മറ്റൊരു പെൺകുട്ടിയുമായി വിവാഹം ഉറപ്പിച്ചു; യുവതി കാമുകനെ ആസിഡൊഴിച്ചു കൊലപ്പെടുത്തി: 25കാരനായ ദേവേന്ദ്ര കുമാറിനെ കൊലപ്പെടുത്തിയത് വിവാഹിതയും ഒരു കുട്ടിയുടെ അമ്മയുമായ യുവതി
ആഗ്ര: മറ്റൊരു പെൺകുട്ടിയുമായി വിവാഹം ഉറപ്പിച്ചതിന്റെ പ്രതികാരം തീർക്കാൻ യുവതി കാമുകനെ ആസിഡൊഴിച്ച് കൊലപ്പെടുത്തി. കാമുകിയുടെ ആസിഡ് ആക്രമണത്തിൽ 80 ശതമാനം പൊള്ളലേറ്റ ആഗ്രാ സ്വദേശിയായ ദേവേന്ദ്ര കുമാറാണ്(25) മരിച്ചത്. സംഭവത്തിൽ യുവാവിന്റെ കാമുകിയായ സോനം പാണ്ഡെ എന്ന യുവതിയെ പൊലീസ് കസ്റ്റഡിയിലെടുത്തു. സാരമായി പൊള്ളലേറ്റ ഇവരും ആശുപത്രിയിൽ ചികിത്സയിലാണ്.
വ്യാഴാഴ്ചയായിരുന്നു ദാരുണമായ സംഭവം. വിവാഹിതയും ഒരു കുട്ടിയുടെ അമ്മയുമായ സോനവും ദേവേന്ദ്രകുമാറും ഏതാനും വർഷങ്ങളായി അടുപ്പത്തിലായിരുന്നു. ഇതിനിടെയാണ് ദേവേന്ദ്രകുമാറിന്റെ വിവാഹം വീട്ടുകാർ തീരുമാനിച്ചുറപ്പിച്ചത്. ഏപ്രിൽ 28-ന് വിവാഹം നടത്താനായിരുന്നു തീരുമാനം. എന്നാൽ ഇതറിഞ്ഞ സോനം പാണ്ഡെ വിവാഹത്തെ എതിർക്കുകയും കുമാറുമായി വിവാഹത്തെ ചൊല്ലി വഴക്കടിക്കുകയും ചെയ്തു.
എന്നാൽ അഞ്ച് സഹോദരിമാരുള്ള കുമാർ വിവാഹിതയായ യുവതിയുമായുള്ള പ്രണയത്തെക്കുറിച്ച് വീട്ടിൽ പറയാനോ നിശ്ചയിച്ചുറപ്പിച്ച വിവാഹത്തിൽ നിന്ന് പിന്മാറാനോ തയ്യാറായില്ല. ഇതോടെ കുമാറിനെ കൊല്ലാൻ യുവതി പദ്ധതിയിടുകയായിരുന്നു. ഇതിനായി വീട്ടിലെ ഫാൻ കേടായെന്ന് പറഞ്ഞ് വ്യാഴാഴ്ച രാവിലെ യുവതി കാമുകനെ വീട്ടിലേക്ക് വിളിച്ചുവരുത്തി. കുമാർ വീട്ടിലെത്തിയതോടെ വിവാഹക്കാര്യത്തെച്ചൊല്ലി ഇരുവരും തമ്മിൽ വഴക്കുണ്ടായി. ഇതിനുപിന്നാലെയാണ് സോനം പാണ്ഡെ കയ്യിൽ കരുതിയിരുന്ന ആസിഡ് കുമാറിന് നേരേ ഒഴിച്ചത്.
80 ശതമാനത്തോളം പൊള്ളലേറ്റ യുവാവിനെ പിന്നീട് ആശുപത്രിയിൽ എത്തിച്ചെങ്കിലും മണിക്കൂറുകൾക്ക് ശേഷം മരണത്തിന് കീഴടങ്ങി. സാരമായി പൊള്ളലേറ്റ സോനവും ആശുപത്രിയിൽ ചികിത്സയിലാണ്. സംഭവത്തിൽ യുവതിയുടെ അറസ്റ്റ് രേഖപ്പെടുത്തിയ ശേഷം വിശദമായ അന്വേഷണം നടത്തുമെന്ന് പൊലീസ് പറഞ്ഞു.
നഴ്സായ സോനവും ലാബ് അസിസ്റ്റന്റായ കുമാറും നേരത്തെ ഒരേ ആശുപത്രിയിൽ ഒരുമിച്ച് ജോലിചെയ്തിരുന്നു. പിന്നീട് രണ്ടുപേരും രണ്ടിടങ്ങളിലേക്ക് മാറി. ജോലി ആവശ്യാർഥം സോനം ഭർത്താവിനെയും മകളെയും വിട്ട് ആഗ്രയിലെ ഖാണ്ഡാരി മേഖലയിലേക്ക് ഒറ്റയ്ക്ക് താമസം മാറുകയും ചെയ്തു. ഇതിനിടയിൽ ഇരുവരുടെയും ബന്ധം വളരുകയായിരുന്നു.
