പൊലീസ് തലപ്പത്ത് അഴിച്ചുപണി; സി എച്ച് നാഗരാജുവിന് മാറ്റം; ഐജി സ്പര്‍ജന്‍ കുമാര്‍ തിരുവനന്തപുരം കമ്മീഷണര്‍; അങ്കിത് അശോകന് വീണ്ടും നിയമനം
തിരുവനന്തപുരം: സംസ്ഥാനത്തെ പൊലീസ് തലപ്പത്ത് അഴിച്ചുപണി. തിരുവനന്തപുരം സിറ്റി പൊലീസ് കമ്മീഷണര്‍ സി എച്ച് നാഗരാജുവിനെ തല്‍സ്ഥാനത്ത് നിന്ന് മാറ്റി. ദക്ഷിണ മേഖലാ ഐജി സ്പര്‍ജന്‍കുമാറിന് തിരുവനന്തപുരം സിറ്റി പൊലീസ് കമ്മിഷണറുടെ ചുമതല നല്‍കി.
പൊലീസ് ഹൗസിങ് ആന്‍ഡ് കണ്‍സ്ട്രക്ഷന്‍ കോര്‍പറേഷന്‍ സിഎംഡി ഡോ.സഞ്ജീബ് കുമാര്‍ പട്‌ജോഷിയെ മനുഷ്യാവകാശ കമ്മിഷന്‍ ഡിജിപിയായി നിയമിച്ചു. തിരുവനന്തപുരം സിറ്റി പൊലീസ് കമ്മിഷണര്‍ സി.എച്ച്.നാഗരാജുവാണു കോര്‍പറേഷന്റെ പുതിയ സിഎംഡി.
ദക്ഷിണ മേഖലാ ഐജി ആയിരുന്ന സ്പര്‍ജന്‍കുമാര്‍ മുന്‍പും തിരുവനന്തപുരം സിറ്റി പൊലീസ് കമ്മിഷണറായി സേവനമനുഷ്ഠിച്ചിട്ടുണ്ട്. ദക്ഷിണ മേഖലാ ഐജിയുടെ ചുമതലയ്ക്കു പുറമേയാണ് അധിക ചുമതല കൂടി നല്‍കിയത്. മനുഷ്യാവകാശ കമ്മിഷന്‍ ഐജി പി.പ്രകാശിനെ കോഴിക്കോട് ക്രൈംബ്രാഞ്ച് ഐജിയാക്കി. അവധി കഴിഞ്ഞു തിരികെയെത്തിയ എസ്.സതീഷ് ബിനോയ്ക്ക് പൊലീസ് ആസ്ഥാനത്തു ഭരണവിഭാഗം ഡിഐജിയായി നിയമനം നല്‍കി.
തൃശൂര്‍ മുന്‍ കമ്മിഷണര്‍ അങ്കിത് അശോകനു സംസ്ഥാന സ്‌പെഷല്‍ ബ്രാഞ്ചില്‍ ടെക്‌നിക്കല്‍ ഇന്റലിജന്‍സ് എസ്പിയായി നിയമനം നല്‍കി. തൃശ്ശൂര്‍ പൂരവുമായി ബന്ധപ്പെട്ട വിവാദത്തില്‍ സ്ഥലം മാറ്റപ്പെട്ടശേഷം നിയമനം നല്‍കിയിരുന്നില്ല. സംസ്ഥാന ക്രൈം റിക്കോര്‍ഡ്‌സ് ബ്യൂറോ എസ്പി സി.ബാസ്റ്റിന്‍ ബാബുവിനെ വനിതാശിശു സെല്‍ ഐജിയായും നിയമിച്ചു.
മുതിര്‍ന്ന 10 ഡിവൈഎസ്പിമാര്‍ക്കു നോണ്‍ ഐപിഎസ് വിഭാഗത്തില്‍ എസ്പിമാരായി സര്‍ക്കാര്‍ സ്ഥാനക്കയറ്റം നല്‍കി. നോണ്‍ ഐപിഎസ് വിഭാഗത്തിലെ അഞ്ച് എസ്പിമാരെ സ്ഥലം മാറ്റുകയും ചെയ്തു.
പുതിയ എസ്പിമാരും നിയമനം ലഭിച്ച യൂണിറ്റും: പ്രദീപ് എന്‍. വെയില്‍സ് സംസ്ഥാന ക്രൈം റിക്കോര്‍ഡ്‌സ് ബ്യൂറോ, എം.കെ.സുല്‍ഫിക്കര്‍ ട്രാഫിക് സൗത്ത് സോണ്‍, കെ.അശോക് കുമാര്‍ വിജിലന്‍സ് സ്‌പെഷല്‍ സെല്‍ തിരുവനന്തപുരം, ബി.കൃഷ്ണകുമാര്‍ സംസ്ഥാന സ്‌പെഷല്‍ ബ്രാഞ്ച് സെക്യൂരിറ്റി, കെ.ബിജുമോന്‍ വിജിലന്‍സ് കോഴിക്കോട് റേഞ്ച്, വി.ശ്യാംകുമാര്‍ ക്രൈംബ്രാഞ്ച് കൊല്ലംപത്തനംതിട്ട, ആര്‍.പ്രതാപന്‍നായര്‍ സംസ്ഥാന സ്‌പെഷല്‍ ബ്രാഞ്ച് ഇന്റലിജന്‍സ്, ബിജു കെ.സ്റ്റീഫന്‍ ക്രൈംബ്രാഞ്ച് ഇടുക്കി, ജെ.സലിംകുമാര്‍ ലോകായുക്ത, വി.സുഗതന്‍ ക്രൈംഅഡ്മിനിസ്‌ട്രേഷന്‍ കൊച്ചി സിറ്റി.
സ്ഥലംമാറ്റപ്പെട്ടവരും നിയമനം ലഭിച്ച യൂണിറ്റും: പ്രജീഷ് തോട്ടത്തില്‍ ക്രൈംബ്രാഞ്ച് കണ്ണൂര്‍കാസര്‍കോട്, എന്‍.രാജന്‍ കെഎസ്ഇബി വിജിലന്‍സ് ഓഫിസര്‍, എസ്.സുരേഷ്‌കുമാര്‍ വിജിലന്‍സ് കോട്ടയം റേഞ്ച്, ബിജോ അലക്‌സാണ്ടര്‍ മനുഷ്യാവകാശ കമ്മിഷന്‍, എ.യു.സുനില്‍കുമാര്‍ അസി.ഡയറക്ടര്‍ (ട്രെയിനിങ്) കേരള പൊലീസ് അക്കാദമി.
