തിരുവനന്തപുരം: സംസ്ഥാനത്ത് ഇന്ന് (ഫെബ്രുവരി 15, 2026) സ്വർണവിലയിൽ മാറ്റമില്ലാതെ തുടർന്നു. ഒരു പവൻ 22 കാരറ്റ് സ്വർണത്തിന്റെ വിപണി വില 1,14,240 രൂപയാണ്. ഇന്നലെ (ഫെബ്രുവരി 14, 2026) പവന് 240 രൂപ കുറഞ്ഞതിന് ശേഷമാണ് വില സ്ഥിരമായി നിലകൊള്ളുന്നത്. യുഎസ് തൊഴിൽ വിപണിയിൽ നിന്നുള്ള ശക്തമായ കണക്കുകൾ ആഗോള സ്വർണ്ണ വ്യാപാരത്തിൽ നേരിയ സമ്മർദ്ദം ചെലുത്തിയതാണ് വിലയിൽ കാര്യമായ മാറ്റങ്ങളില്ലാതെ തുടരാൻ കാരണം.

യുഎസ് കാർഷികേതര ശമ്പള റിപ്പോർട്ട് പ്രകാരം, ജനുവരിയിൽ രാജ്യത്തെ സമ്പദ്‌വ്യവസ്ഥ 1.3 ലക്ഷം പുതിയ തൊഴിലവസരങ്ങൾ സൃഷ്ടിച്ചു. ഇതോടെ തൊഴിലില്ലായ്മ നിരക്ക് 4.3 ശതമാനമായി കുറയുകയും ചെയ്തു. ഈ ശക്തമായ തൊഴിൽ ഡാറ്റ, യുഎസ് ഫെഡറൽ റിസർവ് പലിശ നിരക്കുകൾ ഉടൻ കുറയ്ക്കുമെന്ന പ്രതീക്ഷകൾക്ക് മങ്ങലേൽപ്പിച്ചു. ഇത് ആഗോളതലത്തിൽ വിലയേറിയ ലോഹ വിപണികളിൽ സമ്മർദ്ദം ചെലുത്താൻ കാരണമായി.

ഇന്നത്തെ വിലവിവരങ്ങൾ അനുസരിച്ച്, ഒരു ​ഗ്രാം 22 കാരറ്റ് സ്വർണത്തിന് 14,280 രൂപയും, ഒരു ​ഗ്രാം 18 കാരറ്റ് സ്വർണത്തിന് 11,800 രൂപയുമാണ് വിപണി വില.

നിക്ഷേപകർ ഇന്ന് വൈകുന്നേരം പുറത്തിറങ്ങുന്ന യുഎസ് പണപ്പെരുപ്പ ഡാറ്റയും, പലിശ നിരക്ക് കുറയ്ക്കുന്നതുമായി ബന്ധപ്പെട്ട് യുഎസ് ഫെഡറൽ റിസർവ് ഉദ്യോഗസ്ഥരുടെ ഭാഗത്തുനിന്നുള്ള സൂചനകളും സൂക്ഷ്മമായി നിരീക്ഷിക്കുകയാണ്. ഇത് വരും ദിവസങ്ങളിലെ സ്വർണവിലയെ നിർണ്ണയിക്കുന്ന പ്രധാന ഘടകങ്ങളാകും.

അതേസമയം, ഇന്ത്യയിൽ വെള്ളി വിലയിൽ നേരിയ വർധനവ് രേഖപ്പെടുത്തി. ഒരു ​ഗ്രാം വെള്ളിയുടെ വില 295 രൂപയായും ഒരു കിലോഗ്രാമിന് 2,95,000 രൂപയായും ഉയർന്നു. ആഗോള സാമ്പത്തിക സൂചകങ്ങളും കേന്ദ്ര ബാങ്കുകളുടെ നയപരമായ തീരുമാനങ്ങളും സ്വർണവിപണിയുടെ ഭാവി ഗതി നിർണ്ണയിക്കുന്നതിൽ നിർണായക പങ്ക് വഹിക്കുമെന്നാണ് വിലയിരുത്തപ്പെടുന്നത്.

സ്വർണവില

സ്വന്തം ലേഖകൻ