ഷാർജ: ഐപിഎൽ പതിനാലാം സീസണിൽ തോൽവിഭാരം ഒഴിവാക്കാനാകാതെ സൺറൈസേഴ്സ് ഹൈദരാബാദ്. 19 റൺസിന് മൂന്ന് വിക്കറ്റും 29 പന്തിൽ 47 റൺസും നേടി ഓൾറൗണ്ട് മികവുമായി ജേസൻ ഹോൾഡർ മിന്നും പ്രകടനം പുറത്തെടുത്തിട്ടും അഞ്ച് റൺസിന്റെ തോൽവി പഞ്ചാബ് കിങ്‌സിനോട് ഹൈദരാബാദ് ഇരന്നുവാങ്ങി.

126 റൺസ് വിജയലക്ഷ്യം പിന്തുടർന്ന ഹൈദരാബാദിന്റെ പോരാട്ടം 20 ഓവറിൽ ഏഴ് വിക്കറ്റിന് 120 റൺസെന്ന നിലയിൽ അവസാനിച്ചു. 29 പന്തിൽ 47 റൺസെടുത്ത ജേസൻ ഹോൾഡറുടെ പോരാട്ടം പാഴായപ്പോൾ മൂന്ന് വിക്കറ്റുമായി രവി ബിഷ്ണോയിയും രണ്ട് പേരെ മടക്കി മുഹമ്മദ് ഷമിയും ഒരു വിക്കറ്റുമായി അർഷ്ദീപ് സിംഗും പഞ്ചാബിന് ജയമൊരുക്കുകയായിരുന്നു. അതേസമയം എല്ലിസിന്റെ അവസാന ഓവർ ത്രില്ലർ ഷോയായി.

ജയിക്കാമായിരുന്ന മത്സരമായിരുന്നിട്ടും ഹൈദരാബാദ് പൊരുതാതെ കീഴടങ്ങുകയായിരുന്നു. മുഹമ്മദ് ഷമി തുടക്കത്തിലെ സൺറൈസേഴ്സിനെ പ്രതിരോധത്തിലാക്കി. ഓപ്പണർ ഡേവിഡ് വാർണറും(3 പന്തിൽ 2), നായകൻ കെയ്ൻ വില്യംസണും(6 പന്തിൽ 1) ഷമിക്ക് മുന്നിൽ മൂന്ന് ഓവറുകൾക്കിടെ വീണു. പവർപ്ലേയിൽ 20/2 എന്ന സ്‌കോറിലായിരുന്നു സൺറൈസേഴ്സ്. പ്ലേയിങ് ഇലവനിൽ അവസരം ലഭിച്ച സ്പിന്നർ രവി ബിഷ്ണോയ് കളി പഞ്ചാബിന്റെ വരുതിയിലാക്കുന്നതാണ് പിന്നീട് കണ്ടത്.

എട്ടാം ഓവറിൽ മനീഷ് പാണ്ഡെയെയും 13-ാം ഓവറിൽ കേദാർ ജാദവിനെയും അബ്ദുൾ സമദിനേയും പുറത്താക്കി. മനീഷും(23 പന്തിൽ 13), കേദാറും(12 പന്തിൽ 12) ബൗൾഡും സമദ്(2 പന്തിൽ 1) ഗെയ്ലിന്റെ ക്യാച്ചിലുമാണ് മടങ്ങിയത്. ഇതോടെ ഹൈദരാബാദ് 60/5 എന്ന നിലയിൽ പരുങ്ങി. എന്നാൽ സാഹയ്ക്കൊപ്പം ചേർന്ന ഹോൾഡർ സിക്സറുകളുമായി ബാറ്റിംഗിലും ആളിക്കത്തി. ഇരുവരും തമ്മിലുള്ള ആശയക്കുഴപ്പത്തിൽ സാഹ 31ൽ നിൽക്കേ റണൗട്ടായെങ്കിലും ഹോൾഡർ അടി തുടർന്നു.

അവസാന രണ്ട് ഓവറിൽ സൺറൈഡേഴ്സിന് 21 റൺസാണ് ജയിക്കാൻ വേണ്ടിയിരുന്നത്. ഭുവനേശ്വറിനെ കൂട്ടുപിടിച്ച് ഹോൾഡർ പരമാവധി പരിശ്രമിച്ചെങ്കിലും അർഷ്ദീപിന്റെയും എല്ലിസിന്റേയും സ്ലോ ബോളുകൾ പഞ്ചാബിന് ജയമൊരുക്കി. ഹോൾഡർ 29 പന്തിൽ അഞ്ച് സിക്സറുകൾ സഹിതം 47 ഉം ഭുവി നാല് പന്തിൽ മൂന്നും റൺസുമായി പുറത്താകാതെ നിന്നു.

