കള്ളന്മാർ ജാഗ്രതെ.... കണ്ണുരിൽ പൊലിസ് ഇനി സൈക്കിളിലും പട്രോളിങിനിറങ്ങും; പൊലിസും പാരിസ്ഥിതിക സൗഹാർദ്ദമാകുന്നു
കണ്ണൂർ : കണ്ണൂരിലെ പൊലിസും പാരിസ്ഥിതിക സൗഹാർദ്ദമാകുന്നു. അന്തരീക്ഷ മലിനീകരണവും ഗതാഗതകുരുക്കു മൊഴിവാക്കാൻ ഇനി സൈക്കിളിലും പൊലിസ് പട്രോളിങിനിറങ്ങും പൊലിസുകാരുടെ കായിക ക്ഷമത വർധിപ്പിക്കാൻ കൂടിയാണ് കേരളത്തിൽ ആദ്യമായി പുത്തൻ ആശയം നടപ്പിലാക്കുന്നത്. ന്യൂ ഡൽഹി, മുംബെ, ബംഗ്ളുര് എന്നീ മെട്രോ നഗരങ്ങൾക്ക് സമാനമായാണ് പുത്തൻ പരിക്ഷണവുമായി ജില്ലാ പൊലിസ് രംഗത്തിറക്കിയിട്ടുള്ളത്.
സംസ്ഥാനത്ത് ആദ്യമായാണ് ക്രമസമാധാനം പാലിക്കാൻ പൊലിസ് സൈക്കിളിലിറങ്ങുന്നത്. ജില്ലാ പൊലിസ് നടപ്പിലാക്കിയ പെഡൽ പൊലിസ് പട്രോളിങ് കണ്ണൂർ കോർപറേഷൻ പരിധിയിൽ കഴിഞ്ഞ ദിവസം തുടങ്ങി. ബൈസിക്കിൾ പട്രോളിംഗാണ് പെഡൽ പൊലീസ് പദ്ധതി കൊണ്ട് ലക്ഷ്യമിടുന്നത്. കണ്ണുരിൽ സജീവമായി പ്രവർത്തിക്കുന്ന ബൈസിക്കിൾ ക്ളബ്ബുകളുമായി സഹകരിച്ചാണ് ഇതിന്റെ പ്രവർത്തനം.
കണ്ണൂർ ബൈ സൈക്കിൾ മേയർ ഷാഹിൻ പള്ളിക്കണ്ടിയുടെ മുൻ കൈയിലാണ് ഈ നൂതന സംരഭം ആവിഷ്കരിച്ചത്. കഴിഞ്ഞ ദിവസം വൈകുന്നേരം കണ്ണൂർ ചേംബർ ഹാളിൽ വെച്ചു നടന്ന ചടങ്ങിൽ, കണ്ണൂരിന്റെ ബൈ സൈക്കിൾ മേയർ ഷാഹിൻ പള്ളിക്കണ്ടി, പട്രോളിംഗിനുള്ള സൈക്കിൾ ജില്ലാ പൊലീസിന് കൈമാറി.
ഇനി മുതൽ കണ്ണൂർ ജില്ലാ പൊലീസ് വിവിധ കേന്ദ്രങ്ങളിൽ ബൈസിക്കിൾ പട്രോളിങ് നടത്തുമെന്ന് ജില്ലാ പൊലിസ് മേധാവി ആർ.ഇളങ്കോ അറിയിച്ചു. കേരളത്തിൽ ആദ്യമായിടട്ടാണ് കണ്ണൂർ ജില്ലയിൽ ഈ സംവിധാനം നടപ്പിലാക്കുന്നതെന്നും കണ്ണൂർ സിറ്റി പൊലീസ് കമ്മീഷണർ ആർ ഇളങ്കോ പരിപാടിയിൽ പറഞ്ഞു. സൈക്ലിങ് കമ്മ്യുണിറ്റിക്ക് തീർച്ചയായും ഇതൊരു പ്രോത്സാഹനമാണെന്ന് സിറ്റി പൊലിസ് കമ്മിഷണർ പറഞ്ഞു.
നിരവധി സൈക്ലിസ്റ്റുകൾ അനുദിനം വർധിച്ചു കൊണ്ടിരിക്കുന്ന നമ്മുടെ കണ്ണൂരിനെ സംബന്ധിച്ചിടത്തോളം ഇത് എല്ലാവർക്കും ഒരു പ്രചോദനമായിരിക്കുമെന്നും എസ്പി പറഞ്ഞു.പൊലിസ് തുടക്കമിട്ട ഈ സംരഭത്തിൽ നിന്നും പ്രചോദനം ഉൾകൊണ്ട് കൂടുതൽ ആളുകൾ സൈക്ലിങിലേക്ക് തീർച്ചയായും വരുമെന്നാണ് പ്രതീക്ഷയെന്നും ആർ.ഇളങ്കോ പറഞ്ഞു.
പരിപാടികെ വി സുമേഷ് എംഎൽഎ സൈക്കിൾ ഓടിച്ചു കൊണ്ട് ഉദ്ഘാടനം ചെയ്തു.
ജില്ലാ പഞ്ചായത്ത് പ്രസിഡന്റ് പി പി ദിവ്യ, മുൻ എംപി പി കെ ശ്രീമതി ടീച്ചർ എന്നിവർ സൈക്കിൾ അനാവരണം ചെയ്തു. ജില്ലാ പൊലീസ് കമ്മിഷണർ ആർ.ഇളങ്കോ പൊലിസിന് ലഭിച്ച രണ്ടു സൈക്കിളുകൾ ഷാഹിന് പള്ളി കണ്ടിയിൽ നിന്നും ഏറ്റു വാങ്ങി.
