തിരുവനന്തപുരം: കോവിഡ് രണ്ടാം തരംഗം രൂക്ഷമാകുന്ന സാഹചര്യത്തിൽ മോഹൻലാലിന്റെ 'മരക്കാർ: അറബിക്കടലിന്റെ സിംഹം'എന്ന ചിത്രത്തിന്റെ റിലീസ് മാറ്റി. നിർമ്മാതാവ് ആന്റണി പെരുമ്പാവൂരാണ് ഇക്കാര്യം അറിയിച്ചത്. ചിത്രം ഓഗസ്റ്റ് 12 ന് റിലീസ് ചെയ്യും. മെയ് 13 നായിരുന്നു ചിത്രം റിലീസ് ചെയ്യാൻ തീരുമാനിച്ചിരുന്നത്.

മോഹൻലാലിനെ നായകനാക്കി പ്രിയദർശൻ സംവിധാനം നിർവഹിക്കുന്ന ചിത്രമാണ് മരക്കാർ. നിലവിൽ ദേശീയ പുരസ്‌കാര നിറവിലാണ് ചിത്രം. മികച്ച ചിത്രം ഉൾപ്പെടെ മൂന്ന് പുരസ്‌കാരങ്ങളാണ് ദേശീയ തലത്തിൽ മരക്കാർ സ്വന്തമാക്കിയത്.

കഴിഞ്ഞ വർഷം മാർച്ചിൽ റിലീസ് പ്രഖ്യാപിച്ച ചിത്രമായിരുന്നു മരക്കാർ. പിന്നീട് ലോക്ഡൗണും മറ്റും വന്നതോടെ സിനിമാ ഇൻഡസ്ട്രി തന്നെ അവതാളത്തിലാകുകയായിരുന്നു. പ്രിയദർശന്റെ സ്വപ്ന പ്രോജക്ടായ മരക്കാറിൽ കുഞ്ഞാലി മരക്കാറുടെ റോളിലാണ് മോഹൻലാൽ എത്തുന്നത്. പ്രണവ് മോഹൻലാൽ, അർജ്ജുൻ, സുനിൽ ഷെട്ടി, പ്രഭു, മഞ്ജു വാര്യർ, സുഹാസിനി, കീർത്തി സുരേഷ്, കല്യാണി പ്രിയദർശൻ, ഫാസിൽ, സിദ്ദിഖ്, നെടുമുടി വേണു, ഇന്നസെന്റ് തുടങ്ങി വലിയ താരനിരയും അണിനിരക്കുന്ന ചിത്രമാണിത്.

 

കോവിഡ്മരക്കാർ അറബിക്കടലിന്റെ സിംഹംറിലീസ്