ദുബായ്: അബുദാബി ബിഗ് ടിക്കറ്റ് നറുക്കെടുപ്പിൽ മലയാളികളെ തേടി വീണ്ടും ഭാഗ്യം എത്തി. ദുബായിൽ ഡ്രൈവറായ മലയാളിയും ഒൻപത് സുഹൃത്തുക്കളും ചേർന്നെടുത്ത ടിക്കറ്റിന് 40 കോടിയിലേറെ രൂപ (20 ദശലക്ഷം ദിർഹം) യുടെ സമ്മാനമാണ് അഠിച്ചത്. കൊല്ലം സ്വദേശി രഞ്ജിത് സോമരാജന്റെ പേരിലെടുത്ത ടിക്കറ്റാണ് ഭാഗ്യം കൊണ്ടുവന്നത്. ലക്കി ഡ്രോ നടുക്കെടുപ്പുകളിലെ മലയാളികളുടെ ഭാഗ്യത്തെ കുറിച്ച് അറിയാവുന്ന രഞ്ജിത്ത് കഴിഞ്ഞ മൂന്ന് വർഷമായി കൂട്ടുകാർക്കൊപ്പം ചേർ്ന്ന് ടിക്കറ്റെടുക്കാറുണ്ട്. എങ്കിലും കോടികൾ തന്നെ തേടി വന്നതിന്റെ ഞെട്ടലിലും സന്തോഷത്തിലുമാണ് രഞ്ജിത്ത്.

ദുബായിലെ ഒരു ഹോട്ടലിന്റെ വാലെ പാർക്കിങ്ങിൽ ജോലി ചെയ്യുന്ന ഇന്ത്യ, പാക്കിസ്ഥാൻ, നേപ്പാൾ, ബംഗ്ലാദേശ് സ്വദേശികളായ ഒൻപത് പേരാണ് രഞ്ജിതിന്റെ സഹ ഭാഗ്യവാന്മാർ. ഓരോരുത്തരും 100 ദിർഹം പങ്കിട്ടായിരുന്നു ജൂൺ 29ന് ടിക്കറ്റ് വാങ്ങിച്ചത്. എന്നെങ്കിലും ഭാഗ്യം നമ്മെ തേടി വരുമെന്ന് കൂട്ടുകാരോട് പറയുമായിരുന്നുവെന്ന് രഞ്ജിത് പറഞ്ഞു. ഡ്രൈവറായി ജോലി ചെയ്യുന്ന രഞ്ജിത്തിന് ഇനി സ്വന്തമായി ഒരു ബിസിനസ്് തുടങ്ങണമെന്നാണ് ആഗ്രഹം.

ഭാര്യ സഞ്ജീവനി പെരേര, മകൻ നിരഞ്ജൻ എന്നിവരോടൊപ്പം ഹത്തയിൽ നിന്ന് റാസൽഖൈമയിലെത്തിയപ്പോഴാണ് സമ്മാന വിവരം അറിഞ്ഞത്. പച്ചക്കറി വാങ്ങാൻ വേണ്ടി ഒരു പള്ളിയുടെ അരികിൽ വാഹനം നിർത്തിയിരുന്നു. 8 വയസുകാരനായ മകൻ തത്സമയം നറുക്കെടുപ്പ് കണ്ടുകൊണ്ടിരിക്കുകയായിരുന്നു. ഒന്നും രണ്ടും സമ്മാനമായ യഥാക്രമം 30, 10 ലക്ഷം ദിർഹം പ്രഖ്യാപിച്ചു. തനിക്ക് ഇപ്രാവശ്യവും ഇല്ലല്ലോ എന്നോർത്ത് പള്ളിക്ക് നേരെ നിന്ന് പ്രാർത്ഥിച്ചപ്പോഴാണ് തന്റെ നമ്പർ (349886) ഒന്നാം സമ്മാനമായി പ്രഖ്യാപിച്ചതെന്ന് 37കാരനായ രഞ്ജിത് പറഞ്ഞു.

സന്തോഷം കൊണ്ട് മകൻ ആർത്തുവിളിച്ചു. ഇതിന് ശേഷം അഭിനന്ദനങ്ങളുടെ പ്രവാഹമായിരുന്നു. 2008 മുതൽ ദുബായ് ടാക്‌സിക്ക് കീഴിൽ വിവിധ കമ്പനികളിൽ ഡ്രൈവറായി ജോലി ചെയ്യുകയായിരുന്നു. ശമ്പളം കുറച്ചതിനാൽ കഴിഞ്ഞ വർഷം ഡ്രൈവർ ജോലിയോടൊപ്പം സെയിൽസുമാനുമായി. അടുത്തിടെ മറ്റൊരു കമ്പനിയിൽ ഡ്രൈവർപിആർഒ ആയി ജോലി ലഭിച്ചു. 3,500 ദിർഹമാണ് ശമ്പളം. ഭാര്യ ഹോട്ടലിൽ ജോലി ചെയ്യുന്നതുകൊണ്ടായിരുന്നു കുടുംബം സാമ്പത്തിക പ്രശ്‌നങ്ങളില്ലാതെ കടന്നുപോയത്. സ്വന്തമായി ഒരു ബിസിനസ് ആരംഭിക്കുക സ്വപ്നമാണ്. കുടുംബവുമായി കൂടിയാലോചിച്ച് ബാക്കി കാര്യങ്ങൾ തീരുമാനിക്കും.

 

40 കോടിയുടെ ഭാഗ്യംഅബുദാബി ബിഗ് ടിക്കറ്റ് നറുക്കെടുപ്പിമലയാളി