സ്വപ്നയുടെ വാക്കുകൾ പ്രകോപനം ഉണ്ടാക്കി; കേസ് അന്വേഷണത്തിൽ ഇടപെടേണ്ട കാരണങ്ങളില്ല; കലാപാഹ്വാനത്തിന് ചുമത്തിയ കേസ് നിലനിൽക്കുമെന്നും ഹൈക്കോടതി; ഹർജി തള്ളിയത് തിരിച്ചടിയല്ലെന്ന് സ്വപ്നയുടെ അഭിഭാഷകൻ; അറസ്റ്റ് തടയുന്നതിൽ വിജയിച്ചെന്നും പ്രതികരണം

കൊച്ചി: ഗൂഢാലോചന, കലാപാഹ്വാന കേസുകളിൽ ബാഹ്യ ഇടപെടൽ ഉണ്ടെന്ന സ്വപ്ന സുരേഷിന്റെ ആശങ്കയ്ക്ക് അടിസ്ഥാനമില്ലെന്നും ചുമത്തിയ കുറ്റങ്ങൾ നിലനിൽക്കുമെന്നും ഹൈക്കോടതി. കേസ് രേഖകൾ പരിശോധിച്ചതിൽ നിന്നും ഒരു ബാഹ്യ ഇടപെടലും കണ്ടെത്താനായില്ല. സ്വപ്നക്കെതിരെ ചുമത്തിയ കുറ്റങ്ങൾ നിലനിൽക്കും. ഗൂഢാലോചന, കലാപാഹ്വാന കേസുകൾ റദ്ദാക്കണമെന്ന് ആവശ്യപ്പെട്ട് സ്വപ്ന സമർപ്പിച്ച ഹർജികൾ തള്ളി പുറപ്പെടുവിച്ച ഉത്തരവിലാണ് കോടതിയുടെ നിരീക്ഷണം.

സ്വപ്നയുടെ വാക്കുകൾ പ്രകോപനം ഉണ്ടാക്കി. ഈ സാഹചര്യത്തിൽ സെക്ഷൻ 153 പ്രകാരം എടുത്ത കേസ് നിലനിൽക്കും. കേസുമായി ബന്ധപ്പെട്ട് നടക്കുന്ന അന്വേഷണത്തിൽ ഇടപെടേണ്ട യുക്തിസഹമായ കാരണങ്ങളിലെന്ന് ഹൈക്കോടതി നിരീക്ഷിച്ചു. അപൂർവങ്ങളിൽ അപൂർവമായ കേസുകളിൽ മാത്രമാണ് എഫ്‌ഐആറുകൾ റദ്ദാക്കുന്നത്. സ്വപ്നയുടെ കേസുകൾ അത്തരം വിഭാഗത്തിൽ ഉൾപ്പെടുന്നതല്ലെന്നും കോടതി വ്യക്തമാക്കി.

ഗൂഢാലോചന കേസിനെതിരെയുള്ള വാദങ്ങൾ അനവസരത്തിലുള്ളതാണ്. ആരോപണങ്ങളിൽ വസ്തുതയുണ്ടോയെന്ന് അന്വേഷണത്തിലാണ് കണ്ടെത്തേണ്ടത്. അന്വേഷണം പ്രാഥമികഘട്ടത്തിലാണ്. കുറ്റപത്രം സമർപ്പിച്ച ശേഷം ആവശ്യമെങ്കിൽ കേസ് റദ്ദാക്കാൻ വീണ്ടും കോടതിയെ സമീപിക്കാമെന്ന് ജസ്റ്റിസ് സിയാദ് റഹ്‌മാൻ വ്യക്തമാക്കി.

അതേ സമയം സ്വപ്ന സുരേഷ് സമർപ്പിച്ച ഹർജികൾ തള്ളിയ ഹൈക്കോടതി നടപടി തിരിച്ചടിയല്ലെന്ന് സ്വപ്ന സുരേഷിന്റെ അഭിഭാഷകൻ ആർ കൃഷ്ണരാജ് പ്രതികരിച്ചു. നിയമപരമായി കോടതി വിധി വിജയമാണ്. അന്വേഷണം പൂർത്തിയായതിന് ശേഷം വേണമെങ്കിൽ സ്വപ്നയ്ക്ക് വീണ്ടും കോടതിയെ സമീപിക്കാം. പ്രഥമദൃഷ്ടിയാൽ അന്വേഷണത്തിൽ കൂടിയല്ലാതെ ഇത് തെളിയിക്കാൻ കഴിയില്ലെന്നാണ് കോടതി പറഞ്ഞത്. സ്വപ്നയ്‌ക്കെതിരെ പരാതി വന്ന സാഹചര്യം പരിശോധിക്കണമെന്നും ആർ കൃഷ്ണരാജ് പറഞ്ഞു.

