ഉദ്ഘാടനം ചെയ്യാൻ രാഹുൽ ഗാന്ധിയെ കാത്ത് കണ്ണൂർ ഡിസിസി ഓഫിസ്; വിവാദങ്ങൾക്കിടെയിലും കരപിടിപ്പിച്ച് പാച്ചേനി

കണ്ണൂർ: പാർട്ടിക്കുള്ളിലും പുറത്തും ഏറെ വിവാദങ്ങൾ സൃഷ്ടിച്ച കണ്ണൂർ ഡി.സി.സി ഓഫിസ് ഉദ്ഘാടത്തിനൊരുങ്ങി. 6,500 ചതുരശ്ര അടി വിസ്തീർണത്തിൽ നിർമ്മിക്കുന്ന ഓഫിസ് സമുച്ചയത്തിന്റെ മൂന്നുനിലകളിൽ രണ്ടുനിലകളുടെ രണ്ടുനിലകളുടെ നിർമ്മാണ പ്രവൃത്തിയാണ് ഇപ്പോൾ പൂർണമായും പൂർത്തീകരിച്ചിട്ടുള്ളത്. വിശാലമായ പാർക്കിങ് സൗകര്യവും ഒരുക്കിയിട്ടുണ്ട്.

താഴത്തെ നിലയിൽ അത്യാധൂനിക സജ്ജീകരണത്തോടു കൂടിയുള്ള കോൺഫറൻസ് ഹാളും അഖിലേന്ത്യാ നേതാക്കൾ വരെ വന്നാൽ വാർത്താ സമ്മേളനം നടത്താൻ അത്യാധൂനിക പ്രസ് കോൺഫറൻസ് ഹാളുമടക്കമുള്ള ആധുനിക സംവിധാനവും ഒരുക്കിയിട്ടുണ്ട്. എല്ലാപോഷക സംഘടനകളുടെയും ഓഫിസുകൾ പ്രവർത്തിക്കാൻ സൗകര്യപ്രദമായ റൂമുകളും നവമാധ്യമ ഇടപെടലുകൾക്കും മറ്റു ഐ.ടി സംബന്ധമായ ആവശ്യങ്ങൾക്ക് ഉപകരിക്കുന്ന പ്രത്യേക സൗകര്യങ്ങളോടു കൂടിയ സൗകര്യവും ഒരുക്കിയിട്ടുണ്ട്.

കെപിസിസി പ്രസിഡന്റ് കെ.സുധാകരന് ക്യാംപ് സൗകര്യമൊരുക്കന്നതിനു വേണ്ടി പ്രത്യേകം സജ്ജീകരിച്ച ഓഫിസ് റൂം ഉൾപ്പെടെ ജില്ലാ കോൺഗ്രസ് കമ്മിറ്റി അധ്യക്ഷന്റെ ഓഫിസ് റൂമുകളും താഴത്തെ നിലയിൽ പ്രവർത്തിക്കും. റിസ്പഷ്ൻ കൗണ്ടറും അടുക്കളയും ഗ്രൗണ്ട് ഫ്ളോറിലുണ്ട്. ഒന്നാം നിലയിൽ ആയിരം പേർക്ക് ഇരിക്കാൻ കഴിയുന്ന വിശാലമായ ഓഡിറ്റോറിയവും അഞ്ഞൂറ് സ്‌ക്വയർ ഫീറ്റ് ചുറ്റളവിൽ ആധുനിക ലൈബ്രറി സൗകര്യവും ഒരുക്കിയിട്ടുണ്ട്.

