നെല്ലിയാമ്പതി: നെല്ലിയാമ്പതിയിൽ കൊക്കയിലേക്ക് വീണ് കാണാതായ രണ്ട് യുവാക്കൾക്കായുള്ള തിരച്ചിൽ തുടുരുന്നു. നെല്ലിയാമ്പതി സന്ദർശിക്കാനെത്തി സീതാർകുണ്ട് വ്യൂപോയിന്റിൽനിന്നു കൊക്കയിലേക്കു വീണു കാണാതായ ഒറ്റപ്പാലം മേലൂർ സ്വദേശി സന്ദീപ് (22), കോട്ടായി സ്വദേശി രഘുനന്ദൻ (22) എന്നിവർക്ക് വേണ്ടിയാണ് പൊലീസും ഫയർഫോഴ്‌സും തിരച്ചിൽ ഊർജിതമാക്കിയിരിക്കുന്നത്.

ഇന്നലെ വൈകിട്ടു 5.30നായിരുന്നു അപകടം. സീതാർകുണ്ട് വ്യൂപോയിന്റ് സന്ദർശിക്കുന്നതിനിടെ സന്ദീപിന്റെ കാൽവഴുതി. രഘുനന്ദൻ, സന്ദീപിനെ രക്ഷിക്കാൻ ശ്രമിക്കുന്നതിനിടെ ഇരുവരും കൊക്കയിലേക്കു വീണതായി പൊലീസ് അറിയിച്ചു. വിവരമറിഞ്ഞ് ആലത്തൂർ ഡിവൈഎസ്‌പി കെ.എം. ദേവസ്യയുടെ നേതൃത്വത്തിലുള്ള പൊലീസ് സംഘം സ്ഥലത്തെത്തി. രാത്രി രക്ഷാപ്രവർത്തനം ആരംഭിച്ചു.

കൊക്കയിൽ, 50 മീറ്റർ താഴ്ചയിൽ ഇറങ്ങി പരിശോധിക്കാനായിരുന്നു തീരുമാനം. സീതാർകുണ്ടിനു താഴെ കൊല്ലങ്കോട് വനമേഖലയിലും ഫയർഫോഴ്സും പൊലീസും വനം വകുപ്പും അടങ്ങുന്ന സംഘം തിരച്ചിൽ നടത്തും. സമുദ്രനിരപ്പിൽനിന്നു 1572 മീറ്റർ ഉയരത്തിലാണു സീതാർകുണ്ട്. ബെംഗളൂരുവിൽ ഐടി കമ്പനി ജീവനക്കാരാണ് ഇരുവരും. ഒപ്പം ജോലിചെയ്യുന്ന സുഹൃത്തുക്കളുമൊത്തു നാലുപേരടങ്ങുന്ന സംഘം രണ്ടു ബൈക്കുകളിലാണ് ഇന്നലെ നെല്ലിയാമ്പതി കാണാൻ എത്തിയത്.

 

കൊക്കയിലേക്ക് വീണ്നെല്ലിയാമ്പതിയുവാക്കൾ