ഇന്ത്യൻ സമ്പദ് വ്യവസ്ഥ ഈ വർഷം 9.5 ശതമാനം വളർന്നേക്കും; അടുത്ത കൊല്ലം 8.5 ശതമാനവുമെന്ന് ഐ.എം.എഫ്.
ന്യൂഡൽഹി: ഇന്ത്യൻ സമ്പദ്വ്യവസ്ഥയുടെ ഇക്കൊല്ലത്തെയും അടുത്തകൊല്ലത്തെയും പ്രതീക്ഷിത വളർച്ചാനിരക്കുകൾ പുറത്തുവിട്ട് ഐ.എം.എഫ്. (ഇന്റർനാഷണൽ മോണിറ്ററി ഫണ്ട്).
കോവിഡ് 19-നെ തുടർന്ന് 7.3 ശതമാനമായി ചുരുങ്ങിയ ഇന്ത്യൻ സമ്പദ്വ്യവസ്ഥ 2021-ൽ 9.5 ശതമാനവും 2022-ൽ 8.5 ശതമാനവും വളർച്ച നേടുമെന്ന് ഐ.എം.എഫ്. പുറത്തിറക്കിയ വേൾഡ് എക്കണോമിക് ഔട്ലുക്(ഡബ്ല്യൂ.ഇ.ഒ.) പറയുന്നു. ജൂലൈയിൽ പുറത്തിറക്കിയ ഡബ്ല്യൂ.ഇ.ഒയിലേതിന് സമാനമാണ് ഇന്ത്യയുടെ പ്രതീക്ഷിത വളർച്ചാനിരക്ക്.
ഐ.എം.എഫിന്റെയും വേൾഡ് ബാങ്കിന്റെയും വാർഷിക യോഗത്തിനു മുന്നോടിയായി പുറത്തിറക്കിയിരിക്കുന്ന ഡബ്ല്യൂ.ഇ.ഒയിൽ, ലോക സമ്പദ്വ്യവസ്ഥ 2021-ൽ 5.9 ശതമാനവും 2022-ൽ 4.9 ശതമാനവും വളരുമെന്നും പറയുന്നു.
2021-ൽ ഐ.എം.എഫ്. കണക്കാക്കുന്ന അമേരിക്കയുടെ പ്രതീക്ഷിത വളർച്ചാനിരക്ക് ആറു ശതമാനമാണ്. 2022-ൽ അമേരിക്കൻ സമ്പദ്വ്യവസ്ഥ 5.2 ശതമാനം വളർച്ച നേടിയേക്കുമെന്നും ഡബ്ല്യൂ.ടി.ഒയിൽ പറയുന്നു. അതേസമയം, ചൈന 2021-ൽ എട്ടുശതമാനം വളർച്ച നേടിയേക്കുമെന്നും ഇത് അടുത്തകൊല്ലം 5.6 ശതമാനം ആകുമെന്നും ഡബ്ല്യൂ.ടി.ഒ. പറയുന്നു.
