അവശ്യസാധനങ്ങളുടെ വിലവർദ്ധനയും തൊഴിലില്ലായ്മയും ആശങ്ക; കോവിഡ് മൂന്നാം തരംഗത്തെ ഫലപ്രദമായി കൈകാര്യം ചെയ്തു; സർക്കാർ പ്രതീക്ഷ നിറവേറ്റി; സർവേയിൽ മികച്ച റേറ്റിങ്; പ്രധാനമന്ത്രി പദത്തിലെ എട്ടാം വാർഷികത്തിലും ജനസമ്മിതിയിൽ മോദി തിളങ്ങുന്നു
ന്യൂഡൽഹി: നരേന്ദ്ര മോദി സർക്കാരിനുള്ള ജനസമ്മതി കോവിഡ് കാലയളവിൽ വർധിച്ചതായി സർവേഫലം. വിലക്കയറ്റവും തൊഴിലില്ലായ്മയും സർക്കാരിനു കളങ്കം ചാർത്തുമെന്ന അഭ്യൂഹങ്ങൾക്കിടെയാണിത് സർവേ ഫലം പുറത്തുവന്നിരിക്കുന്നത്. പ്രധാനമന്ത്രി പദത്തിൽ തുടർച്ചയായ എട്ടു വർഷം പൂർത്തിയാക്കിയ പ്രധാനമന്ത്രി നരേന്ദ്ര മോദിക്ക് ജനസമ്മതിയിൽ വൻ വർദ്ധന ഉണ്ടായെന്നാണ് കണക്കുകൾ സൂചിപ്പിക്കുന്നത്.
64,000 പേരാണ് സർവേയിൽ വോട്ട് രേഖപ്പെടുത്തിയത്. ഇതിൽ 67 ശതമാനം പേരും മോദിഭരണം പ്രതീക്ഷയ്ക്കൊത്ത് ഉയർന്നെന്ന അഭിപ്രായം പങ്കുവച്ചു. കഴിഞ്ഞ വർഷത്തെ സർവേയിൽ ഇത് 51 ശതമാനമായിരുന്നു. 2020-ൽ കോവിഡ് തുടങ്ങിയ ഘട്ടത്തിൽ 62 ശതമാനം പേരാണ് മോദി ഭരണത്തെ അനുകൂലിച്ചത്. ആശുപത്രികളും ശവപ്പറമ്പുകളും തിങ്ങിനിറഞ്ഞ കോവിഡിന്റെ രണ്ടാം തരംഗത്തിൽ 51 ശതമാനം പേരും.
മൂന്നാം തരംഗത്തിൽ സർക്കാർ വലിയ തയ്യാറെടുപ്പോടെ പ്രവർത്തിച്ചെന്നാണ് സർവേയിൽ പങ്കെടുത്തവരിലേറെയും വിലയിരുത്തിയത്. സാമ്പത്തികനില ഒരുവിധം ഭദ്രമായി കൊണ്ടുപോകാനും സർക്കാരിനായി. അപ്പോഴും രാജ്യത്തെ തൊഴിലില്ലായ്മ വലിയ പ്രശ്നമാണെന്ന് സർവേയിൽ പങ്കെടുത്തവർ ചൂണ്ടിക്കാട്ടി.
കോവിഡ് തുടങ്ങിയതിന് ശേഷം നടത്തിയ സർവേകളിൽ ഏറ്റവും കൂടുതൽ പേർ നരേന്ദ്ര മോദിക്ക് അനുകൂലമായി നിലപാട് എടുത്തു എന്ന പ്രത്യേകതയും ഇപ്പോഴത്തെ ഫലം സൂചിപ്പിക്കുന്നു. ലോക്കൽ സർക്കിൾ നടത്തിയ സർവേയിൽ പങ്കെടുത്ത് അഭിപ്രായം പങ്കുവച്ച 64,000 പേരിൽ 67 ശതമാനവും രണ്ടാം ടേമിൽ മോദി സർക്കാർ പ്രതീക്ഷകൾ നിറവേറ്റി എന്ന അഭിപ്രായക്കാരാണ്.
