രഹസ്യ വിവരത്തെ തുടർന്ന് ഇരച്ചെത്തിയ പോലീസ്; കുട്ടികളുടെ ഭക്ഷണസാധനങ്ങൾ നിർമ്മിക്കുന്ന വ്യാജ ഫാക്ടറിയിൽ കണ്ടത്; 12 പേർ അറസ്റ്റിലായി
കുവൈറ്റ്: കുവൈത്തിലെ ജലീബ് അൽ ഷുയൂഖിൽ ഒരു വീടിനുള്ളിൽ നിയമവിരുദ്ധമായി പ്രവർത്തിച്ചുവന്നിരുന്ന വ്യാജ ശിശുഭക്ഷണ നിർമ്മാണശാലയും സംഭരണ കേന്ദ്രവും ആഭ്യന്തര മന്ത്രാലയത്തിലെ ക്രിമിനൽ സെക്യൂരിറ്റി വിഭാഗം കണ്ടെത്തി. സംഭവവുമായി ബന്ധപ്പെട്ട് വിവിധ അറബ്, ഏഷ്യൻ രാജ്യങ്ങളിൽ നിന്നുള്ള 12 പേരെ പോലീസ് അറസ്റ്റ് ചെയ്തു.
അങ്ങേയറ്റം വൃത്തിഹീനമായ സാഹചര്യത്തിലാണ് ഈ ഫാക്ടറി പ്രവർത്തിച്ചിരുന്നത്. നിയമപരമായ ലൈസൻസുകളോ ആരോഗ്യ സുരക്ഷാ മാനദണ്ഡങ്ങളോ പാലിക്കാതെയായിരുന്നു ഇവിടെ ഭക്ഷണസാധനങ്ങൾ നിർമ്മിച്ചിരുന്നത്. വ്യാവസായിക യന്ത്രങ്ങളും പാക്കേജിംഗ് സാമഗ്രികളും ഉപയോഗിച്ച് ഇവിടെ പാക്ക് ചെയ്യുന്ന ഭക്ഷണസാധനങ്ങൾ രാജ്യത്തെ പ്രമുഖ സഹകരണ സംഘങ്ങളിൽ വിതരണം ചെയ്യാനായിരുന്നു സംഘത്തിന്റെ ലക്ഷ്യം.
ഉൽപ്പാദനം ലൈസൻസുള്ള മറ്റ് കേന്ദ്രങ്ങളിലാണ് നടക്കുന്നതെന്ന് അധികാരികളെ തെറ്റിദ്ധരിപ്പിച്ചായിരുന്നു ഈ വീടിനുള്ളിലെ പ്രവർത്തനം. രഹസ്യ വിവരം ലഭിച്ചതിനെത്തുടർന്ന് വിവിധ സർക്കാർ വകുപ്പുകളുടെ ഏകോപനത്തോടെ നടത്തിയ പരിശോധനയിലാണ് ഈ വ്യാജകേന്ദ്രം കണ്ടെത്തിയത്. അറസ്റ്റിലായ 12 പ്രതികളെയും തുടർ നിയമനടപടികൾക്കായി അധികൃതർക്ക് കൈമാറിയിട്ടുണ്ട്. നിയമവിരുദ്ധമായി പ്രവർത്തിച്ചുവന്ന ഈ ഫാക്ടറിയുടെ കണ്ടെത്തൽ രാജ്യത്തെ ഭക്ഷ്യസുരക്ഷാ നടപടികളുടെ പ്രാധാന്യം ഊട്ടിയുറപ്പിക്കുന്നതാണ്.
