കൊച്ചി: കൊച്ചി മേയറായിരുന്ന പ്രൊഫ. മേഴ്‌സി വില്യംസ് അന്തരിച്ചു. 65 വയസായിരുന്നു. കൊച്ചി നഗരത്തിന്റെ ആദ്യ വനിതാമേയറായിരുന്നു മേഴ്‌സി വില്യംസ്. പാലാരിവട്ടത്തെ വസതിയിൽ ഉച്ചയോടെയായിരുന്നു അന്ത്യം. അർബുദരോഗബാധിതയായിരുന്നു. മൂന്നുമാസം മുമ്പാണ് അസുഖം തിരിച്ചറിഞ്ഞത്. അതുവരെ കൊച്ചിയിലെ രാഷ്ട്രീയ-സാംസ്‌കാരിക-സാമൂഹ്യ രംഗത്ത് സജീവ സാന്നിധ്യമായിരുന്നു മേഴ്‌സി വില്യംസ്.

എറണാകുളം സെന്റ് തെരേസസിലെ പ്രൊഫസറായിരുന്ന മേഴ്‌സി വില്യംസ് ജോലിയിൽ നിന്നു വിരമിച്ചശേഷമാണ് സജീവ രാഷ്ട്രീയത്തിലെത്തിയത്. 2005 മുതൽ 2010 വരെ കൊച്ചിയിലെ മേയറായിരുന്ന മേഴ്‌സി വില്യംസ് നഗരത്തിന്റെ ചരിത്രത്തിലെ പതിനാറാമത്തെ മേയറാണ്.