ഗൂഢാലോചന, കലാപാഹ്വാന കേസുകൾ റദ്ദാക്കണമെന്ന് ആവശ്യപ്പെട്ട്, സ്വർണക്കടത്തു കേസിലെ പ്രതി സ്വപ്ന സുരേഷ് നൽകിയ ഹർജിയാണ് ജസ്റ്റിസ് സിയാദ് റഹ്‌മാൻ തള്ളിയത്. അന്വേഷണം പ്രാഥമിക ഘട്ടത്തിലാണെന്നു ചൂണ്ടിക്കാട്ടിയാണ് വിധി.

മുന്മന്ത്രി കെ ടി ജലീലിന്റെ പരാതിയിൽ തിരുവനന്തപുരം കന്റോൺമെന്റ് പൊലീസ് എടുത്ത ഗൂഢാലോചന കേസും പാലക്കാട് കസബ പൊലീസ് എടുത്ത കലാപാഹ്വാന കേസും റദ്ദാക്കണമെന്ന് ആവശ്യപ്പെട്ടാണ് സ്വപ്ന കോടതിയെ സമീപിച്ചത്. സ്വർണക്കടത്ത് കേസിൽ മുഖ്യമന്ത്രിക്കും കുടുംബത്തിനും പങ്കുണ്ടെന്ന് പറഞ്ഞതിനു പിന്നാലെയാണ് കേസ് എടുത്തത് എന്നും പ്രതികാര നടപടിയാണ് ഇതെന്നുമാണ് ഹർജിയിൽ ആരോപിച്ചത്.

എന്നാൽ നിക്ഷിപ്ത താൽപര്യമാണ് സ്വപ്നയുടെ രഹസ്യ മൊഴിക്ക് പിന്നിലെന്നും തെളിവുകൾ ഇല്ലാതെയാണ് മുഖ്യമന്ത്രിക്കെതിരെ ആരോപണങ്ങൾ ഉന്നയിച്ചതെന്നും ഇതിന് പിറകിൽ ഗൂഢാലോചനയുണ്ടെന്നുമായിരുന്നു സർക്കാരിന്റെ വാദം. അന്വേഷണം തുടരുന്ന ഈ ഘട്ടത്തിൽ കോടതി ഇടപെടരുതെന്നും സർക്കാർ ആവശ്യപ്പെട്ടിരുന്നു.

സ്വപ്നയെ അറസ്റ്റ് ചെയ്യുക എന്നതായിരുന്നു സർക്കാരിന്റെ ലക്ഷ്യമെന്നും അറസ്റ്റ് തടയുന്നതിൽ വിജയിച്ചുവെന്നും സ്വപ്ന സുരേഷിന്റെ അഭിഭാഷകൻ ആർ കൃഷ്ണരാജ് പറഞ്ഞു. നിയമപരമായി ഇനി അറസ്റ്റിന്റെ പ്രശ്‌നമേ ഉദിക്കുന്നില്ലെന്നും സർക്കാർ ഇക്കാര്യം ഹൈക്കോടതിയിൽ അറിയിച്ചിട്ടുണ്ടെന്നും അദ്ദേഹം കൂട്ടിച്ചേർത്തു.

സ്വപ്ന പറയുന്ന കാര്യം ശരിയാണോ, തെറ്റാണോ എന്നല്ലേ ആദ്യം കണ്ടത്തേണ്ടത്. മുഖ്യമന്ത്രിക്കെതിരായ പരാതി അട്ടിമറിക്കുന്നതിനാണ് സ്വപ്നയ്‌ക്കെതിരെ കേസെടുത്തത്. നിയമപരമായി അറസ്റ്റിന്റെ പ്രശ്‌നമേ ഉദിക്കുന്നില്ലെന്നും അത് സർക്കാർ തന്നെ കോടതിയിൽ അറിയിച്ചിട്ടുണ്ടെന്നും ആർ കൃഷ്ണരാജ് പറഞ്ഞു.

ക്ലിഫ് ഹൗസ് കേന്ദ്രീകരിച്ച് മുഖ്യമന്ത്രിയും മകളും ഭാര്യയുമടക്കം രാജ്യവിരുദ്ധ പ്രവർത്തനത്തിൽ ഏർപ്പെട്ടെന്നും കോൺസുൽ ജനറൽ ക്ലിഫ് ഹൗസിലേക്ക് ബിരിയാണി ചെമ്പിൽ ലോഹ വസ്തുക്കൾ കൊടുത്തയച്ചെന്നതടക്കമുള്ള മൊഴികളാണ് സ്വപ്ന 164 പ്രകാരം നൽകിയിട്ടുള്ളത്. മുന്മന്ത്രി കെ.ടി.ജലീൽ, മുൻ സ്പീക്കർ പി.ശ്രീരാമകൃഷ്ണൻ എന്നിവർക്കെതിരെയും 164ൽ വെളിപ്പെടുത്തലുകളുണ്ടായിരുന്നു. ഇത് മാധ്യമങ്ങൾക്ക് മുന്നിൽ സ്വപ്ന വെളിപ്പെടുത്തിയതിന് പിന്നാലെയാണ് ജലീൽ നൽകിയ പരാതിയിൽ സ്വപ്നയ്‌ക്കെതിരെ ഗൂഢാലോചന കേസെടുത്തത്.