സെന്റ് പാട്രിക്‌സ്‌ഡേ പരേഡില്‍നിറസാന്നിധ്യമായി നീനാ കൈരളി - നീനാ ക്രിക്കറ്റ് ക്ലബ്
നീനാ (കൗണ്ടി ടിപ്പററി) : അയര്‍ലണ്ടിലെ ചരിത്രപ്രസിദ്ധമായ സെന്റ് പാട്രിക്‌സ് ദിനാഘോഷത്തോടനുബന്ധിച്ച് നീനയില്‍ നടന്ന പരേഡില്‍ നിറസാന്നിധ്യമായി മലയാളി സമൂഹം.നീനാ കൈരളി അസോസിയേഷനും നീനാ ക്രിക്കറ്റ് ക്ലബും സംയുക്തമായാണ് പരേഡില്‍ അണിനിരന്നത്.കുട്ടികളും മുതിര്‍ന്നവരും പരമ്പരാഗത രീതിയിലുള്ള വസ്ത്രങ്ങള്‍ ധരിച്ച് അണിനിരന്നത് നയന മനോഹരമായിരുന്നു .നീനാ ക്രിക്കറ്റ് ക്ലബ് അംഗങ്ങള്‍ ജേഴ്‌സി ധരിച്ച് ബാറ്റും ബോളുമായി നീങ്ങുന്നത് വ്യത്യസ്തമായ കാഴ്ചയായി.
പരമ്പരാഗതമായ വസ്ത്രങ്ങള്‍ ധരിച്ചുള്ള കുട്ടികളുടെ ഭരത നാട്യം,ബാന്‍ഡ് മേളം എന്നിവ കാണികളെ ആവേശോജ്ജുലരാക്കി.ബാന്‍ഡ് മേളത്തിനും, ഭരതനാട്യത്തിനുമൊപ്പം ചുവടുകള്‍ വച്ചും,ക്രിക്കറ്റ് ബാറ്റിലേയ്ക്ക് ബോളുകള്‍ പാസ് ചെയ്തും കാണികളും പിന്തുണ നല്‍കിയതോടെ ആവേശം ഇരട്ടിയായി.ഇരുനൂറിലധികം ആളുകളുടെ പങ്കാളിത്തം കൊണ്ട് പരേഡില്‍ തങ്ങളുടേതായ വ്യക്തിമുദ്ര പതിപ്പിക്കാന്‍,നീനാ കൈരളി-ക്രിക്കറ്റ് ക്ലബ്ബിനായി. പരേഡില്‍ പങ്കെടുത്ത എല്ലാ മെമ്പേഴ്‌സിനും നീനാ കൈരളി,ക്രിക്കറ്റ് ക്ലബ് ഭാരവാഹികള്‍ നന്ദി അറിയിച്ചു.
വാര്‍ത്ത : ജോബി മാനുവല്‍
