പഴയങ്ങാടി: പുതിയങ്ങാടി ചൂട്ടാട് കടലിൽ കുളിക്കാനിറങ്ങിയ യുവാവ് തിരയിൽപ്പെട്ട് മുങ്ങിമരിച്ചു. കർണ്ണാടക മടിക്കേരി സ്വദേശി ശശാങ്ക് ഗൗഡ (23) ആണ് മരിച്ചത്. ഒപ്പമുണ്ടായിരുന്ന ചിന്തൻ (27)നെ മത്സ്യ തൊഴിലാളികൾ ചേർന്ന് രക്ഷപ്പെടുത്തി. ശനിയാഴ്‌ച്ച രാവിലെ പതിനൊന്നു മണിയോടെയാണ് സംഭവം.

ശബരിമല ദർശനം കഴിഞ്ഞ് നാട്ടിലേക്ക് തിരിച്ചു പോകുന്നതിനിടെ അയ്യപ്പ തീർത്ഥാടകസംലത്തിൽ ഇവർ കടൽ തീരം കണ്ടപ്പോൾ കുളിക്കാനിറങ്ങിയതായിരുന്നു. കടലിലെക്ക് ഇറങ്ങിയ ശശാങ്ക് തിരയിൽപ്പെട്ട് ഒലിച്ചു പോവുകയായിരുന്നു. ശശാങ്ക് തിരയിൽപ്പെട്ടു മുങ്ങിതാഴുന്നതു കണ്ടപ്പോൾ കൂടെയുണ്ടായിരുന്നവർ ബഹളമുണ്ടാക്കുകയും കരച്ചിൽ കേട്ടെത്തിയ മത്സ്യ തൊഴിലാളികൾ തോണിയെടുത്ത് കടലിൽ തെരച്ചിൽ നടത്തുകയുമായിരുന്നു.

ശശാങ്കിനെ കടലിൽ നിന്നും പുറത്തെടുത്ത് പരിയാരത്തെ കണ്ണൂർ ഗവ. മെഡിക്കൽ കോളേജ് ആശുപത്രിയിലെത്തിച്ചുവെങ്കിലും ജീവൻ രക്ഷിക്കാനായില്ല. മൃതദേഹം പരിയാരം മെഡിക്കൽ കോളേജ് ആശുപത്രി മോർച്ചറി യിൽ സുക്ഷിച്ചിട്ടുണ്ട്. പഴയങ്ങാടി പൊലീസ് ഇൻക്വസ്റ്റ് നടത്തി. മൃതദേഹം പോസ്റ്റുമോർട്ടത്തിന് ശേഷം ബന്ധുക്കൾക്ക് വിട്ടു കൊടുക്കും. കഴിഞ്ഞ ദിവസം തലശേരി - കണ്ണൂർ റോഡിലെ തോട്ടട നടാൽ റെയിൽവേ ഗേറ്റിന് സമീപം ചായ കുടിക്കാനിറങ്ങിയപ്പോൾ കർണ്ണാടക സ്വദേശിയായ ശബരിമല തീർത്ഥാടകൻ ട്രെയിൻ തട്ടി മരിച്ചിരുന്നു.

ഇതിനു ശേഷമാണ് മറ്റൊരു ദുരന്തം കൂടിയുണ്ടായത്. 20 അംഗ സംഘമാണ് ശബരിമല തീർത്ഥാടനം കഴിഞ്ഞ് മടങ്ങവെ കണ്ണൂരിലെ വിനോദ സഞ്ചാര കേന്ദ്രങ്ങൾ സന്ദർശിച്ചത്. ഇതിൽ രണ്ടു പേരാണ് പുതിയങ്ങാടി ചൂട്ടാട് ബീച്ചിൽ കുളിക്കാനി റ ങ്ങിയത്. അപകട സാധ്യതയുള്ള സ്ഥലമായിട്ടും ഇവിടെ ലൈഫ് ഗാർഡില്ലാത്തതും മുന്നറിയിപ്പു ബോർഡുകളില്ലാത്താതുമാണ് അപകടത്തിനിടയാക്കിയതെന്ന് പ്രദേശവാസികൾ പറഞ്ഞു.

ചൂട്ടാട്ട് ബീച്ചിലെ കടലിന്റെ ആഴവും പരപ്പും അറിയാതെ കുളിക്കാനിറങ്ങുന്നവരാണ് അപകടത്തിൽപ്പെട്ടുന്നത്. മത്സ്യ തൊഴിലാളികളും നാട്ടുകാരുമാണ് ഇവിടെ വിനോദ സഞ്ചാരികളെ അപകടത്തിൽ നിന്നും രക്ഷപ്പെടുത്തുന്നത്.

 

അനീഷ് കുമാര്‍

    മറുനാടന്‍ മലയാളി ന്യൂസ് കോണ്‍ട്രിബ്യൂട്ടര്‍