തൃശൂർ: കുതിരാൻ തുരങ്കത്തിലൂടെ ടിപ്പർ ലോറി പിറകിലെ ഭാഗം ഉയർത്തി ഓടിച്ച് ലൈറ്റുകളും ക്യമാറകളും തകർത്തു. 90 മീറ്റർ ദൂരത്തിൽ 104 ലൈറ്റുകളും പാനലുകളും പത്ത് സുരക്ഷാ ക്യാമറകൾ, പൊടിപടലങ്ങൾ തിരിച്ചറിയാനുള്ള സെൻസറുകൾ എന്നിവ പൂർണ്ണമായും തകർന്നു. പത്തുലക്ഷം രൂപയുടെ നാശനഷ്ടമാണ് കണക്കാക്കുന്നത്. ഇടിച്ച ശേഷം ലോറി നിർത്താതെ ഓടിച്ചു പോയി. സംഭവത്തിൽ പൊലീസ് അന്വേഷണം തുടങ്ങി.

കുതിരാൻ ഒന്നാം തുരങ്കത്തിൽ ഇന്നലെ രാത്രിയിലാണ് സംഭവം. രാത്രി 8.50 ഓടെയാണ് പാലക്കാട് ഭാഗത്ത് നിന്നെത്തിയ ടിപ്പർ ലോറി ബക്കറ്റ് ഉയർത്തിവെച്ച് തുരങ്കത്തിലൂടെ കടന്നുപോയത്. ടിപ്പർ ലോറിയുടെ സിസിടിവി ദൃശ്യങ്ങൾ ലഭിച്ചിട്ടുണ്ട്.

തുരങ്കത്തിലെ ലൈറ്റുകൾ മനഃപൂർവ്വം തകർത്തതാണോ എന്നത് വ്യക്തമല്ല. സിസിടിവിയിൽ നിന്ന് ടിപ്പർലോറിയുടെ ദൃശ്യങ്ങൾ ലഭിച്ചിട്ടുണ്ടെങ്കിലും നമ്പർ വ്യക്തമല്ലെന്നാണ് അധികൃതർ പറയുന്നത്.

ലൈറ്റുകൾ തകർന്ന് വീഴുന്നതിന്റെ ശബ്ദം കേട്ട് ടിപ്പർ നിർത്തുകയും പിന്നീട് പിൻഭാഗം താഴ്‌ത്തിയ ശേഷം നിർത്താതെ ഓടിച്ചുപോകുകയും ചെയ്തു. സംഭവത്തിൽ പൊലീസ് കേസെടുത്ത് അന്വേഷണം ആരംഭിച്ചു. ടിപ്പറിനായുള്ള തിരച്ചിലും തുടങ്ങിയതായി പൊലീസ് അറിയിച്ചു.

അതേ സമയം ലൈറ്റുകൾ തകർന്നത് തുരങ്കത്തിലൂടെയുള്ള ഗതാഗതത്തെ ബാധിച്ചിട്ടില്ല. രണ്ടാം തുരങ്കം കഴിഞ്ഞ ദിവസം തുറന്നതോടെ ഒന്നാം തുരങ്കത്തിലെ ഗതാഗത കുരുക്ക് കുറഞ്ഞിരുന്നു. ലൈറ്റുകൾ തകർന്ന ഭാഗത്ത് ബാരിക്കേഡ് വെച്ച് അധികൃതർ ഒരു ഭാഗത്ത് കൂടിയാണ് വാഹനങ്ങൾ കടത്തിവിടുന്നത്.

കുതിരാൻ തുരങ്കം തുറന്നതിനുശേഷം ആദ്യമായാണ് ഇങ്ങനെയൊരു അപകടം ഉണ്ടാകുന്നത്. പാലക്കാട് തൃശൂർ തുരങ്കത്തിന്റെ ആദ്യഭാഗത്തെ ലൈറ്റുകളാണ് തകർന്നത്. കുതിരാൻ തുരങ്കത്തിലേക്കു പ്രവേശിക്കുന്നതിനു മുൻപ് തന്നെ ലോറിയുടെ പുറംഭാഗം ഉയർന്നിരുന്നു. എന്നാൽ ഇക്കാര്യം ഡ്രൈവർ ശ്രദ്ധിച്ചില്ല. പിന്നിലുള്ള വാഹനങ്ങൾ അകലം പാലിച്ചതിനാൽ മറ്റ് അപകടങ്ങളൊന്നും ഉണ്ടായില്ല.

മറുനാടന്‍ മലയാളി

    മറുനാടന്‍ മലയാളി ബ്യൂറോ