അബുദാബി: ബിഗ് ടിക്കറ്റ് നറുക്കെടുപ്പിൽ മലയാളിക്ക് വീണ്ടും ഭാഗ്യം. കണ്ണൂർ സ്വദേശിക്ക് നറുക്കെടുപ്പിൽ രണ്ടാം സമ്മാനമായ 9.98 കോടി രൂപയാണ് ലഭിച്ചത്. ഒന്നാം സമ്മാനം ബംഗ്ലാദേശ് പൗരനാണ് ലഭിച്ചത്. ഒരു കോടി ദിർഹം അതായത് 19.98 കോടി രൂപയുടെ ഒന്നാം സമ്മാനമാണ് അൽഐനിൽ ഗാരേജ് നടത്തിവരുന്ന ബംഗ്ലാദേശ് പൗരൻ ഷാഹിദ് അഹ്മദ് മൗലവി ഫൈസിന് ലഭിച്ചത്.

ബംഗ്ലാദേശിലുള്ള കുടുംബത്തെ യുഎഇയിലേക്കു കൊണ്ടുവരണം. മക്കളുടെ ഭാവിക്കായി നല്ലൊരു തുക നിക്ഷേപിക്കണം. ബാക്കിയുള്ള പണം യുഎഇയിൽ നിക്ഷേപിക്കും. ഇതൊക്കെയാണ് ഒന്നാം സമ്മാനം ലഭിച്ച ഷാഹിദിന്റെ ആഗ്രഹം.

രണ്ടാം സമ്മാനമായ 50 ലക്ഷം ദിർഹ (9.98 കോടി രൂപ)മാണ് കണ്ണൂർ പയ്യന്നൂർ കോതടിമുക്ക് സ്വദേശിയും ബഹ്‌റൈനിലെ അൽമറായ് കമ്പനി ഏരിയാ സെയിൽസ് മാനേജറുമായ രാമൻ നമ്പ്യാർ മോഹനന് ലഭിച്ചത്. രണ്ടു മക്കളുടെ വിദ്യാഭ്യാസത്തിനും അമ്മയുടെ ചികിത്സയ്ക്കും തുക വിനിയോഗിക്കുമെന്ന് രാമൻ നമ്പ്യാർ മനോരമയോടു പറഞ്ഞു.

26 വർഷമായി ഗൾഫിലുള്ള ഇദ്ദേഹം 11 വർഷമായി ബഹ്‌റൈനിലാണ്. 2014ൽ ഹൃദയാഘാതംമൂലം ഭാര്യ മരിച്ചു. മൂത്ത മകൻ ചെന്നൈയിൽ എൻജിനീയറിങ് അവസാനവർഷ വിദ്യാർത്ഥിയാണ്. ഇളയ മകൻ ബഹ്‌റൈനിലുണ്ട്.

 

9.98 കോടി രൂപ സമ്മാനംഅബുദാബി ബിഗ് ടിക്കറ്റ് നറുക്കെടുപ്പമലയാളി