വക്കം മൗലവിയുടെ സമ്പൂര്‍ണ്ണ കൃതികളുടെ പ്രകാശനവും നവോത്ഥാന സമ്മേളനവും സെപ്തംബര്‍ 12 ന് മസ്ജിദുല്‍ കബീറില്‍
കുവൈത്ത് സിറ്റി : വക്കം മൗലവി സമ്പൂര്‍ണ്ണ കൃതികളുടെ മിഡില്‍ ഈസ്റ്റ് തല പുസ്തക പ്രകാശനവും നവോത്ഥാന സമ്മേളനവും സെപ്തംബര്‍ 12 ന് വെള്ളിയാഴ്ച വൈകുന്നേരം 6.30 മണിക്ക് മസ്ജിദുല്‍ കബീറില്‍ നടക്കും. ഇന്ത്യന്‍ ഇസ്ലാഹീ സെന്റര്‍ കുവൈത്തും യുവതയും സംയുക്തമായാണ് വക്കം അബ്ദുല്‍ ഖാദര്‍ മൗലവിയുടെ സമ്പൂര്‍ണ രചന കൈരളിക്ക് സമ്മാനിക്കുന്നത്.
സ്വാതന്ത്ര്യസമര പോരാട്ടത്തിനും സ്ത്രീശാക്തീകരണത്തിനും മതനവീകരണത്തിനും സാമുദായിക മുന്നേറ്റത്തിനും മൗലവിയുടെ തൂലികയില്‍ നിന്ന് പിറന്നത് അക്ഷരജ്വാലകളായിരുന്നു. ആഗോള ഇസ് ലാമിക ചലനങ്ങളെ കേരള മുസ് ലിം നവോത്ഥാന ശ്രമങ്ങളില്‍ ഫലപ്രദമായി ഉപയോഗപ്പെടുത്തുന്നതില്‍ വിജയിച്ച ഒരാള്‍ കൂടിയാണ് വക്കം മൗലവി. കേരള മുസ് ലിം നവോത്ഥാനത്തിന്റെ പിതാവായി വിശേഷിപ്പിക്കപ്പെടുന്ന മൗലവിയുടെ കാഴ്ചപ്പാടുകള്‍ ഒരു കാലത്തെ രൂപപ്പെടുത്തുകയും പുതിയ കാലത്തേക്ക് സമുദായത്തെ അതിജീവിപ്പിക്കുകയും ചെയ്തതായി കാണാം. കേരളീയ മുസ് ലിം മുന്നേറ്റത്തിന്റെ ചരിത്രമന്വേഷിക്കുന്നവര്‍ മൗലവിയുടെ പൂര്‍ണമായ രചനകളെ കാണാതെ പോകരുത്. മൗലവിയുടെ മൗലികമായ രചനകളെ പൂര്‍ണമായും വായിക്കുകയോ കാണുകയോ പോലും ചെയ്യാതെ വിമര്‍ശനം ഉന്നയിക്കുന്നവരെ അടുത്തിടെ ശ്രദ്ധയില്‍പെടുകയുണ്ടായി. പുതിയ കാലത്തും വ്യാഖ്യാന സാധ്യതകള്‍ അവശേഷിപ്പിക്കുന്ന മൗലവിയുടെ പുസ്തകങ്ങളും ലേഖന സമാഹാരങ്ങളും മുഴുവന്‍ വായിച്ച് സത്യസന്ധമായ ഗവേഷണങ്ങള്‍ നടക്കട്ടെ.
നവോത്ഥാന സമ്മേളനത്തില്‍ യുവപണ്ഡിതനും പ്രഭാഷകനുമായ റിഹാസ് പുലാമന്തോള്‍ മുഖ്യ പ്രഭാഷണം നടത്തും. ഔക്കാഫിന്റെയും വിവിധ സംഘടനകളുടെയും പ്രതിനിധികള്‍ സമ്മേളനത്തില്‍ പങ്കെടുക്കും.
സംഗമത്തില്‍ വെച്ച് സമ്പൂര്‍ണ്ണ കൃതികളുടെ സമാഹാരം വാങ്ങാന്‍ സൌകര്യം ഉണ്ടായിരിക്കും. വിശദ വിവരങ്ങള്‍ക്ക് ബന്ധപ്പെടുക- 6582 9673, 9782 7920
