ട്രെയിനില്‍ നിന്നും വീണ വിദ്യാര്‍ത്ഥി മറ്റൊരു ട്രെയിന്‍ തട്ടി മരിച്ചു; കൂടെയുണ്ടായിരുന്നവര്‍ വിവരം അറിയുന്നത് പോലിസ് വിളിച്ചറിയിക്കുമ്പോള്‍
കോഴിക്കോട്: ഏറ്റുമാനൂര്‍ സ്വദേശിയായ യുവാവ് ട്രെയിനില്‍നിന്നു വീണപ്പോള്‍ മറ്റൊരു ട്രെയിന്‍ തട്ടി മരിച്ചു. കോഴിക്കോട്ടാണ് സംഭവം. ഏറ്റുമാനൂര്‍ പാറോലിക്കല്‍ പഴയ എംസി റോഡില്‍ വടക്കേ തകടിയേല്‍ നോയല്‍ ജോബി (21) ആണു മരിച്ചത്. ബുധനാഴ്ച അര്‍ധരാത്രിയോടെ മീഞ്ചന്ത മേല്‍പാലത്തിനു സമീപമായിരുന്നു അപകടം. ട്രെയിന്‍ എറണാകുളത്തെത്തിയപ്പോഴാണ് നോയലിനെ കാണാനില്ലെന്ന വിവരം സുഹൃത്തുകള്‍ അറിയുന്നത്. നോയലിനായി തിരച്ചില്‍ നടത്തുന്നതിനിടെ പോലിസ് വിളിച്ചറിയിക്കുമ്പോഴാണ് കൂടെ ഉണ്ടായിരുന്നവര്‍ മരണ വിവരം അറിയുന്നത്. പാലാ ചൂണ്ടച്ചേരി സെന്റ് ജോസഫ്‌സ് കോളജ് ഓഫ് എന്‍ജിനീയറിങ്ങിലെ ബിടെക് […]
കോഴിക്കോട്: ഏറ്റുമാനൂര്‍ സ്വദേശിയായ യുവാവ് ട്രെയിനില്‍നിന്നു വീണപ്പോള്‍ മറ്റൊരു ട്രെയിന്‍ തട്ടി മരിച്ചു. കോഴിക്കോട്ടാണ് സംഭവം. ഏറ്റുമാനൂര്‍ പാറോലിക്കല്‍ പഴയ എംസി റോഡില്‍ വടക്കേ തകടിയേല്‍ നോയല്‍ ജോബി (21) ആണു മരിച്ചത്. ബുധനാഴ്ച അര്‍ധരാത്രിയോടെ മീഞ്ചന്ത മേല്‍പാലത്തിനു സമീപമായിരുന്നു അപകടം. ട്രെയിന്‍ എറണാകുളത്തെത്തിയപ്പോഴാണ് നോയലിനെ കാണാനില്ലെന്ന വിവരം സുഹൃത്തുകള്‍ അറിയുന്നത്. നോയലിനായി തിരച്ചില്‍ നടത്തുന്നതിനിടെ പോലിസ് വിളിച്ചറിയിക്കുമ്പോഴാണ് കൂടെ ഉണ്ടായിരുന്നവര്‍ മരണ വിവരം അറിയുന്നത്.
പാലാ ചൂണ്ടച്ചേരി സെന്റ് ജോസഫ്‌സ് കോളജ് ഓഫ് എന്‍ജിനീയറിങ്ങിലെ ബിടെക് അവസാന വര്‍ഷ വിദ്യാര്‍ഥിയായിരുന്നു നോയല്‍. മംഗളൂരുവില്‍ നിന്ന് ഏറ്റുമാനൂരിലേക്കു പോകുകയായിരുന്നു. കഴിഞ്ഞ 23നു ഇന്‍ഡസ്ട്രിയല്‍ വിസിറ്റിനായി മംഗളൂരുവിലേക്കു പോയതാണ്. അവിടെനിന്നു നാട്ടിലേക്കു മടങ്ങുന്നതിനിടെയാണ് അപകടം.
സംസ്‌കാരം ഇന്നു വൈകിട്ട് 3നു വീട്ടിലെ ശുശ്രൂഷയ്ക്കു ശേഷം ഏറ്റുമാനൂര്‍ ക്രിസ്തുരാജ പള്ളിയില്‍ നടക്കും. പിതാവ് ജോബി മാത്യു മെഡിക്കല്‍ എജ്യുക്കേഷന്‍ ഡിപ്പാര്‍ട്‌മെന്റ് ടെക്‌നിക്കല്‍ ഓഫിസറും തിരുവനന്തപുരം മെഡിക്കല്‍ കോളജ് ബയോമെഡിക്കല്‍ ഡിപ്പാര്‍ട്‌മെന്റ് മേധാവിയുമാണ്. മാതാവ്: ഏറ്റുമാനൂര്‍ അമ്പാട്ട് മാലിയില്‍ ഡല്‍റ്റി ജോബി (പാലാ മാര്‍ സ്ലീവാ നഴ്‌സിങ് കോളജ് വൈസ് പ്രിന്‍സിപ്പല്‍). സഹോദരന്‍: ജോയല്‍ ജോബി (സോഫ്റ്റ്വെയര്‍ എന്‍ജിനീയര്‍).
ശുചിമുറിയില്‍ പോയി മടങ്ങുന്നതിനിടെ കാല്‍ വഴുതി വീണതാവാം എന്നാണു പൊലീസിന്റെ പ്രാഥമിക നിഗമനം. നോയലിന്റെ ഒപ്പമുണ്ടായിരുന്നവര്‍ സംഭവം അറിഞ്ഞിരുന്നില്ല. ഇവര്‍ എറണാകുളത്തെത്തിയപ്പോള്‍ അപകടവിവരം പൊലീസ് വിളിച്ചറിയിക്കുകയായിരുന്നു.
