പ്രധാനമന്ത്രിയെ വിമർശിച്ചതിന് അറസ്റ്റിലായ ജിഗ്‌നേഷ് മേവാനിക്ക് ജാമ്യം; ദലിത് നേതാവിന് ജാമ്യം അനുവദിച്ചത് കൊക്രജാർ കോടതി
ഗുവാഹത്തി: പ്രധാനമന്ത്രിക്കെതിരെ ട്വീറ്റ് ചെയ്തതിന് അറസ്റ്റിലായ ഗുജറാത്ത് എംഎൽഎയും ദലിത് നേതാവുമായ ജിഗ്‌നേഷ് മേവാനിക്ക് ജാമ്യം. അസമിലെ കൊക്രജാർ കോടതിയാണ് ജിഗ്‌നേഷ് മേവാനിക്ക് ജാമ്യം നൽകിയത്.
ഗോഡ്സെയെ ദൈവമായി കാണുന്ന പ്രധാനമന്ത്രി ഗുജറാത്തിലെ വർഗീയ സംഘർഷങ്ങൾ ഇല്ലാതാക്കി സമാധാനത്തിനും സൗഹാർദ്ദത്തിനും അഭ്യർത്ഥിക്കണമെന്നായിരുന്നു ജിഗ്‌നേഷ് മേവാനിയുടെ ട്വീറ്റ്. സമൂഹത്തിൽ സ്പർധയുണ്ടാക്കാൻ ശ്രമിച്ചെന്ന് കാട്ടി അസം സ്വദേശി അനുപ് കുമാർ ദേ എന്നയാൾ മേവാനിക്കെതിരെ പരാതി നൽകിയെന്നാണ് പൊലീസ് ഭാഷ്യം.
അനൂപ് കുമാർ ദേയുടെ പരാതിയിൽ പൊലീസ് ബുധനാഴ്ച അറസ്റ്റ് ചെയ്ത ജിഗ്‌നേഷ് മേവാനിയെ ഒരുദിവസത്തെ ജുഡീഷ്യൽ കസ്റ്റഡിയിൽ വിട്ടിരിക്കുകയായായിരുന്നു. ചീഫ് ജുഡീഷ്യൽ മജിസ്ട്രേറ്റ് (സി.ജെ.എം) കോടതി ജുഡീഷ്യൽ കസ്റ്റഡിയിൽ വിട്ടതിനെ തുടർന്ന് മേവാനിയെ കൊക്രജാർ ജയിലിലേക്ക് ആദ്യം കൊണ്ടുപോയി. മൂന്നുദിവസത്തെ പൊലീസ് കസ്റ്റഡി ഞായറാഴ്ച അവസാനിച്ചതിനെത്തുടർന്ന് ഇന്ന് കോടതിയിൽ ഹാജരാക്കുകയായിരുന്നു.
