കുടുംബവഴക്ക്, ഭാര്യയെ കണ്ണീര് കുടിപ്പിക്കുമെന്ന് ഭീഷണി; 50-കാരനെ വീട്ടിൽ കയറി കുത്തിക്കൊന്നത് ബന്ധുവായ യുവാവ്; കൊലപാതകത്തിന് ശേഷം സുഹൃത്തുക്കൾക്കൊപ്പം രക്ഷപ്പെട്ട ഷിബിനെ പൊലീസ് കസ്റ്റഡിയിൽ എടുത്തത് ഒളരിയിലെ ബാറിൽ നിന്നും
തൃശ്ശൂർ: ചേറ്റുപുഴ ഗാന്ധിനഗർ കോളനിയിൽ മധ്യവയസ്‌ക്കനെ കുത്തിക്കൊലപ്പെടുത്തിയ സംഭവത്തിൽ യുവാവ് അറസ്റ്റിലായി. ഭാര്യയെ കണ്ണീരു കുടിപ്പിക്കുമെന്ന് ഭീഷണിപ്പെടുത്തിയതിനാണ് തന്മാത്ത് രജു(50)വിനെ കുത്തിക്കൊന്നത്. സംഭവത്തിൽ രജുവിന്റെ ബന്ധുവും ഗാന്ധിനഗർ കോളനി നിവാസിയുമായ ഷിബിനെ(26) തൃശ്ശൂർ ടൗൺ വെസ്റ്റ് പൊലീസ് കസ്റ്റഡിയിലെടുത്തു.
വിഷുദിനത്തിൽ വൈകീട്ട് മൂന്നു മണിയോടെയായിരുന്നു സംഭവം. മരിച്ച രജുവും പ്രതി ഷിബിനും ബന്ധുക്കളാണ്.രജുവിന്റെ ഭാര്യ ഗീതയുടെ സഹോദരനാണ് പ്രതി ഷിബിന്റെ സഹോദരിയെ വിവാഹം ചെയ്തിട്ടുള്ളത്.
വിഷു ആഘോഷിക്കാൻ ഗീതയുടെ അച്ഛൻ ശങ്കുവിന്റെ വീട്ടിൽ ഷിബിൻ എത്തിയിരുന്നു. ഇതിനിടെ കുടുംബവഴക്കുണ്ടാവുകയും ഇതിൽ ഷിബിൻ ഇടപെടുകയും ചെയ്തു. വഴക്കിനിടെ ഉന്തുംതള്ളുമുണ്ടായി. ഒടുവിൽ ഗീതയെ കണ്ണീര് കുടിപ്പിക്കുമെന്ന് പറഞ്ഞാണ് ഷിബിൻ ഇവിടെനിന്ന് മടങ്ങിപ്പോയത്.
തുടർന്ന് സുഹൃത്തുക്കളുമായി ചേറ്റുപുഴയിലെത്തിയ ഷിബിൻ രജുവിനെ വീട്ടിൽക്കയറി കുത്തിക്കൊല്ലുകയായിരുന്നു. നാട്ടുകാർ അറിയിച്ചതിനെ തുടർന്നെത്തിയ പൊലീസും ആക്ട്സ് പ്രവർത്തകരും ചേർന്ന് രജുവിനെ ജില്ലാ ആശുപത്രിയിലും മുളങ്കുന്നത്തുകാവ് മെഡിക്കൽ കോളേജ് ആശുപത്രിയിലും എത്തിച്ചെങ്കിലും മരിച്ചിരുന്നു. രജുവിന് ഒന്നിലേറെ തവണ കുത്തേറ്റിട്ടുണ്ടെന്ന് പൊലീസ് പറഞ്ഞു.
സംഭവത്തിന് ശേഷം സുഹൃത്തുക്കൾക്കൊപ്പം രക്ഷപ്പെട്ട ഷിബിനെ ഒളരിയിലെ ബാറിൽനിന്നാണ് പൊലീസ് കസ്റ്റഡിയിലെടുത്തത്. കേസിൽ അന്വേഷണം തുടരുകയാണെന്ന് ടൗൺ വെസ്റ്റ് പൊലീസ് ഇൻസ്പെക്ടർ എ. പ്രസാദ് പറഞ്ഞു. എ.സി.പി. ബേബി, പൊലീസ് ഇൻസ്പെക്ടർ എ. പ്രസാദ്, എസ്. ഐ. നസീബ് സി.എച്ച്., സി.പി.ഒ. ഫൈസൽ എന്നിവരടങ്ങിയ സംഘമാണ് പ്രതിയെ പിടികൂടിയത്.