കഴിഞ്ഞ ദിവസമാണ് നരേന്ദ്ര മോദി പ്രധാനമന്ത്രി പദത്തിൽ എട്ടുവർഷം പൂർത്തീകരിച്ചത്. 2014 മെയ്‌ 26 നാണ് അദ്ദേഹം ഇന്ത്യയുടെ പ്രധാനമന്ത്രിയായി സത്യപ്രതിജ്ഞ ചെയ്ത് അധികാരത്തിൽ വന്നത്. 2019ലെ തിരഞ്ഞെടുപ്പിൽ വിജയിച്ച് വീണ്ടും കൂടുതൽ തിളക്കത്തോടെ അധികാരം തുടരുകയായിരുന്നു. മോദി സർക്കാരിന് 67 ശതമാനം ജനസമ്മിതി ഇപ്പോഴത്തെ അവസ്ഥയിലും നേടാനായത് ഏറെ ആശ്വാസകരമാണ്.
അവശ്യസാധനങ്ങളുടെ വിലയും തൊഴിലില്ലായ്മയും രാജ്യത്ത് വർദ്ധിക്കുമ്പോഴും ജനത്തിന് വിശ്വാസം സർക്കാരിലുണ്ടെന്ന് ഇത് സൂചിപ്പിക്കുന്നു. രാജ്യത്ത് കോവിഡ് ആരംഭിച്ച 2020ൽ നടന്ന സർവേയിൽ 62 ശതമാനമാമ് മോദി സർക്കാരിന്റെ നയങ്ങളെയും പ്രകടനത്തെയും അംഗീകരിച്ചത്. പുതിയ സർവേയിൽ കോവിഡ് മൂന്നാം തരംഗത്തെ സർക്കാർ ഫലപ്രദമായി കൈകാര്യം ചെയ്തതായി ജനം വിലയിരുത്തി.
അതേസമയം സർവേയിൽ പങ്കെടുത്തവർ രാജ്യത്ത് വർദ്ധിച്ചുവരുന്ന തൊഴിലില്ലായ്മ പ്രതിസന്ധിയെക്കുറിച്ച് ആശങ്ക പ്രകടിപ്പിച്ചു.തൊഴിലവസരങ്ങളുടെ വിഷയത്തിൽ 37 ശതമാനം പേർ മാത്രമാണ് മോദി സർക്കാരിനെ അംഗീകരിച്ചത്. എന്നാൽ കഴിഞ്ഞ വർഷം ഇത് 27 ശതമാനം മാത്രമായിരുന്നു.
2020 ൽ തൊഴിലവസരങ്ങളുടെ വിഷയത്തിൽ 29 ശതമാനമാണ് മോദി സർക്കാരിന് ഫുൾ മാർക്ക് നൽകിയത്. സർവേയിൽ പങ്കെടുത്തവരിൽ നല്ലൊരു വിഭാഗവും രാജ്യത്തെ പണപ്പെരുപ്പത്തെക്കുറിച്ച് ആശങ്ക പ്രകടിപ്പിച്ചു. പൊതുതിരഞ്ഞെടുപ്പ് രണ്ട് വർഷത്തിനുള്ളിൽ നേരിടേണ്ടതിനാൽ ഇക്കാര്യത്തിൽ സർക്കാർ മികച്ച തീരുമാനങ്ങളെടുക്കാനാണ് സാദ്ധ്യത.
രാജ്യത്ത് സാമുദായിക സൗഹാർദം മെച്ചപ്പെടുത്താൻ മോദി സർക്കാരിന് കഴിഞ്ഞുവെന്ന് 60 ശതമാനം പേർ വിശ്വസിക്കുമ്പോൾ ഈ വിഷയത്തിൽ 33 ശതമാനം പേർ സർക്കാരിനോട് വിയോജിപ്പാണ് രേഖപ്പെടുത്തുന്നത്. ഇന്ത്യയിൽ സംരംഭങ്ങൾ തുടങ്ങാൻ എളുപ്പമായെന്ന് അമ്പത് ശതമാനത്തിലധികം പേർ അഭിപ്രായം രേഖപ്പെടുത്തി.
കഴിഞ്ഞ എട്ട് വർഷത്തിനുള്ളിൽ നമ്മുടെ ദാരിദ്ര്യ നിരക്ക് 22 ശതമാനത്തിൽ നിന്ന് പത്തു ശതമാനമായി കുറഞ്ഞു, കടുത്ത ദാരിദ്ര്യം ഒരു ശതമാനത്തിൽ താഴെയായി കുറഞ്ഞ് 0.8 ശതമാനമായി. കഴിഞ്ഞ എട്ട് വർഷത്തിനുള്ളിൽ നമ്മുടെ പ്രതിശീർഷ വരുമാനം ഇരട്ടിയായപ്പോൾ നമ്മുടെ വിദേശ കരുതൽ ശേഖരവും ഇരട്ടിയായെന്നും കണക്കുകൾ സൂചിപ്പിക്കുന്നു.
