19-ആം ദേശിയ വടംവലി മത്സരത്തിനുള്ള പെരുമ്പറ മുഴങ്ങി, തനിമ കുവൈത്ത് ഓണത്തനിമ'25 പോസ്റ്റര്‍ പ്രകാശനം ചെയ്തു
കുവൈത്തിലെ പ്രമുഖ്യ കലാസാംസ്‌കാരികസംഘടനയായ തനിമ കുവൈത്ത് നവംബര്‍ 28 നു അബ്ബാസ്സിയ ഇന്റഗ്രേറ്റഡ് സ്‌കൂള്‍ ഫ്‌ളഡ് ലൈറ്റ് സ്റ്റേഡിയത്തില്‍ സംഘടിപ്പിക്കുന്ന വൈവിധ്യമാര്‍ന്ന ഓണത്തനിമ'25 ന്റെ പോസ്റ്റര്‍ നൈസ് ഹാളില്‍ നടന്ന ചടങ്ങില്‍ പ്രൊഗ്രാം കണ്‍വീനര്‍ ബിനില്‍ സ്‌കറിയയില്‍ നിന്ന് ഷഫാസ് അഹമ്മദ് ഏറ്റുവാങ്ങി പ്രകാശന കര്‍മ്മം നിര്‍വ്വഹിച്ചു.
കുവൈത്ത് പ്രവാസികള്‍ ആകാംക്ഷയോടെ കാത്തിരിക്കുന്ന 19 ആം ദേശിയ വടംവലി മത്സരം, പേള്‍ ഓഫ് ദി സ്‌കൂള്‍ അവാര്‍ഡുകള്‍, നാടിനെ ഓര്‍മ്മിപ്പിക്കും വിധം നിറപ്പകിട്ടാര്‍ന്ന ഘോഷയാത്രയടക്കം തികച്ചും വ്യത്യസ്തമായ പരിപാടികളാണ് തമിമ ഒരുക്കുന്നതെന്ന് പ്രോഗ്രാം കണ്‍വീനര്‍ ബിനില്‍ സ്‌കറിയ അറിയിച്ചു. തനിമയുടെ സാംസ്‌കാരിക സാമൂഹിക സേവനങ്ങള്‍ക്ക് സര്‍വ്വപിന്തുണയും നല്‍കുന്നതായും തനിമയുമായ് ചേര്‍ന്ന് നില്‍കുന്നതില്‍ അഭിമാനിക്കുന്നതായും ഷഫാസ് അഹമ്മദ് ആശംസാപ്രസംഗത്തില്‍ അറിയിച്ചു. ആവേശോജ്വലമായ 19-ആം ദേശീയ വടംവലി മത്സരത്തിന്റെ രെജിസ്‌റ്റ്രേഷന്‍ ആരംഭിച്ചതായ് സ്‌പോര്‍ട്‌സ് കണ്‍വീനര്‍ ജിന്‍സ് മാത്യു അറിയിച്ചു.
തനിമ കണ്‍വീനര്‍ ജോജിമോന്‍ തോമസ് അധ്യക്ഷത വഹിച്ച ചടങ്ങില്‍ ഓഫീസ് സെക്രെട്ടറി ജിനു കെ. അബ്രഹാം സ്വാഗതം ആശംസിച്ചു. സീനിയര്‍ ഹാര്‍ഡ്‌കോര്‍ അംഗങ്ങളായ ബാബുജി ബത്തേരി, ജേക്കബ് വര്‍ഗീസ്, ദിലീപ് ഡികെ, ഉഷ ദിലീപ്, മുബാറക്ക് കാമ്പ്രത്ത്, കുമാര്‍ തൃത്താല, റാണ വര്‍ഗീസ് എന്നിവര്‍ ആശംസകള്‍ അറിയിച്ചു. ജോയിന്റ് കണ്‍വീനര്‍ വിജേഷ് വേലായുധന്‍ നന്ദി അറിയിച്ചു.
