ആദ്യം പരിഗണിച്ചിരുന്നത് അർജുനന്റെ വേഷത്തിൽ; മീശയെടുക്കാൻ വിസമ്മതിച്ചതോടെ മഹാഭാരതത്തിലെ കർണ്ണനായി; താരത്തിന്റെ രൂപത്തെ ആസ്പദമാക്കി കർണ്ണ ക്ഷേത്രങ്ങൾ സ്ഥാപിക്കപ്പെട്ടു; മധു ഒരുക്കിയ 'രണ്ടാം വരവി'ലൂടെ മലയാളത്തിൽ അരങ്ങേറ്റം; ബോളിവുഡ് നടൻ പങ്കജ് ധീർ വിടപറയുമ്പോൾ

മുംബൈ: ബി.ആർ. ചോപ്രയുടെ വിഖ്യാത ടെലിവിഷൻ പരമ്പരയായ 'മഹാഭാരതം' നാടകത്തിലെ കർണ്ണൻ എന്ന കഥാപാത്രത്തിലൂടെ പ്രേക്ഷകരുടെ മനസ്സിൽ ഇടം നേടിയ നടൻ പങ്കജ് ധീർ (68) അന്തരിച്ചു. അവസാന നാളുകളിൽ ആരോഗ്യനില വഷളായതിനെ തുടർന്ന് ശസ്ത്രക്രിയയ്ക്കും വിധേയനായിരുന്നു. ബുധനാഴ്ച വൈകുന്നേരം 4.30ന് മുംബൈയിലെ സാന്താക്രൂസ് പവൻ ഹാൻസ് ശ്മശാനത്തിൽ സംസ്കാരം നടന്നു.

1956-ൽ പഞ്ചാബിൽ ജനിച്ച പങ്കജ് ധീറിന് സിനിമപാരമ്പര്യമുള്ള കുടുംബ പശ്ചാത്തലമുണ്ടായിരുന്നു. അദ്ദേഹത്തിന്റെ പിതാവ് സി.എൽ. ധീർ പ്രശസ്തനായ സംവിധായകനും നിർമാതാവുമായിരുന്നു. പിതാവിനെപ്പോലെ സംവിധായകനാകാനായിരുന്നു പങ്കജിന്റെ ആദ്യകാല മോഹം. സിനിമയിൽ സഹസംവിധായകനായാണ് അദ്ദേഹം ഔദ്യോഗിക ജീവിതം ആരംഭിച്ചത്. പിന്നീട് അഭിനയരംഗത്തേക്കും അദ്ദേഹം കടന്നു. 'സൂഖ്' എന്ന ചിത്രത്തിലൂടെയാണ് അദ്ദേഹം അഭിനയരംഗത്ത് അരങ്ങേറിയത്.

1988-ൽ പുറത്തിറങ്ങിയ 'മഹാഭാരതം' പരമ്പരയിൽ കർണ്ണനെ അവതരിപ്പിച്ചതോടെയാണ് പങ്കജ് ധീർ ഇന്ത്യയൊട്ടാകെ പ്രശസ്തനായത്. കർണ്ണന്റെ കരുത്തുറ്റ കഥാപാത്രത്തെ അവതരിപ്പിച്ച അദ്ദേഹത്തിന്റെ പ്രകടനം ഏറെ പ്രശംസ പിടിച്ചുപറ്റി. അദ്ദേഹത്തിന്റെ രൂപത്തെ ആസ്പദമാക്കി കർണ്ണ ക്ഷേത്രങ്ങൾ പോലും സ്ഥാപിക്കപ്പെട്ടുവെന്ന് പറയപ്പെടുന്നു. 'മഹാഭാരത'ത്തിൽ അർജുനന്റെ വേഷത്തിനായി ആദ്യം പരിഗണിച്ചിരുന്നെങ്കിലും മീശയെടുക്കാൻ വിസമ്മതിച്ചതിനാൽ ആ വേഷം ലഭിച്ചില്ലെന്നും പിന്നീട് കർണ്ണന്റെ വേഷം ലഭിച്ചുവെന്നും റിപ്പോർട്ടുകളുണ്ട്.

ചലച്ചിത്ര രംഗത്തും ടെലിവിഷൻ പരമ്പരകളിലും നിരവധി വേഷങ്ങൾ ചെയ്ത പങ്കജ് ധീർ, 'ചന്ദ്രകാന്ത,' 'ബധോ ബാഹു,' 'സീ ഹൊറർ ഷോ,' 'കാനൂൻ' തുടങ്ങിയ ടിവി പരമ്പരകളിലൂടെയും 'സോൾജിയർ,' 'ആന്ദാസ്,' 'ബാദ്ഷാ,' 'തുംകോ നാ ഭൂൽ പായേംഗേ' തുടങ്ങിയ സിനിമകളിലൂടെയും പ്രശസ്തനാണ്. 'മൈ ഫാദർ ഗോഡ്ഫാദർ' എന്ന ചിത്രം അദ്ദേഹം സംവിധാനം ചെയ്തിട്ടുമുണ്ട്.

ബോളിവുഡിലെ അതികായരായ അമിതാഭ് ബച്ചൻ, സൽമാൻ ഖാൻ, ഇർഫാൻ ഖാൻ തുടങ്ങിയ താരങ്ങൾക്കൊപ്പവും പങ്കജ് ധീർ മികച്ച പ്രകടനങ്ങൾ കാഴ്ചവെച്ചിട്ടുണ്ട്. മലയാള സിനിമാ രംഗത്തും പങ്കജ് ധീർ തൻ്റെ സാന്നിധ്യമറിയിച്ചിട്ടുണ്ട്. 1990-ൽ കെ. മധു സംവിധാനം ചെയ്ത 'രണ്ടാം വരവ്' എന്ന ചിത്രത്തിൽ അദ്ദേഹം അഭിനയിച്ചിരുന്നു.സഹോദരൻ സത്‌ലജ് ധീറിനൊപ്പം മുംബൈയിൽ വിസേജ് സ്റ്റുഡിയോസ് എന്ന പേരിൽ ഒരു സ്റ്റുഡിയോ നടത്തിയിരുന്നു. കൂടാതെ, അഭിനയ് ആക്ടിങ് അക്കാദമി എന്ന പേരിൽ ഒരു അഭിനയ പരിശീലന സ്ഥാപനവും അദ്ദേഹം സ്ഥാപിച്ചിരുന്നു.