും ഇത് ദീർഘകാലാടിസ്ഥാനത്തിൽ തലച്ചോറിൻ്റെ പ്രവർത്തനങ്ങൾക്ക് തകരാറുണ്ടാക്കുമെന്നും ഗവേഷകർ ചൂണ്ടിക്കാണിക്കുന്നു.

മധ്യവയസ്കരിൽ കോർട്ടിസോളിൻ്റെ അളവ് കൂടുതലായിരുന്നവരിൽ, ഡിമെൻഷ്യയുടെ ലക്ഷണങ്ങൾ പ്രകടമായിരുന്നില്ലെങ്കിലും തലച്ചോറിൻ്റെ പ്രവർത്തനങ്ങൾ മോശമായിരുന്നതായി ന്യൂറോളജി ജേണലിൽ പ്രസിദ്ധീകരിച്ച പഠനം കണ്ടെത്തിയിരുന്നു. കോർട്ടിസോളിൻ്റെ ഉയർന്ന അളവ് ഓർമ്മക്കുറവിനും ഇത് നേരിട്ട് ബന്ധപ്പെട്ടിരിക്കുന്നുവെന്ന് നേരത്തെയും ശാസ്ത്രീയ ഗവേഷണങ്ങളിൽ വ്യക്തമായിരുന്നു.

അയോവ സർവകലാശാല നടത്തിയ മൃഗ പഠനത്തിൽ, ദീർഘകാലം കോർട്ടിസോൾ അളവ് ഉയർന്നുനിൽക്കുന്നത് ഓർമ്മ നഷ്ടപ്പെടുന്നതിന് കാരണമാകുമെന്ന് തെളിയിക്കപ്പെട്ടു. കോർട്ടിസോൾ അളവ് സാധാരണ നിലയിലേക്ക് തിരികെ വന്നപ്പോൾ തലച്ചോറിൻ്റെ ആരോഗ്യവും ചിന്താശേഷിയും മെച്ചപ്പെട്ടതായും പഠനം നിരീക്ഷിച്ചു. പുതിയ കാര്യങ്ങൾ പഠിക്കുന്നതിനിടയിൽ സമ്മർദ്ദത്തിന് വിധേയരായ വ്യക്തികൾക്ക് തങ്ങളുടെ അറിവ് മറ്റുള്ളവരിലേക്ക് പകർന്നുനൽകുന്നതിൽ ബുദ്ധിമുട്ട് നേരിടാമെന്നും ഒരു പഠനം സൂചിപ്പിക്കുന്നു.

മാനസിക സമ്മർദ്ദം കുറയ്ക്കുന്നതിനായി സ്ഥിരമായ വ്യായാമം, ഏഴു മുതൽ ഒൻപത് മണിക്കൂർ വരെയുള്ള ഉറക്കം, അമിതമായി സംസ്കരിച്ച ഭക്ഷണം ഒഴിവാക്കുക, ഒമേഗ-3 പോലുള്ള പോഷകങ്ങൾ ഉൾപ്പെടുത്തുക, ധ്യാനം, യോഗ എന്നിവ പരിശീലിക്കുക തുടങ്ങിയ കാര്യങ്ങൾ ശീലമാക്കാൻ നിർദ്ദേശിക്കപ്പെടുന്നു. മാനസിക സമ്മർദ്ദം വർധിക്കുന്നത് തലച്ചോറിൻ്റെ പ്രവർത്തനങ്ങളെ സാരമായി ബാധിക്കുമെന്ന വസ്തുത ഓർമ്മശക്തി സംരക്ഷണത്തിനായുള്ള ശ്രദ്ധിക്കേണ്ടതിൻ്റെ ആവശ്യകത അടിവരയിടുന്നു.