നേരത്തെ ടോസ് നഷ്ടപ്പെട്ട് ആദ്യം ബാറ്റ് ചെയ്ത പഞ്ചാബ് ക്രിസ് ഗെയ്ൽ തിരിച്ചെത്തിയിട്ടും സൺറൈസേഴ്സ് ബൗളർമാർക്ക് മുന്നിൽ വിയർത്തപ്പോൾ 20 ഓവറിൽ ഏഴ് വിക്കറ്റിന് 125 റൺസേ എടുത്തുള്ളൂ. 27 റൺസെടുത്ത എയ്ഡൻ മർക്രാമാണ് ടോപ് സ്‌കോറർ. നാല് ഓവറിൽ 19 റൺസ് മാത്രം വിട്ടുകൊടുത്ത് മൂന്ന് വിക്കറ്റുമായി ജേസൻ ഹോൾഡറാണ് പഞ്ചാബിനെ ചെറിയ സ്‌കോറിൽ പൂട്ടിയത്.

ഷാർജ ക്രിക്കറ്റ് സ്റ്റേഡിയത്തിൽ മത്സരത്തിന്റെ തുടക്കം ഹൈദരാബാദിന് മേൽക്കൈ നൽകുന്ന രീതിയിൽ ജേസൻ ഹോൾഡർ മിന്നും പ്രകടനമാണ് പുറത്തെടുത്തത്. അഞ്ചാം ഓവറിൽ പന്തെടുത്ത ഹോൾഡർ ഓപ്പണർമാരെ അഞ്ച് പന്തുകളുടെ ഇടവേളയിൽ മടക്കി. കെ എൽ രാഹുൽ 21 പന്തിൽ അത്രതന്നെ റൺസെടുത്തും മായങ്ക് അഗർവാൾ ആറ് പന്തിൽ അഞ്ച് റൺസുമെടുത്താണ് കൂടാരം കയറിയത്. പവർപ്ലേ പൂർത്തിയാകുമ്പോൾ രണ്ട് വിക്കറ്റിന് 29 റൺസ് മാത്രമാണ് ടീമിനുണ്ടായിരുന്നത്.

ടീമിലേക്കെത്തിയ ക്രിസ് ഗെയ്ൽ(17 പന്തിൽ 14) കൂറ്റൻ ഷോട്ടുകൾക്ക് മടിച്ചപ്പോൾ 11-ാം ഓവറിൽ റാഷിദ് ഖാൻ എൽബിയിൽ കുരുക്കൊരുക്കി. മറ്റൊരു വിൻഡീസ് വെടിക്കെട്ട് വീരൻ നിക്കോളാസ് പുരാനെ നിലയുറപ്പിക്കാൻ സന്ദീപ് ശർമ്മയും അനുവദിച്ചില്ല. 12-ാം ഓവറിൽ തുടർച്ചയായ രണ്ടാം സിക്സറിന് ശ്രമിച്ച പുരാനെ(4 പന്തിൽ എട്ട്) സന്ദീപ് റിട്ടേൺ ക്യാച്ചിൽ പറഞ്ഞയച്ചു. ഒരുവശത്ത് കാലുറപ്പിക്കുമെന്ന് തോന്നിയ എയ്ഡൻ മർക്രാം 32 പന്തിൽ 27 റൺസെടുത്ത് അബ്ദുൾ സമദിന് മുന്നിൽ കീഴടങ്ങിയതോടെ പഞ്ചാബ് 15 ഓവറിൽ 93/5 എന്ന നിലയിൽ വലിയ പ്രതിരോധത്തിലായി.

അവസാന അഞ്ച് ഓവറിൽ പഞ്ചാബ് കിങ്സ് 32 റൺസ് മാത്രമാണ് നേടിയത്. 16-ാം ഓവറിൽ ഹോൾഡർ വീണ്ടും മിന്നലായി. ഇതോടെ ദീപക് ഹൂഡ 10 പന്തിൽ 13 റൺസിൽ വീണു. ഹർപ്രീത് ബ്രാറും നേഥൻ എല്ലിസും പഞ്ചാബിനെ 17-ാം ഓവറിൽ 100 കടത്തി. അവസാന ഓവറിൽ വെടിക്കെട്ടിനുള്ള ശ്രമത്തിനിടെ നേഥൻ എല്ലിസ്(12 പന്തിൽ 12) ഭുവിക്ക് മുന്നിൽ കീഴടങ്ങി. 20 ഓവർ പൂർത്തിയാകുമ്പോൾ ഹർപ്രീത് ബ്രാറും മുഹമ്മദ് ഷമിയും പുറത്താകാതെ നിന്നു.

ഐപിഎൽഹൈദരാബാദ്

സ്പോർട്സ് ഡെസ്ക്

    സ്പോർട്സ് ഡെസ്ക്