അതിഥികൾക്ക് താമസിക്കാനുള്ള റൂമുകളും ഡോർ മെറ്ററി സൗകര്യത്തിനുള്ള റൂമുകളും ഒന്നാം നിലയിൽ സജ്ജീകരിച്ചിട്ടുണ്ട്. ഓഫിസിന്റെ മുൻവശത്ത് ഗാന്ധി പ്രതിമ സ്ഥാപിക്കുന്നതിനുള്ള നടപടികളും സ്വീകരിച്ചിട്ടുണ്ട്. ഓഫിസ് നിർമ്മാണവുമായി ബന്ധപ്പെട്ട് കഴിഞ്ഞ കാലങ്ങളിൽ ഓഫിസ് നിർമ്മാണവുമായി ബന്ധപ്പെട്ട മുഴുവൻ കടബാധ്യതകളും തീർത്തതായും രാഹുൽ ഗാന്ധിയുടെ തീയ്യതികിട്ടിയാൽ ഉടൻ ഉദ്ഘാടനം നടത്തുമെന്നും ജില്ലാകോൺഗ്രസ് അധ്യക്ഷൻ സതീശൻ പാച്ചേനി അറിയിച്ചു. നിലവിലുള്ള സാമ്പത്തിക ബാധ്യത തീർക്കാൻൻ ബ്ലോക്ക് കോൺഗ്രസ് കമ്മിറ്റികളുടെ നേതൃത്വത്തിൽ നടത്തുന്ന ധനസമാഹരണം ഈമാസം പതിനഞ്ചാം തീയ്യതി തന്നെ പൂർത്തീകരിക്കും.

ജില്ലയിലെ കോൺഗ്രസ് പാർട്ടിയെ അപസ്വരങ്ങൾ ഇല്ലാതെ ഒന്നിച്ചു കൊണ്ടു പോകാൻ സാധിച്ചതും നിർമ്മാണ പ്രവൃത്തി വേഗത്തിലാക്കാൻ ഏറെ സഹായിച്ചതായി സതീശൻ പാച്ചേനി പറഞ്ഞു. ഡി.സി.സി പ്രസിഡന്റ് സതീശൻ പാച്ചേനി തന്നെ തന്റെ തളിപ്പറമ്പിലുള്ള സ്വന്തം തറവാട്വീട് വിൽപന നടത്തി ഡി.സി സി ഓഫിസ് നിർമ്മാണത്തിന് മുടക്കം വന്ന ഘട്ടത്തിൽ പണം കണ്ടെത്തിയിരുന്നു.അതിനാൽ തന്നെ പാച്ചേനി സ്ഥാനം ഒഴിയുന്നതിനു മുൻപേ തന്നെ ഡി.സി.സി ഓഫിസിന്റെ ഉദ്ഘാടനം നടത്താനാണ് ജില്ലയിലെ കോൺഗ്രസ് നേതൃത്വം ഉദ്ദ്യേശിക്കുന്നത്. രാഹുൽഗാന്ധിയുടെ തീയ്യതി കിട്ടിയാൽ ഇകൗ മാസം തന്നെ ഉദ്ഘാടനം നടത്താനാണ് ഉദ്ദ്യേശിക്കുന്നതെന്നുസതീശൻ പാച്ചേനി അറിയിച്ചു.

ഡി.സി.സി അധ്യക്ഷനായി സതീശൻ പാച്ചേനി ചുമതലയേറ്റെടുത്തതിനു ശേഷമാണ് കോൺഗ്രസ് മന്ദിരത്തിന്റെ നിർമ്മാണം അതിവേഗത്തിലായത്. അന്തരിച്ച മുൻ ഡി.സി. പ്രസിഡന്റ് കെ.സുരേന്ദ്രന്റെ നേതൃത്വത്തിൽ അടിത്തറയും താഴത്തെ നിലയുടെും നിർമ്മാണ പ്രവർത്തനങ്ങളുടെ സ്ട്രക്ചർ പൂർത്തീകരിച്ചിരുന്നു. കണ്ണൂർ തളാപ്പ് റോഡിൽ പഴയ ഡി.സി.സി ഓഫിസ് നിലനിൽക്കുന്ന സ്ഥലത്തു തന്നെയാണ് പുതിയ ഓഫിസ് നിർമ്മാണവും പൂർത്തിയായി വരുന്നത്.